19
NeHalang Hengaululue Kileng Sotom Pe Komora
1 Angkelo nai nenge te hilesue NeHalang iri nai Apraham, tela ke te sauhot nge Sotom nga ulei. Te sauhot pe Lot kilkila nga tuele tana neu ana kue matana. Nga etue nenge Lot naue iri lohaka ke la taua iri pe tualou sio pe tatuch sio la nga ich.
2 Pe hele ke teke, “Hana papalau nai nem a i at nga lek pele ke a lomo sue apemo pe nga miliko a ma mukam. Pe nga uach a lohaka pe a i mule ol.”
Pe iri te tuacholia ke te teke, “Ero mo ma la i loi nga kileng unne nenge hana te heukiraurau ia.”
3 Pe ero, Lot mes ke kerkereng nga nena helenga kura pomalam te nanasia Lot ke te la nga nena pele. Pe Lot tatalo hele aria ngaunga ke umeia peret nenge ana is ero ke te ngaua.
4 Iok te mamani ero kura pe hana lochloch ngana nga tuele tana nenge Sotom te at ke te heliliu hite pele. Iri nenge lolomele pe nenge te tuauna lo te at pule.
5 Pe te iu lange Lot ke pomai, “Hana nai nenge te at ke tema nga lem pele ngai? O mene iri at nge imem ke mo heporeke iri lakoi nge hot.”
6 Ol pe Lot i hot pe piuele mule piunga pe lange iri
7 pe hele ke teke, “A poi ke mam ero! Iau pekngak mur laka imo pe a poia poinga poreke ngana nei ero.
8 Anau at, iau tutuk mur heheina nai nge tema luluch nge hana ero kura. Lape e mene hote iri at nge imo pe a poi lange iri nga lememo ngamo. Pe a poia ute lange hana nai nei ero iange te teu at nga lek pele ke e nauele iri.”
9 Pe Sotom mur te tuacholia ke te teke, “Ah! O poi hele imem ero. Iong ngie koke iong ke o at pe lem nga lamai ero. Pomerei nenge o mil teu at nga lemem poinga mur? Heueu lape mo heporeke tote iong nge iri.” Te echia Lot pe te puo teua iri la nga piunga ke te teke te palchach sue.
10 Pe ero. Hana nai nenge teu te tak teua Lot la nga pele letetena pe te piuele piunga.
11 Pe hana lolomele ngana mur pe tuauna ngana mur te mes nga pele neu ana piunga nge hot. Pe hana nai neu te poia iri ke mataria puluala pe te rere mene piunga ol.
12 Pe hana nai neu te onteia Lot ke te teke, “Lem hana hel kai tetu nga tuele tana nei pule mai? O mene tutum mur nenge tatamanna pe heheina pe uem mur pe itei hel pule nenge lem hana mur ia iri pe a ua hot nga lamai,
13 iange lape mo hengau lulu heke kileng nei. Helenga halang toto lohot nga poinga poreke ngana nenge poreke toto nge te lohotot nga kileng nei, pomalam Non Soke kulosia imem at ke mo hengau lulu heke.”
14 Iok la ol, Lot la ke hele lange uene mur. Hana nai neu te teke te lechleia Lot tutuna heheina mur. Pe hele lange iri ke teke, “Ueiuei mana pe a ua hot nga lamai iange Non Soke lape hengau lulu heke tuele tana nei!” Pe uene nemur te teke ma songlelele reria.
15 Iok uach sio lo pe angkelo nemur te heueiuei ia Lot ke te teke, “Ueiuei mana! O mene lem hei pe tutum mur heheina nai nei pe a ua hot nga kileng nei iange lape a mete luluch nge hehei pe hana nga kileng ngaulala ngana heueu.”
16 Pe Lot poi hulul mana iange letena tuanin rara ke halang. Ol pe hana nai neu te rahite Lot pe nehei pe tutuna heheina nai neu nga peria pe te mene hot kelkel ia iri nga tuele tana neu, iange Non Soke letena porekeia iri.
17 Te mene hote iri lange hot ke ulo pe elle nge iri hele, “A song ke a eleis maul ngamo pe a ralele mule ero! Pe a mes ke a tah eingamo nga kileng unne nga mos nei ero! A song ke a la toto nga hengene mur iange lape a mete heueu!”
