4
Mla ur kil wakrongen kweiur kweiur wrongwailet a knokg ti pa, kil wrongmnto a Maur Wailen
1 Nikgwalpm a kipm alm er tita kle tita pa kipm wi kai hai? Nikgwalpm a tolpa pa paln kahor ipmanikg alkipmen. Nikgwalpm a kipm wreitn arikowe, ak wakrongen kweiur kweiur wrongwailet, akwonalmpen kuina ur wailet, nikgwalpm paitn a tolpa pa ak rkoln tita arpm kahor ipmanikg alkipmen pa, yatom kipm alm er tita kle tita pake.
2 Ipmanikg a kipm pa wreitn arikowe kweiur kweiur wrongwailet a atn knokg ti, pake ake wa kipm wi, tolpa yatom kipm alm melnum mo pa. Kipm kwarkwaren kweiur kweiur a kmel ur, ari ake wa kipm wi, yatom kipm kle er tita pa. Ake kipm wi, ekg nte, ake kipm ropon Maur Wailen pa.
3 Kipm ropon, pake ake kipm wi, ekg nte, kahor nikgwalpm alkipmen pa kipm akwonalmpen tolpa kipm akal wi kweiur kweiur ekg aklin kipm alkipm ti tolti hute.
4 Kipm wakrongen kweiur kweiur a knokg ti, pa kipm uk yirokg Maur Wailen. Pa kipm ntekg paitn tukol kin a nuhurn kpman alkil om kai wi kpman ur pa. Kipm ari aki kalpm e? Nikgwalpm a mla ur kil ark wail ekg kweiur kweiur wrongwailet a atn knokg ti pa, kil pa wrongmnto a Maur Wailen.
5 Yangkipm ur a hel kai wurkapm a Maur Wailen pa la tolpa, “Maur wor a kil elntarpm kahor ipma alpmenen ti pa, kil lawen ekg arpm hor hanekg ekg kil alkil wrij.” Yangkipm a Maur Wailen ti a kipm atning pa, yangkipm kalpmel ur tolti aki? Pa kalpm, pa yangkipm aklahle.
6 Pake ipma rein a Maur Wailen rein mento pa wailmanten paitn, tol a wurkapm alkilen pa la, “Tol melnum ur a kil kat nang alkilen pa, al Maur Wailen kil ukwel yirokg. Melnum a kil arku kil alkil pa, Maur Wailen kil rein aklinjel.”
Kipm arku kipm alkipm hor hanekg ekg Maur Wailen
7 Tolpa ti kipm rku kipm alkipm hor hanekg ekg Maur Wailen, ekg atn titnongket talpuln Maur Paitn Satan pa, ekg al kil kark kai tukuleinjepm.
8 Kipm kai yampingken Maur Wailen, om Maur Wailen kil kul yampingken kipm! Kipm melnum a ntekg paitnpaitn pa, kipm klak wam a kipm pa! Kipm melnum a nikgwalpm wekg pa, kipm elnten nikgwalpm paitn pa, om kipm rkul nikgwalpm wor pa ye itn!
9 Kipm a arpm ipma utopen pa, kipm irpm ipma kalkut om! Ampur kipm nmpa, kipm hakg rein paitnpaitn a kipm ntekg pa om!
10 Kipm rku kipm alkipm pa hor hanekg ekg Maur Wailen pa, ekg al kil kat nang alkipmen.
Ampur kipm la paitnel melnum ur
11 Kipm yanipopm muitnwar alkupm, ampur kipm la yangkipm paitnel ekg tita. Tol melnum ur a kil la paitnel melnum ur pa aki ari klon melnum ur pa, pa kil la paitnel yangkipm titnongket a Maur Wailen pa, wa kil la yangkipm titnongket akil pa paitn. Tol kil la yangkipm titnongket a Maur Wailen pa paitn pa, kil ake komkiti yangkipm titnongket a Maur Wailen. Ti kil paln tol melnum wail a ari klon yangkipm hai wor, yangkipm hai paitn.
12 Maur Wailen kil alkil kil hi arpm atning yangkipmek amen. Kil alkil kil yiprokgen a yangkipm titnongket wrongwailet, wa kil alkil wrij a ntie ekg ntekg yangkipm. Kil alkil kil ntie titnongket ekg ak wi melnum pa ye kul wor aki ak kwan melnum pa ye kai paitn. Ti kil apm tolpake. Ti kitn ropon mla yatom kitn arpm tol melnum a arpm atning yangkipm a melnum ur pa la tolpa, kil pa wor, aki wa arpm atning yangkipm a melnum ur pa la tolpa, kil pa paitn, tolpa ake wor.
Ampur kipm la tolpa kipm arpm ak wakrong a kipm alkipm pa
13-14 Kipm tiur pa kipm la tolpa kipm arpm ak wakrong a kipm alkipm, yatom kipm la tolpa, “Am aki hikg pa kupm kai ha wail ur ai, arpm tol wring wrij ur, kor kwap ekg akal ak kwap marpm wail ur ai.” Kipm pa itning om, kipm ari kipm hikg arpm aki kalpm e? Kipm pa tol hu yiprak a ngko ak kang pa, takgni no almpen pa, apm kai tngklak ase. Ti kipm apm tolpake. Kipm arpm waitketn tolti, apm mo ase.
15 Tolpa ti ake wor ekg kipm la tolpa. Pa wakrong a Maur Wailen alkil ai. Kil la ekg mento ntekg kuina ur pa, mento ntekg. Tolpa ti kipm la tolkil, “Tol wakrong a Wailen alkil pa, hi wa mento arpm knokg ti watin, ekg ntekg kweiur kweiur aur aur arpm knokg ti pen.”
16 Ari ake kipm la tolpa, kalpm. Kipm akwonalmpen kipm alkipm ti tol kipm ntie titnongket. Ake wor ekg melnum ur kat nang a kil alkil. Tolpa ake wor.
17 Ti kipm ikwonilmpen kil worwor: tol melnum ur kil ari kweiur kweiur wor ekg akal kil ntekg, pake ake wa kil ntekg, pa kil ntekg paitnpaitn.