7
Lugizira Erwer
MRK 7.1-13
1 Wader Parisaio a Aotarle wi Ierusalemalam tabakiauda taba ge etami Iesui dairumareta.
2 Wi wader Iesura memegle nardarda taba lewer erolare wi nole tabara kikem tag N og natkirda' (able orwairorwair Parisaiogize waikereda).
3 Parisaio a gair Iudaiale wi able erwer wairmireda taba lugizlam: wi gair kerkerge tabara tag ogwaitkireda able barkak tonarge,
4 a gair kerkerge wi tababu og obatkirieda nade wi watabakomerti tamalam keubu wi lewer wairoda. A wi wairmireda mitkar wader erwer yabi lugizlam ablegise barkak tonar nako ma pankin og waitkiri, lewer akasirlu, a wader lewer arotlu a amrirlu pa nagriwerteda.
5 Wige Parisaio a Aotarlegize Iesui itmerda, “Naluglam mari memeglegize nole able erwer irmireda pe merbi lugizlam nagriwerteda? Wi naluglam lewer erweda ogog tagtag?”
6 Iesude yabi daratagerda, “Isaiade agekar detauti nade e wabialam detauter norgornorgor dorgelelam. Isaia ditari, “Adi detauti, Able legize no kari mirge nauspireda, wipe nole kari lagkak uridli.
7 Wi kari isorgiru epe nole karim abkorep ableglam wi tabara bar bar geiar ermeda a le nerwereda wipe nole Adira geiar le nerweredaf
8 Wa Adira geiar ikereda netat pek idageda, wape no lera erwer irmireda.”
9 Iesude yabi daratagerda, “Waba erwam tonar nagriwerteda wa Adira geiar detwakeda ya waiakai wa waba erwer irmirlare.
10 Mosede aukaise detauti, “Wa wabi babiba amaei nasrawem” a “Wage gair le eudem nasrawem pe netiba tabara babiba amaei darasawersireda.”
11-12 Wape no wa le nerwereda ese yabi babiba amaei laglag wadaralei wader lu yabialam, wi yabi wadaratagerlare, “Wai babiba amaei, able lu pe 'Koban' ikeredi, e Adira lu ikeredi. Ka umerkak wabi dakware,” epe able kerkerlam pe ditimeda ma nole abi ikaidari e taba babem a amaem waikerer.
13 Able to narge pe dikeredi waba erwer, wa pewa ebrerdeda wabidoge, epe akaida Adira mir dikaidari derekak ya waikereder. A wape mitkar wader lu ko wa ikereda able orwairorwair.”
Able Lugize Pe Le Nakereda Seksek Uridli.
MRK 7.14-23
14 Iesude ko lera kub darabgerda tababim a eudige yabi daratagerda, “Wa gair legize karim irispilare a wage mirem mamor wabi idonige ikedrare nalu yaka dataute.
15 Nole ko lu ikeredi e le waikai seksek obai nade able lu obakiamu abi gemge obau. Nolekar. Able le pe akaidari seksek baidari pe nalu abialam adem eosmeda.
16 Wa gair legize able mir erpeirare a wabidoge ikedrare!”
17 Keubu Iesude lera kub darakaireta a bakiamuda metage badari, abi memeglegize abi itmerda able mir abisir mirlam.
18 Iesude yabi daratagerda, “Aise! Nako wako uridli able mir nole wabidoge ikeredi? Lu adlam bakiauda le gemge barti nole yabi nakerda seksek berda,
19 ableglam able lu nole barti bakiauda yabi idonige. Wi bakiauda kemge a mena bakiauda adem kemlam bausi.” (Nade Iesude able mir detauti, e yabi natomeretlare able gair lewer pe nagriweretlare legize umele wairolare).
20 Iesude ga ko detauti, “Nalu lu pe lelam adem eosmeli abi ikeli seksek beli
21 ableglam muilam, le nerkeplam a idonilam pe eosmeli adud akepwar, a kogem, a erwamem, a le apit, erwamem nerut lera koskir a kimiar,
22 gair lu no mara wanagriwertawem, seksek idoni mara waikereder wader leem, besmir, adud mir, debelulag, besmir wader le daratautlare, baospirer, a paimpaim tonar.
23 Gair able au adud lu pe teosmeli le muilam yabi nakereda seksek beli.”
Ponesia Koskirira Owatur
MRK 7.24-30
24 Ege Iesude able uteb dikairti a bakiamuda able utebem ge maike au utebge irdireder abra nei dikereder Taia. E bakiamuda metage badari a e nole lagkak dawer le umele oberda e ge dawer: e umerkak wadali wespili.
25-26 Koskir ge able utebge dawer Girisle: e ge eosmeda au utebge abra nei dikereder Ponesia pe Siriage irdiredi. E tabakiamuda Iesuim a abi opem kokmamu emrida e Iesuim bagwi ko dimoni adem waismeda abi neurlam.
27 Ege Iesude abi ikaidari, “Ka omaskir kikem darasisiare. E seksek ikeredi ka omaskirira lewer adem takalu kai kei ka omaiem nabataweredlu.”
28 Ege able koskiride abi ikaidari, “Ople, able omai pe erdedi wi umele omaskira puipi lewer wairware.”
29 Iesude able koskir detagri, “Ma barkak detautli; ma bakiamu gedim mara neur terdar ableglam dimoni emetu abialam eosmeda.”
30 Nadege able koskir bakiamuda gedge ege tabara neur terdari mapodan sikge ipereder dimoni ge emetu eosmeda.
Iesude Asorkak A Mirkak Kimiar Idgiri
MRK 7.31-37
31 Ege Iesu adem bakiamuda able gedlam ge maike Taiage naridweretlare. E nerut au uteb gabem bakiamuda abra nei dikereder Saidon a no bakiamuda able ged gabem abra nei dikereder 10 Uteb mena Galilaia Nikeperge.
32 Ege kimiar ge dawer nole asorkak e umele no kebikebi mir waditauti. Kepkep legize able kimiar tigareda Iesuim a abim bagoda e tabara tag abidoge wadikmerikda.
33 Iesude able kimiar erpeida ege abi adem datkimwarda yabialam ge le nikidetreder. Ge, ege tabara tagpim nakaidari ge able kimiar geripge namarikda. Ege eudige mos ikeida, a able kimiarira werut itutida.
34 Ege Iesu ga kotorem egremada, au ner batawerdi a eudige akaidari able kimiar ikaidari, “Epata”, able mir dikeredi, “Wa bauskilam.”
35 Ege keko able kimiarira girip bauskidariei a abra werut dakaidari sikak baidari: ege eudige mir detauti nole asikak.
36 Iesude eudige aukaise gair le ge daratagerda wi nole able mir waibrereda wader leem, wige nole asorda. Nade e yabi aukaise daratagerlare, wige able mir mena ebreredlare.
37 Gair legize ge netiba able mir asorlare wi bazigmuarter a wi gair legize abi dispirlare. Wi detautlare, “Gair lu e ikeli epe au debele nagriwerteda. E asorkak le nadgireda ya waiakai wi umele wasorlare, a e mirkak le nadgireda ya waiakai wi umele mir waditautlare!”