38
Ne Iuta Pe He Tamar
Nga etue neu Iuta hile titina mur pe sio la nga kileng nenge Atulam ke la tu luluch nge non e nge ene Hira. Pe non e nga lamau pule ene laka ne Sua. Ana non nena nge Kanan. Iuta esia ne Sua tuna hei ngana pe mutena taua i ke leia pe ma luluch nge i; Iok ana hei sana ke hoe tuna tamane ngana e pe hetue ke ene Er. Iok sana mule ke hoe tuna tamane ngana e pe hetue ke ene Onan. Iok hoe tuna tamane ngana e pule pe hetue ke ene Sela. Ana hei hoe tuna Sela nga kileng nenge Kesip.
Iuta tuna tengene ana laka Er. Pe nga hoena Iuta heleia i lange hei e nge ene Tamar. Pe Er nena poinga poreke toto nga Non Soke matana, pomalam Non Soke hemete i.
Ol pe Iuta hele lange Onan ke teke, “Tim nenge soke mete lo pe tuna ero. Pomalam ta nanasia rera hotonga ke o maluluch nge tim nena metenga hatal, ke hoe tim tutuna mur hel nge iong.” Pe Onan lemene ero nge poia hei neu ke sana iange eteia ke hei neu tutuna mur, i tutuna mur ia ero. Ke nga etue nenge ma luluch nge hei neu, poia ana ech ke pararai sio mana nge hot ke poi hote tina nenge mete tutuna mur ero. 10 Pe poinga nenge poia neu pengpeng nga Non Soke matana ero, pomalam Non Soke hemete i ke mete pule.
11 Ol pe Iuta hele lange nette Tamar ke teke, “Iong em mete lo pe tuk Sela i palaungana ero kura. I palaungana ol laka leia iong ol. Pe o la mule ke o tu nga temem na pele mukam.” Iuta hele ke mau iange letena tuanin ke teke, “Heueu, Sela lape mete pule ke mange titina mur.” Pomalam Tamar la ke tu mule nga temene na pele.
12 Iok hesinga halang la lo pe Iuta nehei mete. Iuta nehei i ne Shua tuna heingana ia. Pe Iuta letena ia nehei ke kila ia ana lete. Ke het pe i pe neingana Hira nenge nena nge Atulam, te lohaka ke te lange Timna ke la nau tote hana nenge te ut susue nena sipsip mur pulpulria.
13 Ol pe mele la ke hele lange Tamar ke teke, “Lemte pau kou lala nge Timna ke ut susue nena sipsip mur pulpulria.” 14 Ol pe Tamar poi sue pakar mur reria hengeron pe ruch hele palpanna nga malenga sachana e pe la ke are nga kue matana nenge lange Enaim. Ana kileng tu nga kue nenge lala nge Timna. Iange Tamar eteia ke Sela i palaungana lo pe te hepengia aria leinga ero kura.
15 Pe nga etue nenge Iuta i ole ke la, esia ana hei nge ruch hele ramana ana malenga sachana pe teke ma hei salaunga kina e. 16 Ol pe i lange i nga kue ilina pe hele lange i ke teke, “O i at ke e ma luluch nge iong.” Pe Iuta eteia ero nge hei neu i nette ia.
Pe ana hei hele, “E ma luluch nge iong pe lape o tunge lek utar?”
17 Pe Iuta hele, “Iau lek meme mur halang pe lape e tunge lem lomele ngana e.”
Pe ana hei hele, “Iok o tunge lem ute at nge iau ke e rahite ke heilang ia helenga kerkereng ngana nem. Pe nga etue nenge o tunge lek meme lomele ngana nem at, lape e tung mule lem ure nem lange iong.”
18 Pe Iuta hele, “Ke lape e tunge utar lange iong ke heilang ia helenga kerkereng ngana nei?”
Pe ana hei hele, “O tunge tele lem tongtong pe am nananga nenge em ma haka ia luluch nga ana rur at mukam.” Iok Iuta tunge ure nemur lange hei neu pe ma luluch nge i pe poia i ke sana. 19 Ke het pe Tamar la mule pe poi sue malenga sachana nenge ruch ele ramana ia pe heron heke mule pakar mur reria hengeron.
20 Pe nga hoena Iuta tunge meme lomele ngana lange nei ngana non Atulam neu, ke laia nge hei neu pe mene mule Iuta ana nananga pe nena kula. Pe ero, non la pe hei neu i ero. 21 Ol pe non neu onteia hana nenge te tutu nga lamau ke teke, “A nau hei salaunga kina nenge arare nga kule ilina nge Enaim, la ke merei?”
Pe hana nemur te hele ke te teke, “Hei salaunga kina e tu nga lamai ero.”
22 Ol pe non neu la mule nge Iuta pe hele ke teke, “E la pe hei nei i ero i. Pe hana nemur nga lamau te hele ke te teke, ‘Hei salaunga kina e tunga lamai ero.’ ”
23 Ol pe Iuta hele, “Ta hele ero ol. La rahite ure pa nemur lo la. Pe ta tango rere mule i ero ol iange lape hehei pe hana te melmel lilia ita. Iau e nanasia lek helenga kerkereng ngana ke e hekule meme lomele ngana lange i pe o la pe i ero.”
24 Iok teio mol la ke ulo pe mele hele lange Iuta ke teke, “Lemte Tamar tu teu nga salaunga ana poinga ke heueu nei sana lo.”
Pe Iuta hele ke kerkereng toto ke teke, “A mene hote i lange hot pe a mak heke i nga oan ke mete.”
25 Iok te mene hote i ke lala kura pe kulosia mele ke laia ure nemur nenge nette Iuta tunge lange i pe na helenga nenge hele ke teke, “Iau sak nge non nenge nena ure nemur.” Pe hele pule ke teke, “O nau urume ke nek. Itei nenge ene ma haka nga nananga nei pe nena tongtong nei mai?”
26 Pe Iuta nau urume ke i nena ure mur ia pe hele, “Hei nei poia poinga poreke ngana e ero. Iau sipok e poia poinga poreke ngana iange e heleia i lange tuk Sela ero.” Pe Iuta ma luluch mule nge hei neu ero ol.
27 Iok nga etue nenge Tamar ana etue at nenge hoho ia, mamau tatamanna nai te ma nga letena. 28 Pe nga etue nenge hoho, tuna e penna lohot tala pe hei nenge halaua i kale ana malenga sachana sune nge remenmen pe hele ke teke, “Nenge nei lohot tala.” 29 Pe nga etue nenge mamau neu tak teu mule penna la, tina hemuka hot. Pe hei neu hele, “Iong mam o tale chach hot ke merei mam?” Pomalam te hetue i ke ene Peres. 30 Ke het pe tina nenge te kale penna ana malenga sachana sune nge remenmen lohot pe te hetue ke ene Sera.