2
Pol wari Kolosi aming wari midi mandaga' ga' manda ukngam waraga' yanggu'
Ka na midi ka sidi yotangkasap ga' kane girii fatirik u torik, waraga' wa ning sangnatamotik, na naktangka aming ka Kolosi yong a Leodisia yong iking, fam ka naning nondakna kuma' nabiting a fam ka mo' nabiting sidi yotangkasap ga' sura kane girii beng sini' fatirik. Ka na kane ka u fatirik wa sidining kabaksi' u sifitangkainga sidi kuyase fam guk kura' nakngam titi waraga' kabaksi' kubaniksa' kufara tanga sasuk kareng guk ikinga wari sidining naktangkasi' u ifitangkasaminga sidi naktangka tang tanga ikanting. Ning tanga sidi Anutuning midi kapmo' ka tim fideragu' wara'ning ki wa Kasira Aming anasa' ning u nakeda waraga'sa' tanga fatirik. Beng sini' Anutuning sasuk kareng kapmo' kuni' kuni' wa Kasira Aming Jisas ganangsa' ita' wara' adisa' ningtintingneinga kaga ning.
Ka na aming fam wari mandaga' saramira sanggagare tinga sidi adisining midi u bengsa' ning tonga ma nakyamni' wara' na midi ka i sanarik. Ka beng sini' na sidigok unggung kubak mo' ikem, kamani naro' itik de ka sidi nagok Kasira Aming Jisas ga' naktangka dabik tem wa na sidigok kubap dabik unggung iikning ningda'ning sura fanakarik. Ning tanga na sidi naktangka tanga sidining bining ganang u kadapmang didimengsa' titi waraga' kabaksi' kubaniksa' kufara iking u naknga kabakna karengsa' naknga mesisiringa fatirik.
Indi Kasira Aming ganang sini' yorafanga adining ka' iyak kareng guk ikantam
Ka sidi Kasira Aming Jisas wa sidining girisi' ning kanga adita' naktangka kuma' ting wara' sidi kadapmang ka adiganang beng sini' yorafanga iikning u tinting. Ning tanga sidi adining sasuk kareng u bema adiganang u tangkunang sini' ka firi wari ke kamaganang mang sini' urang amoting ningda'ning, a yak ka mungkap kiginesi wari tanga mainga kiginengsa' urang adeting ningda'ning tanga sidining iiksi' wa Kasira Aming Jisas ganang sini' ikanting. Ning tanga Anutuning midi ka tim kuma' sanggekum waraga' naktangka tangkunang tanga ning tanga Anutu wari kareng tasamara' waraga' sura kabaksi' kareng naknga fikifiki adita' mesisiringa tangama ikanting.
Ka kuyane sidi midi ka i torik i naknga kafakafa suktangkanga ikanting, aming fam wari midi kugurang sana sanggagareinga midi beng guk u kabinga adi sige ma yawakni'. Aming ka ningwara' wara'sining sasuk wa beng guk mokngang, adi kadapmang kareng yangtintingnem ning tonga kadapmang ka aming ning tapni kuni' kuni' a murak kamaganangni ka beng guk mokngang wara'ning unggungsa' tonga fiareting. Ka ning torik, adi Kasira Aming ning wap ga' kabi'guk mo' sura tuguting wara' sidi midi ka wa mo' sini' nakiamting.
Ka Kasira Aming ning ki sini' wa ning, adi kamaganang i fugu sini' guk kadofigu' ganang wa adi Anutuning iik kareng wara'ning sasuk a tangkunang wara'guk beng sini' kadofigu'. 10 Adi Anutuning kunim a kamaganang ning girisi wara'sining ki sini' ira kigineng girii guk ikita'. Ka sidi adiganang yorafanga iking wara' sidi Anutuning iik kareng ka adiganang ikita' wara'guk kuma' iking. 11 Ka sidi Jisas ganang sini' yorafanga ikinga Jisas wari sidining sasuk kamaganangni kadagasi ka kabaksi'ganang u kuma' tanga yuguksamgu'. Ka u tasamgu' wa aming wari Anutuning arantagim iikga' sura napa' usingsa' ka fuksi' giknim urang dopma yugukiamiting ningwara' mo' tasamgu', mokngang, adi napa' beng guk sini' tasamgu' wara' sidi Anutuning de ganang wa adining arantagim fafandangesi kareng beng guk ning iking. 12 Ka sidi Jisas ga' naktangka tinga ama isamging wa tim Jisas wari kumoinga kamaganang unafarafiging u sidining kadagang guk dabik kuma' unafarafiinga bisasu'negu' u nakeda wara'ning kamaga tasamging. Ka sidi Anutu wari Jisas kuma' kumogu' u tubobu tipmarara ka' iyak inga'ni amigu' u naknga adining tangkunang girii waraga' naktangka ting wa Anutu wari sidining sasuk kadagang timini kabaksi'ganang u tanga yuguksama Jisas guk tubobu dabik sifimarara adining ka' iyak inga'ni kuma' saminga iking. 13-14 Ka aming arantagim nua'ni sidi wap Anutuning arantagim ka Juda aming wari fuksi' giknim dopma tanga ikiaging ning guk mo' tanga yaging, mokngang, sidi sidining Anutu girii ning midi guk mo' naknga sidaning kadapmang sa' yaranga kadagang guk yaging wara' sidi Anutuning de ganang aming kungkumosi ning yaging. Ka inga' yara'ganang wa Anutu ka Jisas u tipmarara ka' iyak kareng urang amigu' wari sifimarakinga sidi adining ka' iyak kareng guk ubu kuma' iking. Tim indi Anutuning kadapmang tangkunang u kafakafa guk mo' yaranga yagum wara' adining midi tang wari ning togu', sidi sidining kadagang wara'ning kagaya girii guk bimbem wara'ning. Ka inga' Anutu wari indi indining kadagang wara'ning kagaya girii bimbem u udanim waraga' sura Kasira Aming Jisas u anigareinga afanga kumogu' wara'ganang wa kagaya girii ka indi bimbem ga' togu' u wadigi' udanga tipmirinimgu'. Ning tanga adi kadagang wara'ning kagaya ninim waraga' nua'bu guk mo' sukita'. 15 Ka Anutu wari kane kigineng ka u tugu' wara'ganangsa' wa adi mini unggo kadagasi ning girisi ka indi indiramik ning wara'sining kigineng u wadigi' kuma' tipmirisasu'negu'. Wa ning, Anutu wari Jisas u firi ugari ganang bema tapku' wa aming indi u kanga o beng sini' adi mini unggo kadagasi ning tangkunang wa kuma' tipmirisasu'negu' ning tutugu waraga' tinima ningtintingnegu'.
