1 IOANE
draft by Fr Nagai Tabo, Peter Wickham on Mer Feb 88, revised D Salee & K Tapim
1
1 IOANE 1.1—2.2
1 Kiki wabim ditarda ia waiakai wa umelebai able ididira mir ge Babidoge tikereder nade ge digrarti. Kiki tasorda a kiki dasmerda kerbi poniu. Kiki sikak dasmerda a kiki itutirda kerbi tagu.
2 Nade able idid tabakiamuda gem baida kiki abi dasmerda. Kiki able le uridli geki urder, kipe wabi peki detagreda able niai idid ge dawer Babidoge okakise a merbim batomerda.
3 Kiki wabi koki detagerda nalu kiki dasmerda a tasorda, ia waiakai wako umele kerbidoge batabemeret netat buaise Babidoge a abi Weremge, Iesu Keriso.
4 Kiki wabim able mir digrareta waiakai wa gair sikak sererge baprekrare.
5 Able mir kiki tasorda abialam a kipe wabi peki barkak detagreda: Agud bi dali, nole kupkupi abi doge ike.
6 Ki besle ki umerkak sikak warder ese kiki detautlare mimi netatbuai Agudi doge mi no kupkupige warder.
7 Mimi no netat buai uridli nade mi bige uridli. Epe able mam ge agimuda abi wermira Iesura gair wit waitkir ese mi bige warder.
8 Ki kerbibu besbardeda a nole lakak able agekar obarpei nade ki detauteda kiki witkak uridli.
9 Nade ki keriba wit detauteda Agudim, e tabara mir odikepwarer e ia meriba wit odimaidered. E umele able waiker, e meriba gair adud tonar merbialam adem waitkir.
10 Mi Agudi dabgereda besle a mi abra mir diweda ese mi detauteda mimi nole witkak.