☰ Zǝbur 149
149
149-küy •••• Ⱪiyamǝt künidiki ƣǝlibǝ üqün mǝdⱨiyilǝnglar!
1 Ⱨǝmdusana!
Pǝrwǝrdigarƣa atap yengi bir nahxini oⱪunglar;
Mɵmin bǝndilǝrning jamaitidǝ Uning mǝdⱨiyisini eytinglar!
2 Israil ɵz Yaratⱪuqisidin xadlanƣay;
Zion oƣulliri ɵz Padixaⱨidin hux bolƣay! ◘
3 Ular Uning namini ussul bilǝn mǝdⱨiyiligǝy;
Uningƣa küylǝrni dap ⱨǝm qiltarƣa tǝngxǝp eytⱪay!◘
4 Qünki Pǝrwǝrdigar Ɵz hǝlⱪidin sɵyünǝr;
U yawax mɵminlǝrni nijatliⱪ bilǝn bezǝydu;
5 Uning mɵmin bǝndiliri xan-xǝrǝptǝ roⱨlinip xad bolƣay,
Orunlirida yetip xad awazini yangratⱪay! ◼
6 Aƣzida Tǝngrigǝ yüksǝk mǝdⱨiyiliri bolƣay,
Ⱪollirida ⱪox bisliⱪ ⱪiliq tutulƣay; ◘
7 Xuning bilǝn ular ǝllǝr üstidin ⱪisas,
Hǝlⱪlǝrgǝ jaza bǝja yürgüzidu;
8 Əllǝrning padixaⱨlirini zǝnjirlǝr bilǝn,
Aⱪsɵngǝklirini tɵmür kixǝnliri bilǝn baƣlaydu; ◘
9 Ularning üstigǝ pütülgǝn ⱨɵkümni bǝja kǝltüridu —
Uning barliⱪ mɵmin bǝndiliri muxu xǝrǝpkǝ nesip bolidu!
Ⱨǝmdusana! ◘
 
 
◘ 149:2 Zǝb. 100:3 ◘ 149:3 Zǝb. 81:2-4 ◼ 149:5 «Orunlirida yetip xad awazini yangratⱪay!» — «orunlirida yetix» bǝlkim: — (1) Yǝⱨudiylarning ɵrp-adǝtliri boyiqǝ, ziyapǝtlǝrdǝ meⱨmanlar üqün kɵrpilǝr selinip, meⱨmanlar yeniqilap yetip dastihandin alidu; xunga muxu yǝrdǝ huxalliⱪ ziyapǝtlǝrni kɵrsitidu; (2) mɵmin bǝndilǝr xunqǝ huxal bolup, huxalliⱪidin uhliyalmaydu; (3) ɵzlirining aman-esǝn yetip-ⱪopuxliri üqün xadlinixi kerǝk. ◘ 149:6 2Tes. 2:8; Ibr. 4:12; Wǝⱨ. 1:16 ◘ 149:8 Mat. 18:18 ◘ 149:9 Ⱪan. 4:6
☰