7
Lenge miyeꞌ tuweinge 144,000 Israel yambaꞌe wutuꞌ
1 Ŋaiꞌe ŋaiꞌe luku nat nal miꞌe pe, ŋam metekeꞌe lenge walip hlaꞌ miꞌ supule hoye hoye jan yal kekep tikih hoye hoye burumbur yonyorꞌme kekep. Tinge syep yarpe yohe hoye hoye yenge sai no, yukur tatame ŋaiye ka si yusupurꞌe kekep, loh pinip topoꞌe lou, pakai.
2 Pe ŋam metekeꞌe walip hlaꞌ ende nase nal ŋaiye ŋau ŋanah nat. Kin nenge wutuꞌ tikin Got, ŋaiye narp laip, nange ka alaŋatme lenge miyeꞌ tuweinge kin pe, ki wusyep bar marnge nal lenge walip hlaꞌ miꞌ supule hoye hoye pe, kin nangang lenge bongol, ŋaiye ka yende yumbune kekep topoꞌe loh pinip.
3 Te yenge si ti, ya monote wutuꞌ tikin Got yer mil nungup lenge miyeꞌ tuweinge kitikin lalme no, ya se sisyeme tinge ti, pa yende yumbune kekep, topoꞌe loh pinip, topoꞌe lou.
4 Miꞌe pe, ŋam masande miyeꞌ ende ŋana ŋam nange lenge walip hlaꞌ si yonote wutuꞌ tikin Got yal nungup lenge miyeꞌ tuweinge 144,000. Lenge miyeꞌ tuweinge leꞌe, tinge lalme yase bamtihei syepumbur umbur hoi titinge Israel yat.
5 Taꞌe luku pe, lenge miyeꞌ tuweinge 12,000 tikin bamtihei Juta, ŋaiye yambaꞌe wutuꞌ, topoꞌe bamtihei tikin Ruben 12,000, topoꞌe bamtihei tikin Gat 12,000,
6 topoꞌe bamtihei tikin Aser 12,000, topoꞌe bamtihei tikin Naptali 12,000, topoꞌe bamtihei tikin Manase 12,000,
7 topoꞌe bamtihei tikin Simeon 12,000, topoꞌe bamtihei tikin Livai 12,000, topoꞌe bamtihei tikin Isakar 12,000,
8 topoꞌe bamtihei tikin Sebulun 12,000, topoꞌe bamtihei tikin Josep 12,000, topoꞌe bamtihei tikin Benjamin 12,000. Lenge miyeꞌ tuweinge luku, tinge lalme yambaꞌe wutuꞌ tikin Got.
Wondoh embere tahar anah moihlaꞌ
9 Miꞌe pe, ŋam plihe bep mal pe, ŋam metekeꞌ lenge miyeꞌ tuweinge wondoh embere, ŋaiye yukur tatame lahende ka gonose. Lenge mitiŋ uku yase moiye moiye, topoꞌe tinge bamtihei ilyeh ilyeh kekep eꞌe, topoꞌe wusyep ŋimeser lalme, topoꞌe wahriꞌ ilyeh lalme sungul ya jahilyeh jan ŋembep tikin Miyeꞌ, ŋaiye narp luh yilihe hindi Worsip Talah. Tinge lalme dendeꞌ hihyilih wukauwe, topoꞌe tinge ilyeh ilyeh yenge kakah mwimwai sai syep tinge.
10 Tinge tambah mah yal hlaꞌ yanange na, “Got poi, ŋaiye narp luh yilihe kitikin, topoꞌe Worsip Talah, tinge hindi yungwisme poi.”
11 Pe lenge walip hlaꞌ lalme jan yonyorꞌme luh yilihe, topoꞌe lenge miyeꞌ ondoh embere yotop lenge walip hlaꞌ miꞌ supule hoye hoye ŋaiye yarp laip. Tinge lalme luku ya jah tumbuhuroroꞌe yate pe, tinge yahraꞌe naŋ tikin Got.
12 Tinge yanange taꞌe leꞌe,
Mise, poi ŋoih miꞌmiꞌ me nin, detale, nin yirise supule.
Sande tekeꞌe nin ka embere sekete.
Poi mirisukwarme nin, topoꞌe poi yale naŋ embere me nin,
topoꞌe nin ilyehe sai, nin Lahmborenge bongol sekete.
Nin ilyehe sai, nin Got poi, ŋaiye narp nye nyermbe. Mise.
13 Miꞌe pe, miyeꞌ ondoh ende ŋisilih ŋam na, “O mitiŋ mune leꞌe dendeꞌ hihyilih wukauwe leꞌe? Tinge yase la ŋai yat?”
14 Pe ŋam maname na, “Lahmborenge, ŋam yukur sisyeme, nin sisyeme.”
Taꞌe luku pe, ki ŋana ŋam na,
Lenge miyeꞌ tuweinge leꞌe,
tinge yambaꞌe mane embere tikin kekep eꞌe miꞌe pe, leꞌe tinge yat.
Tinge si yenge wim tikin Worsip Talah yungurhme hihyilih tinge
ŋaiye ka wukauwe.
15 Pe leꞌe tehei kin ti, tinge yate jan yonyorꞌme luh yilihe tikin Got,
topoꞌe nyermbe nyermbe ŋupe ŋau tinge yahraꞌe naŋ tikin Got
yarp yoto yukoh yirise tikin Got.
Miyeꞌ ŋaiye nyermbe nyermbe narp luh yilihe luku,
se ka orp embepteme tinge.
16 Yukur tatame ŋaiye nimbot ka ongomb lenge,
topoꞌe ka se yusyunde wonge salah
lakai ŋau ka oworꞌe nihe guh gut lenge, pakai.
17 Detale, Worsip Talah ŋaiye gan luh yilihe
se ka bepeteme tinge.
Topoꞌe ka se eleŋeime lenge enge el luh bwore,
ŋaiye pinip miꞌ supule nawe nangang lenge laip.
Pe Got ka ihyete bepinip upwaihme ŋembep tinge pe,
ŋembep pinip tinge ka miꞌe ko.