10
1 Zep aya-wal oso-wal, ëe ama tangan dwam gweꞌan– ano zi ausu nakore zini kïtak de sap ëngaya gwen hap. Zen in zebë enlala zon tasïblïn naban Alapsa aberbe ta tine gwenan.
2 Ëe eiwa denakaë emsa gubiridaꞌan: Yahudi zini in sap eiwa Alap mo syal hap syal-syal tanganna. Hwëna zëno mae mo syala in, men kirekam angkam Alap goltreizimꞌira, zen diki desan maka ang taꞌan.
3 Sap zen hom Alap zëre onak dikim ëdakastïn hïp de ora ësena dam dasïꞌïn. Zen hwëna zëre mae mo enlala san ëpba tïtï tabin ol enna insa kyang-kyang nulsuk tine gwenan. Zen in zep Alap mo ora ëse zertreizimdin sin de ang tan hap baes ta gweꞌan.
4 Sap Kristus mes nëbe mae hap Musa mo tïtï tabin ola insa sul sonezimki. Zep tïngan men zene angkam Kristus ensa laïblïblaꞌan, zen dekam zebe Alap mo nwenak ëdakastïꞌïn– tïtï tabin ola insa de enlala gwibin srëmkam.
Mae hap de ol: Tïngare zi ausu nakore zini, men zen en de Kristussu daïblïblaꞌak, zen zen sa ëngaya gwer.
5 Hwëna Alap mo nwenak de ëdakastïn hïp dena Musa mo olak man lwak,
“Men zen de ano tïtï tabin ola an san sul sonenkam ang ta gweꞌak, zen zen en sa hëndep denaban ëngaya gwer.”
6-7 Hwëna Alap mo olak, Zënaka de taïblïblankam de zëre mo nwenak ëdakastïn hïp dena man hen lwak,
“Em home auhu-kama tim niban de ngatan zi mo lang san de tëblan hap ëdwam gweꞌan.
Hen juwen zi mo lang san de tëblan hap hen home ëdwam gweꞌan.”
Alap mo olak de gulk sun ol blaoranna in mo dam gulsunnu a kirekam moye: Em home ëdwam gweꞌan– Kristussu de ngatan zi mo lang nakon zerati gwezan hap, ahaksa juwen zi mo lang nakon de zerta gwe sezan hap, Zen dikim ëngaya gwen hap emsa mas gwibiridan hapye. Sap Kristus ebon mae onakon langanak hom.
8 Sap em dikim ëngaya gwen hap dena, zen Kristussu de taïblïblan en nakon– ëe men kirekamë ol dawemna ol halada gwenanke. Zen zep Alap mo olak anakan lwak,
“Ol dawemna in, ba hap de langa san teibin hip? Zen ere mae mo ëk tïhïnak hen enhonak am lwaꞌan.”
9 Sap em de ere mo enho nakore taïblïblanna insa zi mo inik anakan kira gunnu, “Yesus Zen ano Teipsïnnï,” hen enho nakon de anakan taïblïblanna, “Desa eiwa mes Alap tïn nïkon ngaya taka,” ki em hen esa ngaya gwera.
10 Sap em de enho nakon taïblïblankam, dekam em mese Alap mo nwenak dakastïlïda. Hen ere mo taïblïblanna insa de zi mo inik kira gunnu, dekam em mese ngaya gwenda.
11 Sap Alap mo olak man lwak,
“Men zen de Biansa daïblï gweblaꞌak, zen molya anakan ëenlala gwe-gwek, ‘Ëe an waba habë taïblïblak.’ ”
12 Alap mo kirekam de gu-gubiridanna in, zen kïtak de zi hip dena– sap Yahudi zi, sap hen Yahudi srëm zi. Sap zëno mae mo Bianna aha-en, hen men zen Desa abe da gwenan, zëbe mae hap man dawemna mamkam gol gwizimnira.
13 Sap Alap mo olak anakan lwak,
“Men zen Biansa anakan abe daꞌak, ‘Asa em ngaya tan,’ zen zen sa ëngaya gwer.”
14 Hwëna zini banakan sa abe da gwer?– zen de nama taïblïblan srëmkamye. Hen banakan sa daïblï gweblal?– zen de nama zëbe hap denaka ësane gwen srëmkamye. Hen zen banakan sa zëbe hap dena ësane gwe-gwer?– zi de tonbiridan srëmkamye.
15 Hen zini banakan sa ol dawemna insa zëbon mae osan dep nolsong gwe-gwer?– Alap de zisi zëbon mae osan dep lup gul sonen srëmkamye. Zen zep Alap mo olak anakan lwak,
“Zini men zen Alap mo ol dawemna golhata zanna, zen isrip-sri gweblan tanganna.”
16 Hwëna ol dawemna insa nolhalada gwenan tïngare zini hom dokwak nul gwenan. Sërkam tangan Yahudi zi. Sap zen kire hap dena Yesaya Bak mo olak man dakastïꞌïn anakan in zen lwak,
“Bian, ëe insa eno ola ayang gul gwenan, hom dokwak nul gwenan.”
17 Sap Kristussu men zen daïblï gweblaꞌan, zen diki men zen zëbe hap de ol dawemna insa ësane gwe-gwenanke.
18 Hwëna Yahudi zi de ësane gwen hap dena banakarekam Alap mo olak lwak? San zen maka anakan ëgu gweꞌan?– “Alap, bahem asa karek tan, sap ëe homë ol dawemna insa sak.” Hwëna zen diki zen maka enlala hohle tan naban lowehe gweꞌan, sap Alap mo olak anakan am lwak,
“Alap de kïtak yang tabin hip de ola mes tïngan ëtawa gwendal.
Sap keis maesa de hlauludankam zen dekam maka Alapsa tame daꞌan.”
Kirekam de dam gulsunkum, ki zen maka hen Alap mo Kristus hup de hamal hap de ola insa dawemkam daïblïbik.
19 Hwëna san ha Yahudi zini Kristus hup de ol dawemna hom yap tame nuꞌin? Zen diki nonol zen maka tame nuk, sap nonol tangan Musa Bak zëbe mae hap Alap mo ola anakan ayang gulzimki,
“Ëe asa syal gwibir– em dikim Yahudi srëm zisi sïsngïn gwibirida gwen hap denaye, sap Ëe asa zëbe mae hap dawemsa golzim.
Hëndep em esa Asa de tame tan srëm zi ausuna insa jal eibirida gwer.”
20 Hen Musa mo hyanak etan Alap mo ola ansa Yesaya Bak Yahudi srëm zi hip dena damnak anakan ayang gulzimki,
“Zi ausuna men zen Asa dëbla srëm gwek,
zen sa hwëna Asa dam dasïl.
Hen men zen Asa tame da srëm gwek,
Ëe asa zëbe mae hap Ënaka zertreizim.”
21 Hwëna Yahudi zini abe mae hap dena Yesaya Bak sap anakan ayang gulku,
“Ëe holo tangankamë sap ëre mo tahana Yahudi zisi de haen gwibiridan hap ïnïn sosuk tine gwek,
hwëna nol drak-drak zi ausuna in hom mae Asa nasalblak.”