4
Yirise bwore topoꞌe yipihinge homboꞌe
1 Lenge miyeꞌ yaŋam ŋam, ŋoihmbwaip yip yukur ka teŋeime lenge mitiŋ lalme ŋaiye yanange nange tinge si yambaꞌe Yohe Yirise, na pakai. Tehei kin taꞌe leꞌe, lenge profet homboꞌe si yate yarp yalꞌe yalꞌe kekep eꞌe. Kom te yiyarꞌe bworerme sande tekeꞌe tinge nange yipihinge ŋaiye sai me tinge li, kin natme Got lakai?
2 Leꞌe tehei kin ŋaiye yip pa sisyeme bworerme nange luku yipihinge tikin Got. Lahmende ŋaiye ŋanange ŋoworꞌe ember naŋ Jisas Krais ŋaiye kin nat taꞌe miyeꞌ hiꞌ pe, Yohe Yirise tikin Got narp nato kin.
3 Kom lahmende ŋaiye ŋinise naŋ tikin Jisas pe, Yohe Yirise tikin Got yukur narp nato kin. Detale, yipihinge homboꞌe liki kin natme miyeꞌ pupwa ŋaiye somohon yip yasande nange ka ote ende wachaihme Jisas pe, liki tukwini tinge si yate yarp yalꞌe yalꞌe kekep eꞌe.
4 Kom lenge talah ŋam, yip tikin Got pe, yip si yengelyembe lenge profet homboꞌe. Detale, yipihinge tikin Got ŋaiye narp nato yip kin bongol nengelyembe yipihinge tikin Satan ŋaiye narp nato lahmende ŋaiye tititinge kekep eꞌe.
5 Lenge profet homboꞌe tititinge kekep eꞌe pe, tinge yanange wusyep me ŋaiꞌe ŋaiꞌe ŋaiye sai kekep eꞌe ti, lenge miyeꞌ tuweinge yasande wusyep tinge.
6 Kom poi tikin Got. Lahmende ŋaiye sisyeme Got pe, tinge ka yusyunde poi. O lahmende ŋaiye yukur sisyeme Got pe, yukur ka yusyunde poi. Taꞌe luku pe, leꞌe tehei kin ŋaiye ya sisyeme moworme ŋaiye yipihinge tikin Got mise narp nato kin, lakai yipihinge pupwa homboꞌe narp nato kin.
7 Lenge ŋimei ŋam! Poi ya lalme mende nihararme lenge mitiŋ lalme, ŋahilyeh tuꞌe ŋaiye Got ŋende nihararme poi. Lahmende ŋaiye ŋoihmbwaip kin ŋende nihararme Kristen toꞌ tatai pe, kin talah tikin Got pe, kin sisyeme Got.
8 Kom lahmende ŋaiye ŋoihmbwaip kin yukur ŋende niharar pe, kin yukur sisyeme Got. Detale, Got kin tehei ŋaiye ya mende nihararme lenge miyeꞌ tuweinge.
9 Got kin nember talah esep kin ilyeh nate gah kekep eꞌe nange poi ya plihe tuhur laip ambaran. Leꞌe tehei kin ŋaiye Got pasam poi ŋoihmbwaip kin ŋaiye kin ŋende nihararme poi.
10 Tehei ŋaiye yende nihararme lenge mitiŋ syeꞌ pe, luku ŋoihmbwaip tikin Got. Poi yukur ya ŋoiheryembe nange poi mende nihararme Got yer, pakai. Got kin ŋende nihararme poi yer. Taꞌe luku pe, kin nember talah esep ilyeh kin nate gah kekep ŋaiye ka ongohe pupwa poi.
11 Lenge ŋimei ŋam, Got kin si ŋende nihararme poi. Taꞌe luku pe, poi ya mende nihararme lenge mitiŋ.
12 Kom yukur lahende ŋetekeꞌe Got. Ŋaiye poi mende nihararme lenge toꞌ tatai poi gwande ŋasande tikin Got pe, Got narp nato poi. Yaŋah tikin Got ŋaiye ŋende niharar lenge miyeꞌ tuweinge syeꞌ pe, luku si bongol gerenge sai nato laip poi.
13 Taꞌe luku pe, poi si sisyeme nange poi marp ma moto syep kitikin, topoꞌe kin narp nato poi. Detale, kin si pwal poi Yipihinge kin.
14 Pe poi si metekeꞌe, topoꞌe poi manange wusyep me Yai ŋaiye si nember Talah kin nate gah kekep eꞌe no, kin ka Miyeꞌ nungwisme poi.
15 Lahmende ŋaiye kin ŋanange wusyep nalꞌe nalꞌe nange Jisas kin talah tikin Got pe, Got narp nato kin, topoꞌe kin narp nato syep tikin Got.
16 Taꞌe luku pe, poi si sisyeme ŋaiye Got ŋende nihararme poi miyeꞌ tuweinge tikin kekep. Pe ŋoihmbwaip poi teŋei mise nal ŋoihginir tikin Got pe, Got kitikin tehei ŋaiye ŋende nihararme lenge miyeꞌ tuweinge. Taꞌe luku pe, lenge miyeꞌ tuweinge ŋaiye yende niharar lenge toꞌ tatai pe, tinge yarp ya yoto Got, topoꞌe Got narp nato tinge.
17 Ŋaiye poi marp ma moto Got pe, yaŋah ŋaiye yende nihararme lenge toꞌ tatai pe, ki tahar ŋembere sekete. Taꞌe luku pe, yukur ya hiꞌgwirnge ŋupe ŋaiye Got ka ende wusyep kot me lenge miyeꞌ tuweinge. Ya gwin bongole mil ŋembep kin. Detale, ŋupe ŋaiye poi marp kekep pe, poi ŋahilyeh taꞌe ŋaiye Krais.
18 Lenge miyeꞌ tuweinge ŋaiye yende nihararme Got topoꞌe lenge toꞌ tatai ŋembere sekete pe, yukur ka hiꞌjirnge Got, pakai. Detale, hiꞌgarnge pe, tehei kin taꞌe leꞌe: Got ka ungwisme yitini pupwa elme hwap ŋaiye miyeꞌ tuweinge si yende. Pe ŋaiye miyeꞌ tuweinge ka hiꞌjirnge Got, yukur tinge yende nihararme kin supule.
19 Poi mende nihararme kin. Detale, somohon ŋendeheiyeh Got ŋende nihararme poi.
20 Ŋaiye lahende ka ininge na, “Ŋam mende nihararme Got”, kom kin garnge toꞌ tatai kin pe, kin miyeꞌ homboꞌe supule. O ŋaiye yukur kin ŋende nihararme lenge miyeꞌ tuweinge tikin Got ŋaiye kin si ŋetekeꞌe pe, yukur ka se ende nihararme Got. Detale, yukur miyeꞌ ende ŋetekeꞌe Got, pakai.
21 Taꞌe luku pe, wusyep erŋeme ŋembere ŋaiye Jisas pwal poi ki taꞌe leꞌe: Lahmende ŋaiye tinge yende nihararme Got pe, ka yende nihararme lenge miyeꞌ tuweinge tikin Got topoꞌe.