17
NeHalang Hetaua Apram Ene
1 Nga etue nenge Apram ana hesinga iri ana non kina henel pe analoch pe rahtele henel (99) Non Soke lohot nge i pe hele ke teke, “Iau NeHalang Nenge Kerkereng Toto. O nanas mene poinga nge pengpeng pe o poia poinga poreke ngana e nga matak ero toto.
2 Pomalam lape e poia lek tomunga hel ana helenga luluch nge iong pe e poia lem tete mur ke iri halang toto.”
3 Ol pe Apram losio pe ma ke nausio pe NeHalang hele lange i ke teke,
4 “Ke lek tomunga hel ana helenga nenge lange iong ngana koi nei: Iong lape o lohot ke tuele kina mur nge halang toto reette iong.
5 Lape te hetue iong ke Apram ero ol. Em laka Apraham ol iange lape e poia iong ke o lohot ke tuele kina mur halang reette iong.
6 Lape e poia lem tete mur ke iri halang pe hel nge iri lape te lohot ke iri naungaala ana hana mur.
7 Lape e poia lek tomunga hel ana helenga luluch nge iong nenge lape tu ke koko. Pe lape E poia lange lem tete mur pule nenge lape te lohot nge he. Iau NeHalang am Soke pe Iau NeHalang nenge lem tete mur nga hoena aria Soke pule.
8 Ich nenge Kenan nenge o are ia nem hana hel reria ich pe lape e tung lochloche lange iong pe lem tete mur nenge te lohot nga hoena ke lemo ia ol. Pe iri aria Non Soke NeHalang, ngana koi Iau.”
9 Pe NeHalang hele lange Apraham, “Iong pe lem tete mur nge he, a rahit tote lek tomunga hel ana helenga nei.
10 Tomunga hel ana helenga nenge e poia nei, e poia lange iong pe lange lem tete mur nge he pule. Pe a rahite ke kerkereng: Iri lochloch ngana nenge iri tatamanna te rir us.
11 Imo lochloch ngana a teu langa us rir ngana. Ke nem heilangia tomunga hel ana helenga nenge e poi luluche nge iong.
12 Nge iri lochloch ngana nenge te lohot nga hoena nenge aria etue iri rahtele mol lo a riria iri, luluch nge iri nenge tetu luluch nge iong nga lem pele pe te hoe iri. Pe iri nenge lem tete mur ia iri ero pe te olia iri nga umtutuna nge hana taungana hel arir ia iri pule.
13 Ke iri nenge tetu luluch nge iong nga lem pele pe te hoe iri pe iri nenge teolia iri nga umtutuna ariria iri pule. Lek tomunga hel ana helenga nenge e poia lange iong lape tu ke koko nga singimo.
14 Mele nenge te riria singina ero heporeke lek tomunga hel ana helenga nem, pe lape te lope hote i ke tuteu luluch nge nena hana mur ero ol.”
15 NeHalang hele la pule nge Apraham ke teke, “Pe iong lem hei Sarai, lape te hetue i ke Sarai ero ol. Lape te hetue i ke ene laka Sara ol.
16 Lape E pete i pe E poia i ke hoe tum tamane ngana e. Pe lape E pete i ke tuele kina mur lochloch taria ia, pe naunga-ala ana hana mur nenge te nauelele hehei pe hana lape te lohot nge ana hei tutuna mur.”
17 Apraham losio ke ma ke sana sio pe melmel pe helele nge isipona ke teke, “Non e nge ana hesinga iri ananon kina lime (100) mai nakuna nge hoe tuna tamane ngana e kura kai? He Sara ana hesinga iri ana non kina henel pe analoch (90) pe lape hoho kura kau?”
18 Pe Apraham hele lange NeHalang ke teke, “Iok teke pomam, O pete Ismael pe o nauele i ke nek!”
19 Pe NeHalang hele ke teke, “Oe pe lem hei Sara lape hoe tum tamane ngana e pule pe o hetue i ke ene Isak. Lape E poia lek tomunga hel ana helenga luluch nge i pe nena tete mur nenge lape te lohot nga hoena. Pe tomunga hel ana helenga nem lape tu ke koko.
20 Lape E poi ke urana lange Ismael ke pomanga o hele ngam. Lape e pete i ke manmanna pe lape e poia i ke tutuna mur halang pule. I lape lohot ke hana nenge iri mukmuka nge hehei pe hana temeria ia. Hana nemur iri analoch pe nai pe lape te lohot ke hana kerkereng ngana mur ia iri.
21 Pe lek tomunga hel ana helenga nenge e poia nge Isak, he Sara lape hoe i nga etue nei nga hesinga nenge atat.”
22 NeHalang hele luluch nge Apraham ke het pe lohaka ke la sapele.
23 Ke nga etue neu pengpeng Apraham nanasia NeHalang nena helenga ke mene tuna Ismael pe aina tatamanna mur lochloch nga nena pele pe iri nenge tetu nga nena pele pe te hoe iri pe iri nenge te olia iri nga umtutuna ke te rir us.
24 Pe Apraham ana hesinga iri ana non kina henel pe analoch pe rahtele henel (99) pe te riria singina,
25 pe tuna Ismael ana hesinga iri analoch pe mol (13) pe teriria singina.
26 Ke Apraham pe tuna Ismael te riria singiria nga etue neu pengpeng.
27 Pe iri tatamanna lochloch ngana nenga Apraham nena pele pe iri nenge tetu nga nena pele pe te hoe iri pe iri nenge te olia iri nge hana hel te rir us ke elle luluch nge Apraham.