2
MIZMIZ 2 NOSIK 7-13
7 Kiki Kerisora kaimegiz, ki umele kiki ge ki wabi dikerda beberbeber berda, ege ki no sikak urder nade ki wabi doge dale mokakalam apude tabara omaskir onaseseredlare.
8 Ableglam keriba omar wabim kige no able lu ikerida wabi doge nole debe mir tebteb ki ko geki urder wabi doge sererserer.
9 Buai, wa dikepwareda keriba au dorge ki a gerger wa nole gewa bodomalam ikelare kiki wabi doge urder geki Agudira debe mir detautlare.
10 Wa wabu dasmerda a pako Agude dasmeli kiki dale zogozogo, barkak a nole sek amrirkak wabim able leem peiwawa irmireda.
11 Wa umele uridli ki wabim geki ikelare mokakalam babet waikerer taba omaskirem.
12 Ki wabi okadeskeda a ki wabi degderapeda a ki wabi sirdaiswereda wa able tonar ge uridwa pe Agudi doge debele ike pe E wabi dabgereda Abi baselaiem a Abi zoromem.
13 Ki Agudi mena eswao ikereda ableglam Agudira mir bakamuda wabim kerbialam wage erpeidara ableglam Agudira mir ike a nole lera mir ike. Agudira mir pe wabi doge dali pe wawa irmireda.