23
1 Balaamu nakamlonjela Balaki, “Nzenjele honhu saba ha kulavila nhambiko hamba ungalile mibuguma saba na ming'holo milume saba.”
2 Balaki nakadita kota Balaamu navyoyalonjile. Lelo nawalavya mchanya mwa chila honhu ha kulavila nhambiko ibuguma limwe na ing'holo ilume limwe.
3 Hamba Balaamu nakamlonjela Balaki, “Upone hano behi na nhambiko ya hegwe ya kulakazwa, nani ndute. Hanji Mkulu Nguluwi koting'hana na heni. Choneche choyondajila ndokuya kukulonjela.” Lelo Balaamu nakaluta yaliyeka mchanya mwa chinhembenhembe cha chidunda.
4 Nguluwi nakating'hana na heye. Balaamu nakamlonjela, “Mbika goya honhu saba ha kulavila nhambiko na kulavya nhambiko ya ibuguma limwe na ing'holo ilume limwe mchanya mwa honhu ha kulavila nhambiko.”
5 Mkulu Nguluwi nakamha Balaamu ulonzi woyalinguganigwa kulonga na kumlonjela yahiluche kwa Balaki.
6 Balaamu nakahiluka na nakamfika yemile bahala habehi na nhambiko ya heye ya kulakazwa, hamwe na vilongozi weng'ha wa Moabu.
7 Balaamu nakamha Balaki ulonzi wa heye, nakalonga,
“Balaki nakengala hano kulawa Alamu,
ena, mndewa wa Moabu nakengala kulawa vidunda vya kolilawilaga isanya.
‘Uye uwapanjile wanhu wa Yakobo kwa chiwalo cha heni,
ena, uye uwalonje vibi Waisilaeli!’
8 Ila ndompanjila ndaze munhu yawele Mkulu Nguluwi hambe yampanjile?
Ndowalonga ndaze vibi wanhu wawele Mkulu Nguluwi hambe yawalonje vibi?
9 Kulawa kuli vinhembenhembe vya mitalawe nandiwona,
kulawa mchanya mwa vidunda ndanguwasunjilila.
Awo wanhu walingikala waliyeka,
hawalingilola kota wanhu wa isi zinji.
10 Yalihi yoweza kuwawaza wanhu wa Yakobo kwa ndaze navyowawele wenji lukami,
ama yoweza kuwaza honhu ha kane ha Waisilaeli?
Hondibagama ndiwe kota munhu yatanganiche,
kota Waisilaeli.”
11 Aho Balaki nakamlonjela Balaamu, “Nakunditila choni? Ndikugala hano leka uwapanjile wang'honyo wa heni, ila hegwe kwanguwatambichiza!”
12 Balaamu nakamlonjela Balaki, “Ndanguganigwa kulonga ulonzi wa Mkulu Nguluwi hela.”
Uloli wa keli wa Balaamu
13 Hamba Balaki nakamlonjela Balaamu, “Tulute honhu hanji hawele koweza kuwona, ila kowona wamwenga wa hewo hela, howeza kuwona weng'ha. Hamba, aho kowapanjila kwa chiwalo cha heni.”
14 Ahyo Balaki nakamhola Balaamu kuli mgunda wa Sofimu, mchanya mwa chinhembenhembe cha chidunda cha Pisiga. Aho nakazenga honhu saba ha kulavila nhambiko na kulavya nhambiko mchanya mwake, nhambiko ya ibuguma limwe na ing'holo ilume limwe.
15 Balaamu nakamlonjela Balaki, “Upone hano behi na nhambiko ya hegwe ya kulakazwa, nani ndute kula kumwambu kiting'hana na Mkulu Nguluwi.”
16 Mkulu Nguluwi nakating'hana na Balaamu, nakamha ulonzi woyolonga, na kumlonjela yahiluche kwa Balaki.
17 Lelo Balaamu nakahiluka, nakamfika Balaki yemile habehi na nhambiko ya heye ya kulakazwa hamwe na vilongozi weng'ha wa Moabu. Balaki nakamuuza, “Mkulu Nguluwi nakakulonjela choni?”
18 Aho, Balaamu nakamlavila Balaki ulonzi wa heye.
“Wime Balaki, uhuliche,
unyhulichize gwa mwana wa Sipoli.
19 Nguluwi hawele munhu, yalonje udesi,
ne munhu yagaluse kijesa kwa heye!
Ndaze, kolagana na wanhu chinhu na yaleche kudita,
ama yalonje chinhu na yaleche kweneza?
20 Ulole, mhegwa mzilo wa kutambichiza,
na heye nakatambichiza, heni siweza hebu kugalusa.
21 “Mkulu Nguluwi hawonile wihe wa wana wa Yakobo,
ne kulema kwa hewo wana wa Isilaeli.
Mkulu Nguluwi, Nguluwi wa hewo ka hamwe na hewo,
heye nakabochelaga lutogo lwa wandewa.
22 Nguluwi nayawaholile kulawa Misili,
naketwanza na wang'honyo wa hewo kota ibogo.
23 Ndangukomya, uhawi hauweza hebu kuwasumya wanhu wa Yakobo,
ne upanjilo kwa wanhu wa Isilaeli.
Lelo wanhu wolonga, kuwala Isilaeli,
‘Mlole vinduzanduza vyoyaditile Nguluwi!’
24 Ulole, kota isimba idala nawenuka,
kota isimba ilume wangwima,
Waisilaeli hawokwesela mbaka webate chila chowalinguwinga,
na kunwa danda ya chila chowalinguwinga.”
25 Aho Balaki nakamlonjela Balaamu, “Lelo uleche kuwapanjila ne kuwatambichiza!”
26 Ila Balaamu nakamwidichila Balaki, “Ndaze, sikulonjele heni kota nachoyalonjile Mkulu Nguluwi ndo chondiganigwa kudita?”
Uloli wa kadatu wa Balaamu
27 Balaki nakamlonjela Balaamu, “Uye, ndokuhilika honhu hanji. Hanji Nguluwi konojezwa leka uwapanjile wanhu awo kulawa ako kwa chiwalo cha heni.”
28 Ahyo, Balaki nakamhola Balaamu mbaka kuli chinhembenhembe cha chidunda cha Peoli, hawele wone munhu yeme aho, koweza kuchona chiwala.
29 Balaamu nakamlonjela Balaki, “Nzenjele hano honhu saba ha kulavila nhambiko, umbichile goya mibuguma saba na ming'holo milume saba.”
30 Balaki nakadita kota navyoyalonjelwe na Balaamu, hamba nakalavya nhambiko ya ibuguma limwe na ing'holo ilume limwe mchanya mwa chila honhu ha kulavila nhambiko.