5
1 Ki bakeri nole geumkak uridli ableglam ki umele ese keriba gem obatkoare mokakalam keriba mud adem ikadarda, keriba ia wataragri debe kerkar gem muige kotorge mokakalam meta Agudide tababu daramerda muige able tonarge wi ia wataragri niaikarem.
2 Able gemge pemi uridli mi moketmir digareda ableglam mi aukaise laglag uridli meriba kerkar gem muige kotorge kesotais able gesep gemira.
3 Ableglam nade able lu wakai, mi ia mi sikak tarabarsirare, a mi nole ia mi lamar tuarder nole gemkak.
4 Mi moketmir digareda meriba adud oka beberbeber ike nade mi pemi able gemge uridli, nole ablelam mi laglag walikak warder epe ablegem mi laglag sikak nabarsirlare muige merbi kotor gemge. Able tonarge, meriba gem ia umele weumi able gemide ia keswatais umerkak weumi.
5 Agudide tababu merbim tidirsiri meriba kerkar gem ia mi tapeirare. A E merbi Lamar Zogo dikwarda e kikem lu ikeredi able lugira.
MIZMIZ 5 NOSIK 6-10
6 Ki mena nole geumkak uridli pe able lu ia watakai nade mi nabaume ablelam mi umele mi able piripiri waurder mena able gesep gemge, mi mena waurder adge Agudi gedlam,
7 epe ki uridli owaturlam Agudi doge, nole owetreda able luge pe kiki dasmereda.
8 Pe irdi ki mena nole geumkak uridli a kiki laglag ki geki tuarder Ople gedge a nole iki waurder able gesep gemge.
9 Ki mitkar dorge ikereda ia waiakai Agud sererge odawer neis tonarge ki gesep gemge waurder a adge geseop gemlam,
10 ablelam mi gair le ia mi netatnetat tarabakwei muige Kerisoi autmer kerkerge ia waiakai E merbi utiditmerare. Gair legize ia otirpare tabara bodomalam ge nalu ikerer, debele a adud, muige able kerkerge.