Aming ning tapni kuni' kuni' wari nua'bu mo' tofinibara'
16 Ka sidi Kasira Aming Jisas ganang sini' yorafanga ka' iyak inga'ni guk ubu kuma' iking wara' aming fam wari kadapmang ka nana a ama ka adi tapni titing a Judaning mengkura ning kama tapni a mayap inga'nining kama tapni tanga yareting wara'guk mo' titisi ning sapma kadapmang ka u yaranga titi waraga' tangkunang sini' mo' sangting, mokngang. 17 Napa' tapni ka u titing wa adi iik kareng ka Anutu wari inga' tipkadofi waraga' sura kamigu' wara'ning kamaga unggungsa' titing. Ka napa' beng guk sini' ka inga' kagadofi ning wa Kasira Aming Jisas wari kadofinga sidiganang u kuma' ita' wara' sidi tapni ka u yara waraga' guk mo' sukanting. 18 Ka Juda aming fam ka Jisas ga' naktangka guk mo' titing wari anga aramak ning midi ka o amine indi kunim aming arantagim fam unggungsa' yapma indining fukni' bema afanga adisining wap bema aranga adisita' mesisiringa tiamitam wara' indi aming ka ning guk mo' titing sidi sirafikem, ning saninga wa sidi mo' sini' nakiamting, mandaga' siramiking. Aming ka midi ka ningwara' tuguting adi anasining fuksi' beng bema afu guk mo' sukiting, mokngang, adi kamaganangning sasuk kadagang guksa' ira ana wap girii bimbem waraga'sa' sura tuguting. 19 Ka adi naktangka aming indi Kasira Aming Jisas ganang sini' yorafanga ikem ning mo' iking. Wa ning, ki wari tim ikinga fugu a kayong nasi' nasi' adi mandang ikiting ningsa' ika Jisas adi indining ki ning ikinga naktangka aming indi adining fugu ka wegi a gasigasini' wari mung ganang kafakafa urang yorafanga ikiting ning yorafanga ikem. Ira indi Anutuning tangkunang bema ning tanga indi kuyane fam ganang undu' yorafainga Jisas ning fugu wari girii giranga kigineng guk kadofota'. Ka aming ka u torik adi Jisas ning fugu ganang guk mo' yorafanga iking wara' adisining midi wa beng guk mokngang.
20 Ka sidi Kasira Aming Jisas ga' naktangka tanga adiganang kuma' yorafanga iking wara' adi kungkumak tugu' wa kamaganang ning kadapmang tapni ka tim saptatoreinga tanga yaging u wadigi' kuma' udanga kayosamgu', ka nasi'ga' tanga kadapmang ka wari ko tofisabinga aming kamaganangni sini' ningda'ning ko iking. 21 Adi nana a nasi' fam u tapni tangkunang tanga ning fatuguting, sidi mo'sini' ninting a kafasi' wari kabi'sini' guk mo' tifemting a mambapsi' wari kabi'ning guk mo' fipnaganting, ning fatuguting. Ka nasi'ga' tanga sidi adisining midi wa nakiamsa' titing. 22 Ka tapni ka wa Anutu wari tita' wa, mokngang, wa aming kamaganangning warisa' napa' ka nana tinga kuma' bibi'ning waraga' sige titing. Wara' ning torik, kadapmang tapni ka beng guk mokngang ningwari nua' mo' tofisabota'. 23 Beng sini' adi anasining urasi' u yotangka waraga' sura kadapmang kuni' kuni' ka kunim amingga' mesisiringa tiam a anasining kabaksi' bema afanga fuksi' u kagaya iyam waraga' nana guk mo' nana ning u titing wa aming wari yapma o beng ting ning tutugu ning. Ka mokngang, kadapmang usingsa' ka ning wa sasuk kadagang ka aming ning kaba ganang kadofita' u tanga kayongaminga gi' iikning guk mokngang sini'.