LUKA
1989 - draft by Fr Tabo, Pr Day, Peter Wickham, K Noah, Dn S Mabo
7
Mizmiz 7 nosik 11-17
Iesude Idid Ko Ikwari Koskir Maikira Werem
11 Kebi niainiai, Iesu bakiamuda able kebi utebge abra nei dikereder Nein; abra memegle a lera ga nikidetreder abi kemem bakiauda.
12 Nawarge Iesu tabakiamuda maike able uteb karge, wader legize ge eudle tigaredlare; e no netat werem koskir maikira wadali. Gair le able uteblam ge urder able eudle apuidoge.
13 Nade ga Oplelut able koskir dasmeri, abra aukaka nas barki. E akaida abi detagri, “Ma nole iezo.”
14 Ege digmi bakiamuda eudlera meta itutida; able legize ge eplare wige no bakwi. Iesude abi detagri, “Kirgirle, ka mari natagri, ma ekiam!”
15 Ege able eudle etida emrida a akaida mir detauti, a Iesude abi ikaida abra apu ikwari.
16 Gair le ge urder wi bazigmuarti; wi Agudi dispirda a ke detautlare, “Au peropeta pe merbim batomeda! Agud tabakiamuda tabara le upidaratidareda!”
17 Legize Iesura able mir debreredlare kemerkemer Iudayage a pako wader ged maike narid.
Witwit Koskiride Iesui Wakaisoyu Diderdi
mizmiz 7 nosik 36 - mizmiz 8 nosik 3
36 Netat lelut Parisayolam Iesuim mirigri ko abidoge lewer wairwi; e bakiamuda Parasayoi metage badari a eididari lewer arwem.
37-38 Netat koskir witge wadali able utebge; e asri Iesude ge lewer erwer Parisayo metage, ege tikada au bakirbakir debe laglag wakaiso able au bakirbakir tarporge igmeder. E Iesuidoge keubu ikweireder maike abi teterge iezwer. Ege abra i pog deskeder abra teter daratimuarer, ege abra teter taba musu daratkirer, uma darakerer a debe laglag wakaiso yabidoge epaiter.
39 Nade able Parisayo, ge Iesuim mir igri able lu dasmeri, e eudige dikepwari, “Ese able kimiar agekar peropeta wadali, e ya umele wadali nalu koskiret pe abi itutili, a e umele wadali abra tonar pe witwit dikeredi!”
40 Iesude abi detagri, “Simona ka laglag mari nerut mir natagrer.” Simonade abi detager, “Wau erwerle, ma kari natager.”
41 Iesude abi detagri, “Able bakir taragrile neis le bakiru tardaragri; netat le 500 zoromzorom bakir a nerut le 50 zoromzorom bakir.
42 Able neis le ge yaba nole bakir daragriweretlare ko abi bodomalam waiswereriei, ege no yabi daratwi. Nete able neislelam abi au omarge ikerer?”
43 Simonade abi detagri, “Ka dikepwali, able le ge adem batwi ge mitkar bakir aisi.” Iesude abi detagri, “Ma kari barkak natagri.”
44 Iesu bataurigda able koskirem a akaida Simona detagri, “Ma able koskir dasmer. Ka tabakiamuda mari metage badari mape nole kari ni nakwari kara teter ogwanatkiri, epe e kara teter ognatkili taba iyu a taba musu pe natkirli akaidariei watwet baidariei.
45 Ma nole kari uma nakaida, epe able koskiret mena kara teter uma darakeli nade pe kaka tabakiamuda badari mena bakedida able kerkerge pe irdi.
46 Ma nole wakayso kari kirimge epaiterdi epe able koskiret kara neis teter kemerkemer nakadari able au bakirbakir debe laglag wakaisoyu darasali.
47 Ka mari natagri, mi umele abi au omarlam dasmerei abra mitkar wit pe batkirda. Nete pe batkirli kebikebi e no kebikebi omarge dali.”
48 Ege Iesu akaida able koskir detagri, “Mara wit pe batkirda.”
49 Wader le ge emreder eudige dikepwarda, “Nete pe able le dali e umele wit waitkir?”
50 Iesude able koskir detagri, “Mari owaturide mari nakaidari sikak baida; ma bakiamu mapodange.”