13
Iesude Detauti Au Zogometa Ya Obatkoare
MRK 13.1-2
Nade ga Iesu au zogometalam eosmerer, netat le abi memeglelam akaida abi ikaidari, “Erwerle, ma able aukaka bakir darasmerare! Ma able debe aukaka meta darasmerare!”
Iesude abi ikaidari, “Wao able gergerge mama able aukaka meta pema darasmerda, e nole ya netat bakir obariare tumem nerut lege ableglam yabi gair ya adem obakriare.”
Adud Ya Wanagri A Atkoatko
MRK 13.3-13
Nadege Iesu imireder Oliwa Paserge, Peteru, Zemis, Zone a Andru no wi tebteb abim tabakiaudare. Wi taba abi itmerdare, “Ma kerbi detagridare, na kekerge ya able lu obakerare, a ma kerbi detagridare nalu ya atamilam obakerare le wanatomertare gair able lugira ya mop maike wanagri.”
Iesude yabi daratagridare, “Wa okeoke uridwa ableglam le ya laglag waurder wabi okawadirdarlare. Le ya kari neige watabakeslare waditautlare, “Kaka peka Keriso nali,” a wi gair le okawadarardalare.
Wa nole bazigmuaretwa nade wa ares mir asrawem a nade wa au gedira mirpuipi asrawem wi tabara barseda. Able lu ya obakelare wi nole atamilam wanagriwerteda able gair lugira mop maike wanagri. Au ged gize ya wader au ged wanareslare, a balsaia gize ya wader basalaia wanareslare. Gesep ya obaskered wader utebge. Wader au gedle ya nole lewerkak waurder. Able lu ya obakerare mokakalam pe kikem kebi asiasi waike werem pa keubu weosmer.
Wawa uridli wa okeoke uridwa. Wabi ya wadireplare a tag waimariklare a wadaislare kotem. A wabi ya sunagoge wadamriklare. Legize ya wabim tag waimariklare siramile a gesep ople opem ableglam wawa kari narmireda, a wabi ya wadikelare wa yabi Debe Mir daratagerlare. 10 Debe Mir ya kikem wairemlare able leem pe gair gedge uridli.
11 Nade wabi wadireplare a tag waimariklare kotge, waba nole okasosok obarkawem keubu ya kerker watabaruk wa nalu ya detautlare. Nade ya kerker watabaruk, wa detautawem nalu mir wabi Lamar Zogode wadaiswelare, ableglam able mir wa ya detautlare nole wabialam; wi ya wanagriweretlare Lamar Zogolam.
12 Legize ya tabara barada wanaislare yabim apitem, a bab gize ko, tabara omaskir wanaislare yabim apitem. Omaskir ya nole taba bab a apu sasrim lagkak waurder, a wi tabara bab apukem wanaislare apitem. 13 Gair le ya nole lagkak waurder ableglam wawa kari namireda, na le wabialam ya mena wadawer mena mop watabaruk ei idid watakai.”
Aukaka Adud Lu Detkoidemaiserti
MRK 13.14-23
14 “Pe dikeredi, nade wa dasmerawem able Aukaka Adud Lu Obatkoare Obamaisertare waikwereder pe nole sikak ikeredi e waikwei,” (wa umele uridwa e nalu detauli) 15 ege able le ge Iudaiage urder wi laglag sikak waurder ya adem obakiauare paserem. 16 Kimiar ya taba meta totge waigereder abra umerkak kerker waikereder ese e adem obakiamu oba taba metage tabara amiwali (watikau). 17 Able koskir pe kemkem uridli ya waurder able kerkerge, a able koskir ya kebi omaskir omaskir waurder wi aukaka asiasi wadigilare. 18 Adim erkepasamwa able lu ya umerkak obakerare nade ya gebgeb kerker wairdireder, 19 ableglam able kerkerira le ya asiasi wadigilare aukaise ya wader legize wadigilare, able kerkerlam ge nade Adide gesep detagmi mena able kerker pe irdiredi. Keub kerkerge nole ya nerut lu ko able orwairorwair waikereder.
20 Ege Adide no able gerger ikeri teopai baida mokakalam tuprik. Ese e nole able waikeri, le ya umerkak idid wauridli. E able tuprik ikaida teopai baida able leem ge e natutirda. 21 Nade able kerker ya watabaruk, ese legize wabi waditagerlare, “Kei bager Keriso pedali!” a “Kei bager e itadali!”, wi ya besle waurder. 22 Bes Keriso a bes peropeta ya waurder wi ya atamilam waikelare a wader lu ya waikelare le wanakelare wi obazigmuarter, ya waiakai wi umele able le okawadaradalare ge Adide itutri, ese wi umele able lu waikelare. 23 Wa okeoke uridwa! Ka wabi gair mir peka detagreda keubu ya kerker watabaruk.”
Nade Ya Lera Werem Watabakiamu
MRK 13.24-27
24 “Keubu able gair okasosok ke, able kerker watabaruk lim ya waiakai kupkupi kupkupi obai, meb ya wakai bikak obai, 25 wer ya watabatwer milam, a able au kelarkelar lu kotorge ya watabaskered.
26 Keubu, legize ya Lera Werem wadasmerare ei bazge watabakiamu au sasrimsasrim a zoromzorom. 27 E angeia ya wanamarkare kemerkemer gespge able le wanatkimdare ge Adide itutri gair gedlam.”
Wa Utkak Uridwa! Erkepeskawem!
MRK 13.28-31
28 “Wa Omilam berwerawem. Nade abra tarn obaker gebgeb ober a abra lulam obatiare, wa umele uridwa Koki kerker ya maike obaruk. 29 Able orwairorwair, nade wa dasmerawem able lu ga obakelare, wage umele uridwa kerker pe maike dikeredi. 30 Kaka wabi agekar detagreda, able lu ya kikem obakelare keubu ya able le obaum. 31 Kotor iba gesepei ya obasmauare, kara mir ya umerkak obasmauare.
MRK 13.32-37
32 Le nole umerkak uridli na gergerge ya able lu obakerare. Angela muige kotorge a Werem pa dali wi nole umerkak, no Bab tebteb umele dali. 33 Wa utkak uridwa! Erkepeskawem! Ableglam wa nole umerkak na kerkerge ya able lu obakerare. 34 Able paikai pe dikeredi mokakalam kimiar obakiamu au muris gedim. E kikem tabara memegle sasrim wanaiswerare ko tabara dorge waikelare, a e asesered le waditager e mena utkak wadawer a erkep waisker. 35 Wage eskepeskawem ableglam wa nole umerkak uridli na kerkerge lukem le ya ko metaem watakomer - kiki limge, eipkige, idim kakarge, lim aupamaretge. 36 Ese e keserkeser watakomer nade ma ya ut naoperider e ya mari wanardar. 37 Ka wabim peka able mir detautli a gair le pa uridli: Wa erkepaskawem!”