10
MIZMIZ 10 NOSIK 22-30
Bab A Ka Ki Netat Dali
22-23 Able kerker tabarki wetpurem a Ko Turper Wadikedidarda muige Ierusalemage. E au gebgeb kerker irdireder, ege Iesu baka muige tidigmer au zogometage, able utebge ge dabgelare Solomona Maisoge.
24 Iudaya le ge etami Iesu dairumareta a abi itmerda, “Ma na niainiai kerbi dereplare ki nabaremlare? Ma kerbi paretkak detagrare; nako mama Keriso nali?”
25-26 Iesude yabi daratagerda, “Kaka wabi emetu detagerda, waba nole karidoge oka dali. Able lu kaka ikeli kari Bab sasrimge wabi agekar detomerteda, waba nole karidoge oka dali ableglam wa nole kara mamoi uridli.
27 Kari mamoigize kara kodomir asreda; ka yabi umele nali a wipe kari namireda.
28 Ka yabi niai idid naiswereda wi ya umerkak obaum; netat lelut ya umerkak yabi kari taglam adem wanaisare.
29 Kari Babet yabi kari naisweri; e aukelarkelar dali gair leem, a nole netat lelut ya umerkak yabi kari taglam adem wanaisare.
30 Bab a ka ki netat dali.”