4
Gedublera Mir Abisir Mir
MRK 4.1-9
1 Iesude ko dirmisidan le nerwerlare ni keper tawerge. E bakiamuda narge akawerti muige temrida ableglam lera nikidetreder taba abi deirumareta auka mitkar. Able nar gurge eper, a able lera ge nikidetreder ge wege ekweider maike gurge.
2 Ege gair lu nerwerlare mir abisir mirge. Nadege e yabi nerwerlare ege detainer,
3 “Wa asrare! Geduble bakiamuda tabara luneg kep wairti.
4 Nade ga e kep diger muige gedubge, wader batwerer gabdege, ge ebur gize narolare.
5 Wader kep ge batwerer neidneid sepge, ge nade nole mamor sep imireder. Able kep aududumdudum baperigdarda ableglam neidneid sep imiredi.
6 Nage ga lim teupamada, able luneg natitida batrauda. Wi aududumdudum baumi ableglam yaba sip nole au muige daramarwerteda.
7 Wader kep batweri iukazge wige yabi daramisirda, a wige bomi nole agegkak.
8 Ege wader kep ge batweri debe sepge. Wi baperigdarda, a bomi a ageg bakerda; waderlera kepkep ageg daragriweretlare, waderlera kebi mitkarmitkar a waderlera aukamitkar.”
9 A ege yabi daratagerda, “Able mir pe dikeredi gair legize wasrawem a mamor waikedrawem tabadoge.”
MRK 4.10-12
10 Nade ge Iesu tebteb dawer, wader abra armirle tabakiauda abim, kemem abra memegle a abi itmerda, “Ma sikak mir abisir mir ko detaut.”
11-12 Iesude yabi daratagerda, “Wabi ge gumik daiswerda Adira Basalaia. Nade pe wader adge turidli gair lu asreda muige mir abisir mirge. Able korepge, wi ya erkep waigreder a nole momor wadasmerlare; wi ya wasorlare a nole waikedilare. Ableglam ese wi ya barkak wadasmerlare a waikedilare wi ya ko watabatare Adim a e yabi ya wadaramaiderdare.
Iesude Sikak Detauter Gedublera Mir Abisir Mir
MRK 4.13-20
13 Ege Iesu eudige akaidari yabi daratagerda, “Ese wa nole able mir abisir mir wabidoge ikedilare, wai umerkak gair abisir mir wabidoge idaglare.
14 Able gedublelut Adira Mir wadirit.
15 Wader kerkerge able kep batwerer gabdege; able legize pe mir asreda epe keko Satana tabakesli yabialam able mir adem aisli pe yabidoge barteda.
16 Wader kerkerge able kep batweri neidneid sepge; able legize pe mir asreda a keko irmireda sererserer.
17 Epe no omeili kelarkak sipsip yabidoge, a wi no waurid nole niaikak a yako obaum. Nade ya asiasi wanagri a nade ya yabi wanareslare abieglam wi able mir irmireda, wi aududumdudum obako able mir asorlam.
18-19 Wader kerkerge able kep batwerer lukazge; able legize pe mir asreda epe gair akepwar able gesepira, bodom bakirlag a gair debelulag niki yabidoge detredi a daramisreda able mirlam, a wipe nole agegkak uridli.
20 Wader kerkerge able kep batweri debe sepge; able legize pe mir asreda a ikadareda a yaba ageg bakeri: wader kepkep, wader kebi mitkar a wader aumitkar.
Lampa Lewer Kobar Atkamatkam
MRK 4.21-25
21 Iesude yabi daratagerda, “Nade wa lampa dirsirkare, nako wa sepge demargerare wa lewer kobarlugu etkamare? Nako wa sikge sepge demargerare? Nolekar, wai ikairare lampa agimur luge demargerare.
22 Nalu lu pe nasibwerteda ya wadaratkiare, a nalu lu atkamatkam nagriwerteda e ya wataraisare bige obos.
23 Abie mir pe dikeredi gair legize wasrawem a wige waikedrawem.”
24 E ko yabi daratagerda, “Wa able mir dikepwararwem pe wawa asorda! Ese wa able mir dikepwalare, waba ya bodomalam waikereder able luglam a pako wader lu pa nagriwerteda.”
25 Na lera pe nalu nagriwerteda ya yabi aumitkar obaiswerare; na lera pe kebikebi nagriwerteda yaba kebikebi ya adem obais.”
Mir Abisir Mir Able Kepira Ya Waomeirer
MRK 4.26-29
26 Iesude ko yabi daratagerda, “Adira Basalaia mokakalam ikeredi able le e tabara gedubge kep irti.
27 E mena kige ut ipereder ege idimge ekiamda, able idimge ge kep baperikdarda a bomi. E nole umerkak wi nako bomi.
28 Able sepide tababu ikeri kep bomi a ageg bakerda; kikem yaba wai bomi, lusik ga bakerda, ageg ga keubu bakerda.
29 Nade ageg neu bakerda, able gedublelut kemerkemer lu adem ismi a ageg adem etkori ableglam nur kerker itutidari.”
Mir Abisir Mir Able Mastad Kepira
MRK 4.30-34
30 Iesude ko yabi daratagerda, “Mi nako Adira Basalaia sikak datautare? Nalu mir abisir mir mi akerare ei able Basalaia merbi waditomeretiare?
31 E dali mokakalam mastad keb pe kebi kep dali able gesepge.
32 Nade ma abi emor sepge, ei ya waiomei wakai aukaka lu obai muige gedubge. Abra au tarn obarmare, a ebur ya watabakeslare abi tarn mudge obagrier.”
33 Iesude tabara able marauermer leem mir abisir mirge mokakalam pe nagriwerteda; e yabi daratagerlare able piripiri wi umele tabadoge waidaglare.
34 E no yabi daratagerlare mir abisir mirge; nade e ga tebteb dawer taba memeglekem ege yabi gair lu daratagerlare.
Iesude Au Wag Demegri
MRK 4.35-41
35 Able kikem Iesu akaida tabara memegle daratagerda, “Mi nabakiaware ge mi nerut pek gurge.”
36 Wige bakiauda able narge batri ge nade Iesu ikawerteder a ga bakiauda atiem. Kep kep wader nar yabidoge bakiauda ege lera kub ge no dirgi.
37-38 Muige nar korge Iesu amazge utipereder. Ege aukaka wag bamrida, zeuber bakwer a baraplare nar etatkolare able nar akaida noga gur digmer. Ege memegle gize Iesui utlam itirda a abi detagerda, “Erwerle, ki nabaume. Ma kerbi upiditidarare ese ma kerbi omarge dikereda.”
39 Ege Iesu ekweidari eudimge wagiba zeuberei daraisumdari, “Wa temrilam! Wa mapodan bailam!” Ege wag ekemuda a gur akaida mapodan baidari.
40 Ege Iesu akaidari tabara memegle daratagerda, “Wawa geumge bakeli abielam waba owatur kebile ikeredi.”
41 Wige bazigmuarti a tabara baotmerlare, “E nalu orwaiorwai le pedali? Wagiba zeuberei umerkak wader le wanasware wipe no abi asriei.”