18 Pe Lot hele, “Hana papalauna, nakuna nenge lape e nanasia lemo helenga ero pai!
19 Imo letemo poreke ia lemo non ke a teke a halaua iau ke e maulul. Pe nakuk ero nge e song langa hengene nemur iange te tu ke kangkanga hali, pe oan ngaulala ngana nem lape saol mene iau nga lamai pe e mete.
20 A nau la tuele tana sune kou tu neu. Tuele tana neu tuna mana pe tu rochroi pol. Ke nenge teke a longele iau, toinge e song ke e eleis maul ngak ke ela la kou.”
21 Pe angkelo neu hele lange i ke teke, “Iok urana, e ngata nga lem helenga nem, pe lape e heporeke tuele tana sune nem nenge o heleia nem ero.
22 Pe o song la lamau ke ueiei mana. Iau lape e poia ute e ke lohot ero mukam pe nga etue nenge o la ke o lohot lamau lape e poia ke lohot ol.” (Tuele tana neu tuna mana ke ngana laka nenge te hetue ene Soa.)
23 Nga etue nenge Lot sauhote i nge Soa, chaia matana haka ke tue kileng sapele.
24 Ol pe Non Soke poi hot sapele um milanglang ngana mur pe oan nga tapa sana, pe te losio ke pomanga pitte nenge sio nge Sotom pe Komora.
25 Ke tuele tana nai neu Non Soke heporeke iri ke te het luluch nge hehei pe hana pe ae pe ure lochloch ngana nenge te haka nga mos neu.
26 Iok Lot nehei teke ralele la mule, pe NeHalang hulia i la nga mesmes pe kerkereng ke pomanga um tana e ke mes mana ol.
27 Pe nga uach uruna toto Apraham memete hot pe la mule nga kileng unne nenge mesia nga Non Soke matana.
28 Pe nausio lange Sotom pe Komora pe nauole langa ich lochloch ngana nenga mos pe esia oan pulungana. Oan pulungana neu nakuna pomanga lohot nga oan e nge palaungana toto.
29 Lot tunga mos nga kileng neu pe nga etue nenge NeHalang heporeke tuele tana nai neu letena metene Apraham. Pomalam mene hote Lot ke eleis maulngana nga oan palaungana neu.
Lot Pe Tutuna Heheina Mur
30 Ke Lot pe tutuna heheina nai neu te tu nge Soa. Pe ana non matau, ol pe te loloun haka ke la te tu nga rika nga hengene mur.
31 Ol pe nga etuene e tuna nenge tengene ana hele lange tina nenge kino ke teke, “Poinga nenga ich lochloch hehei pe hana te hohoe tuturia mur. Pe ita lape ta hoe tutura mur hel ero iange hana ero nga kileng nei pe temere tuauna lo.
32 Pomalam ta heinia temere nga uain ke mamani pe ta ma luluch nge i, ke tutura mur pe rera tete mur lape te lohot, urume poinga nenge tapoia lange temere.”
33 Ke nga miliko neu te poia temeria ke inia uain pe tuna nenge soke teu ke la maluluch nge i. Ana hei maluluch nge temene ke het pe lohaka ke la pe Lot eteia ute e ero toto.
34 Iok pomange rou tuna nenge soke hele lange tina nenge kino ke teke, “Nge lona nga miliko e ma luluch nge temek. Pe heueu nga miliko ta hein mule i nga uain pe o teu ke la o ma luluch nge i. Ke tutura mur pe rera tete mur lape te lohot urume poinga nenge tapoia lange temere.”
35 Ke nga miliko neu te poia temeria ke in mule uain pe tuna nenge kino teu ke la ma luluch nge i. Ana hei ma luluch nge temene ke het pe lohaka ke la pe Lot eteia ute e ero toto pule.
36 Ke Lot tutuna mur heheina nai neu, saria mule nge temeria.
37 Tuna nenge tengene ana hoe tuna tamane ngana e pe hetue ke ene Moap. Ke Moap nemur nenge tetu heueu nei reette laka i.
38 Pe tuna nenge kino pule hoe tuna tamane ngana e pe hetue ke ene Ben-ami. Ke Amon nemur nenge tetu heueu nei reette laka i.