10
Iesude Le Nerwerlare Nalu Lu Dikeredi Wa Batwakam
MRK 10.1-12
Iesude able uteb dikairti ege bakiamuda Iudaiage a bakiamuda Ioridanoi datupida. Au kub lera ko taba etami abidoge a ege yabi nerwerlare mokakalam ge e able lu gair kerkerge ikerer.
Wader Parisaiole tabakiauda abim ko abi taba miru wadamisirda. Wi eudige abi itmerda, “Ma kerbi detagrare, muige kerbi gelarge, aka kimiargize umele tabara koskir wadaratuakare?” Iesude ge yabi nautmerda, “Wabi Mosede nako wabi waditagreda?”
Wige abi detagerda, “Mosede kerbi detagerda kimiargize umele tabara atwak-ziawali waditalare a wi tabara koskir adem wanamiklare.”
Iesude yabi daratagerda, “Mosede able kelarkelar mir ditari wabim ableglam wabi umerkak waderwerlare. Nadege bagrarti, nadege gesep batagmer able kerkerge, Adide ge yabi daratagmi kimiar iba koskirei. Ableluglam pa ikeredi, kimiargize tabara baba iba apuei wadarakairetlare wi obaker taba koskirge obakep, a able rieisya waiakailam netat obailam. Wi nole neis wadaralei, wi netat wadaralei. Pa dikeredi, lelut nole laglag wadaratakemu nalu ge Adide okasise daratkaprikda.”
10 Nade wi bakomerti bakiauda metage barti, ege able memeglegize Iesui titmerda able iuglam. 11 Ege yabi tadaratagerda, “Na kimiargize pe tabara koskir daratwakeda ei nerut koskir waispi wipe taba koskirem adud tonar ikereda. 12 Able orwairorwair, na koskirgize pe tabara kimiar daratwakeda ei nerut kimiar ge espi wipe taba kimiarem adud tonar ikereda.”
Iesude Kebiomaskir Obdarapita
MRK 10.13-16
13 Wader legize omaskir taraisa Iesuim ko e yabi wanatutirda ege memeglegize le natapereta.
14 Nadege Iesude able lu dasmeri, ege abra lidbagebda. E akaida tabara memegle daratagerda, “Wa omaskir nakerare wi karim watabakiauare. Wa nole yabi taramrare ableglam Adira basalaia pe ikeredi leem mokakalam wi uridli. 15 Ka wabi agekar detagreda, netide nole Adi basalaiaiem wadabger able korepkorep pe kebiwerem dali ei umerkak ya obau.” 16 Ege tabara tag nakaida gasu able omaskir narepda, a nakaida yabidoge darakmerikda a werkab yabi nakwarda.
Kirgir Lugizkemle
MRK 10.17-31
17 Nawer Iesu ga marbamarker obakiamuda, ege le abim korider temrida a kokni erapeida abi opem. E eudige Iesui itmeri, “Debe erwerle, ka nalu lu akere ya waiakai ka niai idid tarpeilu?”
18 Iesude abi itmeri, “Ma naluglam kari nabgeli debele? No pe Ad dali debele. 19 Ma umele nali 10 geiar:' ma nole ipitwa; ma nole kog derevwa; ma nole erwamem; ma nole besdiridwa; ma nole okaderdar; ma mara bab a ama narmirwa?”
20 Able kimiaride abi detagri, “Erwerle, ka able gair lu narmireda able kerkerlam nade kaka kebiwerem watarali.”
21 Iesu egremada abi barkak omaromar dasmeri a abi detagri, “Ma no netat lu laglag nali. Bakiamu mage mara gair lu iker wi wairapare, mage mara gair bakir ais lukak le naiswerare. Mara ya mamor kotorge wataragri. A tabakiamu kari narmir.”
22 Nade kimiaride able mir asri, abra op depigemeda akaidari okasosoksosok erkep ga ikereder. E adem bakiamudari auka okasosoksosok ableglam abra mitkar bakir nagriweretlare.
23 Iesu akaida tabara memegle darasmerda a eudige yabi daratagerda, “Lugizkem leem au sagimsagim ikeredi wi obarot Adi basalaiage!” 24 Ege memegle bazigmuarti able mirlam. Ege Iesude mena detauter, “Kara omaskir, e au sagimsagim ikeredi le obarot Adi basalaiage! 25 Lugizkem lera aukaka sagim daragriwerteda wi obarot Adi basalaiage pe kamela dali e obakiamu obau wali atketlu nebge.
26 Wige aukaise ga bazigmuarti nade wi able mir asorda. Wi tabara bautmerlare, “Pe irdiredi, nete ya idid watakai?”
27 Iesude ga yabim barkak darasmerda a yabi daratagerda, “Legize tebteb umerkak able lu waikerare ei Adide umele waiker. Adide umele gair lu waiker.”
