18
Koskir Maikira A Autmer Lera Mir Abisir Mir
mizmiz 18 nosik 1-8
1 Ege Iesude yabi able mir abisir mir daratagerda, ya waiakaida wi oberwerda wi nako erkep obasamer a nole erkepasam wadikairtare.
2 Muige utebge ei autmer le wadali e nole Adi wasoli a e nole le wanasreda.
3 Muige able utebge ei koskir maik ko wadali. E mena watabakseli autmer leem a abi waikeli, “Ka laglag ma kari nazimu kari kurablelam!”
4 Able piripiri ei autmer le obaukarikli, ege keubu ga dikepwari, “Gair wader kerkerge ka nole Adi wasrer a ka nole le wanasorlare,
5 epe no able kerker pe irdiredi ka yaka able koskir maik upidatilu ableglam e mena tikasiredi kari natkoli. Ese nolekar, ei mena watikasereder karim a keubu ya kari aukaise wanatko.”
6 Ege Oplede ga daratagerda, “Wa dasmerare nako seksek autmer lelut detauti.
7 Wa nako dikepwareda? Nako Adide able le upiwadaratidarare ge e itutri, pe wi erer bakrili abim gair gergerge a kige? Nako e wapum wadawer yabi upiatidarem?
8 Kaka wabi detagreda, wao e ya yabi upiwadaratidarare; e ya dudumdudum wadawer yabi upiatidarem. Nade ya Lera Werem watabakiamu able gesepem nako e owatur wairdar?