Mareko
The Gospel of Mark was prepared by members of the Summer Institute of Linguistics together with members of the Meriam Mir language community. It was published by the Summer Institute of Linguistics June, 1994 with a print run of 50 copies (ISBN 0 86892 3583). The text never went through final translation checking procedures but has been digitised to preserve its historical and community value.
1
Zonera Bapataisora Marauarem
1 Able debe mir peike Iesu Kerisora, Adira Werem.
2 Able ad ge bagrareta mokakalam ge Isaia peropetade ditari: Ma asor; Ka yaka kikem kara miraisisle amariklu marim gab wadirsir.
3 E ya erer wekrier muige sogipurge, Wa wabu barsirawem Opleem; gair lu ikerewem barkak ober.
4 Able miraisisle, Zone Bapataiso, batomerdari muige sogipurge. E le bapataiso darapaitlare a leem marauermer: “Adem tabatarare wabi witlam a bapataiso bapaitare ya waiakai Adide waba wit adem waitkir.”
5 Le tabakeslare Ierusalemalam a pako kemerkemer Iudaialam bakeslare bauser Zonei wasorda. Na legize ge tabara wit detautlare ege yabi bapataiso darapaitlare muige Ioridanoge.
6 Zonera walige kamela muslam dikereder a ege amier kelarkelar lager abi gemge dimrireder. Abra lewer ge pirn nagriweretlare a pako isawira ni.
7 Ege le natomeretlare, “Able le penoko kari keubu ikaseredi e au sasrimsasrim karim dali; ka nole abkorep ko abra teter gab adem daogilu.
8 Kaka wabi bapataiso nige depaiteda, e ya wabi bapataiso wadikerlare Lamar Zogoge.
Iesura Bapataiso A Mirem
MRK 1.9-11
9 Keubu, Iesu tabakiamuda Nazaretlam muige Galiiaiage a Zonede abi baptaiso dikailu muige Ioridano keperge.
10 Nade e nilam tegimeda, aududumge Iesude dasmeri kotor ekesmuda a ege Lamar Zogo dibadiba noge abim tabi.
11 Ege kodomir teosmeda kotorlam, “Mama kara nasnas Werem nali. Kaka mari sererge nali.”
MRK 1.12-13
12 Au dudumge able Lamar Zogode Iesui emarikda sogipurem.
13 E ge sogipurge dawer Satanade abi mirem ikerer 40 gerger. Aregareg ebur ge urder ege angela no tabatweri abi aseseredlare.
Iesude Dirmisida Mirarem
MRK 1.14-15
14 Keubu wader luge, Zonei didbarda itimedarda, Iesuge bakiamuda Galilaiaem Adira Debe Mir ermer.
15 “Able barkak kerker pedikeredi,” e atkarti. “Adira basalaia maike ikeredi! Wa tabatarare wabi adud tonarlam a wage Debe Mir irmirare.”
MRK 1.16-20
16 Nadege Iesu digmer Galilaia Keper tawerge, ege nardari neis lar-asaperle Saimona a abra barada Andru, wige lar esaperlei larasaperlugu.
17 Iesude yabi daratagri, “Wa tabakiamulam karidoge kai wabi derwere le asaper.”
18 Wige keko tabara larasaperlu darakareta a abi irmirei.
19 E kebikebi ko bakiamuda ege nardari tabara neis barada, Zemis a Zone, Zebediia werem. Wi taba narge darawedei tabara larasaperlu dirsirlei.
20 Nadege Iesude yabi nardari ege keko yabi darabgeri; wige tabara bab Zebedi a abra dorgele narge darakairtiei wige Iesui irmirei.
MRK 1.21-28
21 Iesu a abra memegle tabakiamuda able utebge abra nei dikereder Kapanaum. Nerut Sabatge Iesu bakiamuda sunagoge akaida marauermer.
22 Able le ge turder bazigmurati ableglam e barkakle nerwerlare sasrimge, aukaise Aotarleem.
23 Keserkeser ege kimiar tabakiamuda sunagoge. Demoni abidoge dawer e ererekrier,
24 “Mara nole nalu peike, Iesu Nazaretle! Ka umele ma taba kerbi detko. Ka umele mama Zogole Adira naii.”
25 Iesude aukaise dimoni detagri, “Ma mir baimi mage adem able kimiarlam teosmer!”
26 Able dimonide able kimiar aukaise deskerdi, aukaka mir etkarti a adem teosmeda.
27 Ege le bazigmuarti. Wige tabara bautmerlare, “Nalu peike? Able erwer nerut korep ike. Able le pe barkakle dali. E aukaise dimoni detagri a wipe irmirda.”
28 Ablegira mir dudumdudum ebrerdi kemerkemer Galilaiage.
Iesude Mitkar Le Nadgilare
MRK 1.29-34
29 Wige sunago dikaireta a bakiauda natkak Saimonyabim metaem Andruei. Zemis iba Zone yabidoge bakiamudariei.
30 Saimonara neiwet ama auka ziruziru gimgim sike ipereder. Au dudumge wi Iesui detagerda abi gimlam.
31 Ege bakiamuda abidoge tekweida abi tage erpeida a abi upiditida abi ikaida imridari. Able zirude abi dikairti ege siklam adem eupamada a akaida yabim ga lewer dirsirer.
32 Able kige nade lim baraigida legize Iesuim taraislare gair gimgimle a wader le ge yaba dimoni urder.
33 Gair le able gedlam etami adge tege.
34 Iesude mitkar le nadgilare gair korep gimlam a dimoni adem nauslare. Able dimoni nole mirkak ableglam Iesu laglag dawer. E able lu ikaida ableglam wi umele urder e nete dali.
Iesu Erkepasameida Lekak Utebge
MRK 1.35-39
35 Nerut idimge keubu ga lim teupumada Iesu siklam adem eupumada a meta dikairti. E adem bakiamuda able uteblam lekak utebem, a ege eudi erkepasameida.
36 Ege Saimona a wader no bakiauda abi daraimerda.
37 Nadege wi abi erdarda, wi abi detagerda, “Gair legize mari naraimreda.”
38 Ege Iesude yabi daratagerda, “E debele dikeredi mi nabakiaware wader utebem pe naridwerteda ya waiakai ka umele koka yabim mir arme. Ableglam kaka tabakiamuda.”
39 Ege digmer muige gair utebge Galilaiage marauermer sunagoge a adud lamar adem nauslare.
MRK 1.40-45
40 Netat kimiar gegur-bad gimgim dawer tabakiamuda Iesui opem taba kokmamu emrida a abi upiatidarem bagwi. E etkarlu kega, “Ese ma laglag nali, ma umele kari nakai ogkak nabailu.”
41 Ege Iesura nas barki, tabara tag itrimurikda a able le erpeida. Iesude able kimiar detagri, “Ka laglag nali. Ma akai ogkak bai.”
42 Keko able gimide able le dikairti a ege akaida ogkak baidari Mosei Gelar pekge.
43 Iesude eudi abi aburker adem emarikda, kikem e abi barkak esereser detagri,
44 “Ma nole netat le able luglam detager. Ma no barkak bakiamu a mabu tabatomer merkemem a zegu lewer mara agimu ge Mosede Gelar idagi able tonar gimlam, ya waiakai gair le umele ober ma emetu akaida ogkak baidari Gelar peke.”
45 Ege able le no bakiamudari gair le daratagelare, able mir ebrerder gair utebge. Able luglam Iesu nole paretkak leem eosmerer e no lekak utebge dawer a ege le mena tabakeslare abra ardar gair uteblam.