26
Isak Pe Apimelek
1 Iok, uringa lohot nga ich nenge Kenan. Pe uringa nem lohot ke pomanga nenge lohot nge Apraham nge nike. Pe Isak lake esia Apimelek. Apimelek i naunga-ala ana non nga kileng nenge Pilistia nge Kerar.
2 Pe Non Soke lohot nge Isak pe hele lange i ke teke, “O sio lange Ekipto ero. O tu mana nga ich nenge E heleia lange iong ke o tuia.
3 O tu nga ich nei mukam pe Iau lape etu luluch nge iong pe lape e pete iong. Iange lape e tunge ich lochloch ngana nei lange iong pe lem tete mur. Ke nem pete tote lek tomunga hel ana helenga nenge e poia lange temem Apraham.
4 Pe lape e poia lem tete mur ke iri hulua toto ke pomanga itoch mur nga tapa sana. Pe lape e tunge ich lochloch ngana nei lange iri. Pe lape e pete hulua lochloch ngana nga ich iange nge lem tete mur mana.
5 Iange Apraham longo tau tote Iau pe poia ure lochloch ngana nenge e heleia lange i ke e teke poia. Pe poia utar nenge e hele urume pe nanasia utar nenge e hetoro i ia.”
6 Ke Isak tunge Kerar.
7 Pe Isak nehei nakuna urana toto. Pe hana nga lamau te onteia ana hei lange Isak. Pe Isak hele ke teke, “Iau liuk iam.” Ana non matau nge hele lange iri ke teke nehei. Iange teke lape te hune i pe te leia nehei.
8 Isak tuke mala nga lamau lo pe Apimelek non nenge nauele kileng Pilistia. Ana non nau sio la pe esia Isak nge ala kukukumia nehei Repeka.
9 Ol pe Apimelek iua Isak pe hele lange i ke teke, “Iong lem hei koi hei nei. Pe pomerei nenge o hele le o teke lium ia?” Pe Isak tuacholia ke teke, “E matau iange nenge teke e hele ke e teke lek hei ia, lape a hune iau pe a leia i.”
10 Pe Apimelek hele, “O poia poinga utar nemam? Nenge teke non e nge imem ma luluch nge lem hei, lape imem mo amneia ke poreke iange mo poia poinga poreke ngana.”
11 Iok, Apimelek hele ke kerkereng lange hulua lochloch ke teke, “Amo e nenge poi poreke lange Isak ma nge nehei, lek hana mur lape te hune i ke mete.”
Isak Nena Urelu Halang
12 Nga hesinga neu Isak poia ume pe tue ngaunga tutuna halang nga ich neu. Pe Non Soke pete tote i ke lule ngaunga nge halang toto nga nenge tue.
13 Isak lolochia urelu halang pe nena ure nemur te puo keke. Pomalam lohot ke i non nenge nena ure halang toto.
14 Pe nena hekuleileinga ana hana mur pe nena sipsip mur pe nena pulumakau iri halang toto pule. Pe iri nenge Pilistia saria keke i
15 pe te halohite ech matana mur nga ich. Ech matana nemur Isak temene Apraham nena hana mur te selia iri nga ana non maulul ngana nike.
16 Pe Apimelek hele lange Isak ke teke, “O lohaka nga lemem kileng pe ola ol iange o kerkereng toto nge imem.”
17 Pomalam Isak lohaka nga kileng neu pe hemes heke reria pelpele mur nga mos nge ene Kerar ke tetu lamau.
18 Nge nike nga Apraham tu ngana, selia ech matana mur halang nga kileng neu. Pe nga etue nenge Apraham mete, Pilistaen mur te alohit mule nga ich. Pe Isak selhot mule ech matana nemur pe heto mule eria mur ke pomanga temene heto nganaia iri nge nike.
19 Iok, Isak nena hekuleileinga ana hana mur te sel sio nga mos neu pe te sel hote ech matana e nge lelele.
20 Pe hana nenge te nau elele sipsip mur nge Kerar, te at pe te hele inin taua hana nenge te nau elele Isak nena sipsip mur ke te teke, “Imem laka emem ech matana nem.” Ol pe Isak hetue ech neu ke ene Esek (iange te echachala hel ia).
21 Iok, Isak nena hana mur te sel hote ech matana e mule pe te echachala helia pule. Ol pe Isak hetue ech matana neu ene Sitna (iange te ngata helia ero).
22 Iok, Isak loloun nga lamau pe la ke sel hote ech matana e mule. Neu ol, mele hele i ia ero ol. Pomalam hetue ke ene Rehopot iange hele ke teke, “Heueu nei ol Non Soke tunge murra nge halang pe poia ita ke ta are ke nek nga ich nei ol.”
23 Pe nga hoena Isak hile kileng neu pe loloun ke la tu nge Persepa.
24 Pe nga miliko Non Soke lohot nge i pe hele ke teke, “O matau ero, temem Apraham ana Soke Iau. Pe lape E tu luluch nge iong pe E pete iong. Pe lape E poia lem tete mur ke iri halang toto iange mutek tau tote lek non Apraham.”
25 Ol pe Isak lung heke hatanga e nga lamau ke heto heke Non Soke. Pe hemes heke nena pelpele nga kileng neu pe nena hana mur te sel hote ech matana pule.
Isak Iri Nai Apimelek Te Poia Tomunga Hel Ana Helenga
26 Ol pe Apimelek lohaka nge Kerar kela esia Isak. Pe koke non e nge ene ne Ahusat pe e ene ne Pikol. Ne Ahusat i non nenge tutunge letematana urana ngana lala nge Apimelek. Pe ne Pikol i non nenge i mukmuka ia Apimelek nena palinga hel ana hana mur.
27 Pe Isak onteia iri ke teke, “Nga tele ngana lememo ero ia iau pe a lope hote iau nga lemo ich. Pe pomerei nenge a iat mule nge iau?”
28 Pe iri te tuacholia ke te teke, “Mo nau mellehe mene ke Non Soke tu luluch nge iong. Pe mo teke ita ul ke ta talue helenga kerkereng ngana e. Pe ta poia tomunga hel ana helenga e nenge hele ke teke,
29 lape o poia ure meena ngana ke lohot nge imem ero. Pe imem pule lape mo poia ure meena ngana ke lohot nge iong ero. Mo poi ke urana lange iong pe mo kulos hote iong pe oi hot ke nek mana. Pe heueu nei Non Soke pete tote iong.”
30 Ol pe Isak poia aria ngaunga matana e ke te ngau pe tein.
31 Iok, nga uach uruna toto te lohaka pe te poia helenga kerkereng ngana nga reria kilanga nge urana. Ke het pe Isak kulosia iri ke tela mule pe te lohaka luluch nga leteria urana ngana ke te la.
32 Nga etue neu pule Isak nena hana mur te lange i pe te heleia ech matana e nge te selia ke te teke, “Mo sel hote ech matana e lo!”
33 Ol pe Isak hetue ech matana neu ke ene Sipa. Pe tuele tana neu te hetue ke ene Per-sipa. Ke heueu nei te hetetue tuele tana neu nga ene nei kura.
Esau Nehei Mur Eria Koi
34 Esau ana hesinga iri ana non kina nai (40) pe leia hehei nai nga mata nenge Hitae mur. Elle ene Iutit nenge temene Peri pe e ene Pasmat nenge temene Elon.
35 Pe hehei nai nem te poia Isak iri nai Repeka ke leteria inin toto.