ROMA
Draft and Revisons by Fr Nagai Tabo, Peter Wickham, Revised Ken Passi, Alfred Gisu, K Noah, K Tapim 1988
8
MIZMIZ 8 NOSIK 12-23
12 Pedikeredi kara berbet, e no merbim dikeredi mi able tonar dakairtare nalu meriba witwit idoni laglag dali.
13 Ese wa waba adud akepwar irmirlare waba lamar ia weumi; ese wa no Lamar Zogo asorlare a waba adud tonar dikairtare waba lamar ia idid waurder.
14 Able le Agudi Lamaride daratkimwarteda Agudira omaskir uridli.
15 Able Lamar Zogo wa erpeidarda nole wabi dikerda geumgeum atriatri le berda; nolekar, e wabi dikerda Agudira omaskir berda. Abi Lamar Zogo sasrimge mi Agudim ererbakrili: “Baba kara Bab!”
16 Lamar Zogo a meriba lamar okakise merbi detagreda paretkak mimi uridli Agudira omaskir.
17 Mimi uridli Agudira omaskir a mi ia mi tarperare Kerisora werkab abi doge. Mi ia Kerisora zorom nabagarare ableglam mi asiasi digieda mokakalam ge e diger.
18 Kari doge dikeridi mi asi digieda pe mi able gergerge no kebi kakale nagriwerteda ia able zorom merbim waike paretkak.
19 Gair lu Agudi detagem dikaireda erkep iskeda Agudim e tabara omaskir wanatomertare.
20-21 Gair lu Agudi detagem bakeri atutirkak berda Agudi ubilam, nole tabalam. Agudide ko detaut gair lu Agudi detagem ia debele wanagri semersemerlam, a wi ia amisirkak waurder mokakalam Agudira omaskir ia amisirkak waurder.
22 Mimi umele gair lu Agudi detagem asiasi digilare mena able kerker pe irdi mokakalam koskir werem aosmerge wadawer.
23 A nole tebteb gair lu Agudi detagem; mimi netiba Lamar Zogo daragriwerteda (able kikem Agudira bodomalam merbim) mi ko mi merbibu moketmir digareda nawar mi dikaireda Agudide merbi kemerkemer waditakrare tabara omaskir a meriba gem waikai amisirkak obai.