121
Insān kā Wafādār Muhāfiz
1 Ziyārat kā gīt.
Maiṅ apnī āṅkhoṅ ko pahāṛoṅ kī taraf uṭhātā hūṅ. Merī madad kahāṅ se ātī hai?
2 Merī madad Rab se ātī hai, jo āsmān-o-zamīn kā Ḳhāliq hai.
3 Wuh terā pāṅw phisalne nahīṅ degā. Terā muhāfiz ūṅghne kā nahīṅ.
4 Yaqīnan Isrāīl kā muhāfiz na ūṅghtā hai, na sotā hai.
5 Rab terā muhāfiz hai, Rab tere dahne hāth par sāebān hai.
6 Na din ko sūraj, na rāt ko chāṅd tujhe zarar pahuṅchāegā.
7 Rab tujhe har nuqsān se bachāegā, wuh terī jān ko mahfūz rakhegā.
8 Rab ab se abad tak tere āne jāne kī pahrādārī karegā.