10
Lulelo lwa Nuhu
Ayi ndo mbuli ya lulelo lwa Nuhu, Shemu na Hamu na Yafeti. Awa wadatu nawali na wana loimalile nhonya ya mazi tendema.
Wana walume wa Yafeti nawali Gomeli na Magogu na Madai na Yavani na Tubali na Mesheki na Tilasi. Wana wa Gomeli nawali Ashikenasi na Lifazi na Togoma. Wana wa Yavani nawali Elisha na Talishishi na Kitimu na Dodanimu. Awa ndo wanhu wa mwaluko ng'hatu wenele honhu ha mwhani, chila wanhu kwa isi za hewo na kwa ulonzi wawo na kwa lukolo lwawo na kwa nhanzi za hewo.
Wana wa Hamu nawali Kushi na Misili na Puti na Kanaani. Wana walume wa Kushi nawali Seba na Havila na Sabuta na Lahama na Sabuteka. Wana walume wa Lahama nawali Sheba na Dedani. Kushi nayali mhaza wa Nimulodi yawele na mong'ho wa mwaluko muisi yeng'ha. Nayali mpelembi yawele na mong'ho hamwando ha Mkulu Nguluwi, ndo mina kwali na ulonzi ulingulonga, “Nayakudite uwe kota Nimulodi mpelembi yawele na mong'ho hamwando ha Mkulu Nguluwi.” 10 Miji ja mwaluko ja undewa wa heye, najali Babiloni na Eleki na Akadi na Kalinehi, kuli isi ya Shinali. 11 Kulawila ako, Nimulodi nakaluta Ashulu, nakazenga miji ja Ninawi na Lehoboti-ili na Kala na 12 Leseni uwele hagati ha Ninawi na muji ukulu wa Kala.
13 Misili nayali sekulu wa Waludi na Waanamu na Walehabi na Wanafutuhi 14 na Wapatilusi na Wakasiluhimu, wawele mwaluko wa Wafilisti na Wakafutoli.
15 Kanaani nayali sekulu wa Sidoni, mlelwa wa heye wa mwaluko, na Heti 16 na kahi sekulu wa hewo Wayebusi na Waamoli na Wagiligashi 17 na Wahivi na Waaliki na Waasini 18 na Waaluvadi na Wasemali na Wahamati. Hamba wanhu wa nhanzi zinjizinji za Kanaani nawasambaluka, 19 ahyo na honhu ha isi ya hewo nayali kulawila Sidoni kulutila kusini mbaka Gelali mbaka Gasa, na kulutila kolilawilaga isanya mbaka Sodoma na Gomola na Adima na Seboimu mbaka Lasha. 20 Awo ndo walelwa wa Hamu kota lukolo lwa hewo na ulonzi wa hewo na isi za hewo na wanhu wa isi za hewo.
21 Shemu, mkulugwe Yafeti, nayali mwana wa Ebeli. 22 Wana wa Shemu nawali Elamu na Ashulu na Alufakisadi na Ludi na Alamu. 23 Wana walume wa Alamu nawali Usi na Huli na Gaseli na Mashi. 24 Alufakisadi nakampata Shela, Shela nakampata Ebeli. 25 Ebeli nayali na wana weli, wa mwaluko nakamchema Pelegi kwa vila mhela awo wanhu wa isi nawasambaluka, na wa keli nakamchema Yokitani. 26 Yokitani nayali mhaza wa Alimodadi na Shelefu na Hasalimaweti na Yela 27 na Hadolamu na Usali na Dikila 28 na Obali na Abimaeli na Sheba 29 na Ofili na Havila na Yobabu. Awo weng'ha nawali wana wa Yokitani. 30 Isi nawekale nayenela kulawila Mesha kwa nzila ya Sefali kuli isi ya vidunda mwa kolilawilaga isanya. 31 Awo ndo walelwa wa Shemu na wanhu wa isi za hewo na ulonzi wa hewo na kuli isi za hewo na undewa wa hewo.
32 Ayi ndo mbuli ya lukolo lwa wana wa Nuhu, kwa ivyazi lya hewo na ulonzi wa hewo. Kulawa kwa wanhu awo nawenela kuli nhanzi zeng'ha loimalile nhonya ya mazi tendema.