28 Ege Peterude eudige abi ikaidari, “Ma dasmer, kiki emetu gair lu dikrida a paki mari namireda.”
29 Iesude eudige abi tikaidari, “Kaka mari agekar natagerli, na legize pe tabara uteb, barada, sisi, ama, bab, omaskir a gedub darakareta karim a debe mirge 30 ya wairpare aukakale able kerker pe irdiredi. E 100 uteb, barada, sisi, ama, bab, omaskir a gedub ya watirep - a asiasi pa nagriwerteda. A able kerker pe irdi ya obaruk e ya niai idid watirpei. 31 A netiba mitkar pe kikem uridli wi ya keubu waturder, a netiba pe keubu uridli wi ya kikem waturder.
Iesude Tabara Eud Ko Detauti
MRK 10.32-34
32 Wige gabge nakasirweretlare kei Ierusalemaem; Iesu ge kikem ikasereder memeglege. Ege memegle bazigmuarti, a legize ga abi keubu irmirlare wige geumge bakerer. Iesude ko tabara memegle naisa netat pekge nakoda a no yabi daratagerda able lu ya abim watabakerare.
33 E yabi daratagerda, “Wa asrare, mi pemi dikasir Ierusalemaem ya nade Lera Werem wairpeirare a waigardare Kebi Kirim Merkem a Aotarle wanakwarare. Wi ya waditautlare e seksek le dali, a wi ya waditautlare abra bodomalam pe dikeredi end. Wi ya abi waipeirare a waigardare nogleem. 34 Noglegize ya abi neg wadigalare, abi mosu waitulare, abi wadamrikare a abi waipitare. Neis a netat gerger ya obarkare, e ya ko wekiam idid wakai.
Zemis A Zone Iesui Itmerlei
MRK 10.35-45
35 Ege Zemisiba Zonei, Zebidaiora werem, wi tabakiamudariei Iesuim. Wi taba abi ikaidariei, “Erwerle, ki laglag ma kerbim nerut lu ikai.”
36 Iesude ge yabi nautmeri, “Wa nalu lu laglag dali ka wabim akailu?”
37 Wige abi detagriei, “Nade ma ya temri mabi zoromzorom basalaiage, ki laglag kiko taramrile maridoge; netat mari narbit pekge a netat mari ber pekge.” 38 Iesude eudige yabi daratagri, “Wa nole umerkak dali wa nalugem eutmereiei. Nako wa umele able asiasi iriam mokakalam able asiasi ya kaka arie? Nako wa umele bapataiso bapaiteredlam okasosokge mokakalam ya kaka nabapaiteredlu okasosokge?”
39 Wige abi ikaidariei, “Wao, ki umele akailei.”
Ege Iesude yabi daratagri, “Wa ya iriam nalu ya kaka arie, a wa ya bapataiso bapaiteredlam mokakalam ya kaka bapataiso nabapaiteredlu. 40 Ka nole ka able le nali kaka itutilu nete ya kari narbit pekge wetemri a kari ber pekge. Able uteb ge barsirlare barkak leem, a able uteb ya no able le watabaiswer.”
41 Nadege wader 10 memeglegize able mir asorda ege yaba lid bagebda Zemisibim Zoneei. 42 Iesude yabi gair darabgerda tababim a eudige yabi daratagerda, “Wa umele uridli pe noglege tike yabi kirim le sasrimge turidli, a able legize pa wader le aukelarkelar sirdarameda. 43 Epe wabidoge pe ikeredi, waba tonar ya tabara wanagri. No able tonar pe dikeredi ese netat wabialam aukaka le wadawer e kikem wakai memegle obai waba kemerkemer lera. 44 No able gab pe ikeredi ese netat wabialam waiakai kikem obai e kikem wakai au akekerakeker memegle obai; 45 ableglam Lera Werem ko tabakiamuda leem dorge waikerer, nole legize abim dorge waikelare. E tabakiamuda tabara idid waikwar bodomalamise gair leem.”
Iesude Batimasi Able Sadmer Le Idgiri
MRK 10.46-52
46 Wi tabakiauda Zerikoge. Nawerge Iesuiba taba memeglekem a lera kub pa ikeredi Zerikolam nakasirweretlare, able sadmer kimiar abra nei dikereder Batimas (e Timaiasirs werem) gabge imireder a leem bakirem bagwer. 47 Nade legize abi detagerda Iesu Nazaret Le pe ikasiredi, ege eudige ererekri a barbori, “Iesu! Dawitara werem! Ma kari omarge nakai!” 48 Ege gair legize etapereta a abi detagerda, “Ma mirkak emri.” Ege auka aler ko babori, “Dawita weem! Ma kari omarge nakai!”
49 Iesu ekeidari a abi mir detauti, “Wa abi kei dabgerare.”
Ege able le ge urder sadmer le dabgerda. Wi abi detagerda, “Ma sererge akai, a ekei! E mari tarabgeli.” 50 Ege tabara gemwali adem igida, aududumdudum ekweida, a Iesuim bakiamuda. 51 Iesude eudige abi itmerda, “Ma nalu laglag nali kaka marim akerer?”
Ege abi sadmer kimiaride detagri, “Erwerle, ka laglag nali lea koka dameri.”
52 Iesude abi detagri, “Mari owaturide mari nakaidari sikak baidari. Ma umele bakiamu.”
Ege keko able kimiaret umele wadasmeri, ege eudige Iesuidoge atabemeda ga bakiauda.