2
Mae hap de ol: Tïngare Kristen zini Alapsa a kirekam de abe da gwek.
1 Timotius, bol-zaun tanganna, emki tïngare Kristen zini Alapsa de abe ta tine gwen hap tïtï ta gwibin. Zen tïngare zi hip zen abe ta gwen– Alap dekakim desa mas gwibirida gweka, hen dawem ta gwibirki, hen tahalhasa dekakim sul sone gwizimki. Deban dikire Alap hap dawemna nolbla tine gwek.
2 Zen dikire teipsïn-teipsïn wenya kip hen abe da gwek– hen tïngan men zen zëno mae mo irgwa taha nakon ïrïk nïl gwenanke. Zen mae hap: Nen dikim aha-ere enlalakam hen umlae enkam ëgwë gwen hap, hen zen de nëno mae mo Alap mo nganak de syalsa tru-tru gul gwen srëm hap, hen aha zi dikim nësa husus gwibirida gwen srëm hap.
3 Kirekam de abe ta gwenna, zen man nësa de ngaya tabin hip de Zini Alap mo nwenak sam gwesïk gwenan.
4 Zen man sap tïngare zi de hëndep denaban ëngaya gwen hap de orasa dam tasïn hïp dwam gweꞌara– hen eiwa denaka de tame gun hupye.
5 Sap Alap Zen aha-en. Hen men Zen nësa Alap osan dep zon guluda gweꞌara, Zen hen aha-en: Zen Kristus Yesus.
6 Sap Yesus Zen mes tïngare zini nëno mae mo karek-kareksa dikim ngan gulsuzimdin hip Zënaka zerguku. Zen kirekam Alap mo kalang gwe gun sun ki lwak– dekam de tïngare zisi anakan gubiridan hap, “Ëe ama sap em de ëngaya gwen hap dwam gweꞌan.”
7 In zep Alap anakan asa dam tasïkï, “Ëngaya gwen hap de ol dawemna ansa em Yahudi srëm wenya kip golzim halada gwen. Eiwa de ora san dep em tïtï tabirida gwen– dekakim zen hen Yesussu daïblï gweblak.” Zen eiwa tangankam asa dam tasïkï. Ëe bëjënë boton gwen.
Ola an, zi hip dena hen we wal hap dena.
8 Ëe zebë dwam gwibiridaꞌan– zikim dena, zen de kïtak enho kles gwesïn srëmkam Biansa abe ta tine gwen hap. Kim de nen sone gweblak, jalsa de lam gun nuban bap zen, hen aha zi niban de keisa-keisa ën hap de enlala naban bap zen.
9 Hen we walya, ëe ama desa dwam gwibiridaꞌan: Zen sap sa enho oto tasïn nïban zëre mae mo timni weir nulsuk gwer, hwëna bolamda gwen enlala naban bap zen, hen zi dikim hole gwibin hip de enlala naban bap zen. Te-ala mamkam de teisyan pakeanna, hen te-ala mamkam de kap tan sasyan maena, hen emas maena, desa bap zen kire enlala naban alala ta gwen.
10 Diki Kristen we walya, Alap mo nwenak de dawemkam wër gwenna, zen diki dawemsa zen tïngare zi hip goltrei gwizimdin. Dekam sa Alap mo nwenak ëoto gwesïl– san de zënaka de weir gulsunnu kiye.
11 Kristen zi de tagal gwennak, we walya zen diki balk enkam zen ësane gwe-gwen. Hen men zen tawa tabinni, desa zen dawemkam blikip gwesïblïn.
12 Ëe homë we wal de zisi tawa ta gwibin hip gubiridaꞌan. Hen zen bap zen zisi nol gwibirida gwen. Zen diki balk enkam zen teinikin gwen.
13 Sap Alap nonol Adamsa yang tasïkï, ki zep hwëna Hawasa yang gulsuku.
14 San ki Adamsa dowal mo kïgïna boton taka! Zen diki we zem Hawasa am boton gulku, dekam zep kareknak zank.
15 In zep Alap desa anakan gubirki,
“Ebon onakon hëndep tïngare we walya ëu gwe- gwenkam Ëe asa sang-sangna mam gul gwizim, hen hlësgwan-hlësgwan naban esa ëjaha gwe-gwer.”
Hwëna Alap sa hen we wal hap hëndep dikim ëngaya gwen hap dena golzimdi–
zen de Kristussu de taïblïblannak tatem ëzauk gwenkam,
wal bosyansa de kwasang gwibirida gwenkam,
hen Alap mo nwenak de enho kles gwesïn srëmkam lowehe gwenkam,
hen enho oto tasïn nïban de zënaka wër tasïk gwibinkimye.