26
Kuwazigwa lwa keli
Navyoumalile awo utamwa, Mkulu Nguluwi nakawalonjela Musa na Eleasali mwana wa mtambika Aluni, “Muwawaze wanhu weng'ha wa Waisilaeli weng'ha, chila munhu kota navyoiwele ivyazi lya heye. Muwawaze wanhu weng'ha wawele na miyaka makumi meli na mzidi wawele woweza kuza kitowa ngondo.” Musa na mtambika Eleasali nawalongasa na wanhu kuli isi iwele na ibalalika lya Moabu, kumwambu mwa lwanda lwa Yolodani ilingilola na Yeliko, nawawalonjela, “Muwawaze wanhu wawele na miyaka makumi meli na mzidi, kota Mkulu Nguluwi vyoyamlajize Musa.” Waisilaeli walawile Misili ndo awa.
Nhanzi ya Lubeni, mwana wa mwaluko kwa Yakobo, ng'holo za Hanoki na Palu na Hesiloni na Kalimi. Ng'holo za nhanzi ya Lubeni nawawazigwe, nawali walume elufu makumi gane na gadatu na miya saba na makumi gadatu (43,730). Mlelwa wa Palu nayali Eliabu na wana wa Eliabu, wawele ndo Nemueli na Datani na Abilamu. Awa weli, Datani na Abilamu ndo nawali wahaguligwe hali Waisilaeli weng'ha, ila nawawalema Musa na Aluni, na kihanza na wanhu walingumuwinza Kola mhela nalowambelenhuche Mkulu Nguluwi. 10 Mhela awo misanga najigubuka najiwamela, nawabagama hamwe na Kola na wala wanhu weng'ha walingumuwinza heye. Chiluli navyochiwalakaze wanhu miya mbili na makumi gahano, nawali ulanguso kwa wanhu. 11 Ila walelwa wa Kola nahawabagame.
12 Nhanzi ya Simeoni ndo ng'holo za Nemueli na Yamini na Yakini 13 na Sela na Shauli. 14 Azo ndo ng'holo za nhanzi ya Simeoni, walume weng'ha nawali elufu makumi meli na mbili na miya mbili (22,200).
15 Nhanzi ya Gadi ndo ng'holo za Sefoni na Hagi na Shuni 16 na Osini na Eli 17 na Alodi na Aleli. 18 Azo ndo ng'holo za nhanzi ya Gadi, nawali walume elufu makumi gane na miya zihano (40,500).
19 Na wana wa Yuda nawali Eli na Onani. Awa nawabagama kuli isi ya Kanaani. 20 Nhanzi ya Yuda ndo ng'holo za Shela na Pelesi na Sela. 21 Walelwa wa Pelesi ndo ng'holo za Hesiloni na Hamuli. 22 Azo ndo ng'holo za Yuda, nawali walume elufu makumi saba na sita na miya zihano (76,500).
23 Nhanzi ya Isakali ndo ng'holo za Tola na Puva 24 na Yashubu na Shimuloni. 25 Azo ndo ng'holo za Isakali, nawali walume elufu makumi sita na gane na miya zidatu (64,300).
26 Nhanzi ya Sebuluni ndo ng'holo za Seledi na Eloni na Yaleeli. 27 Azo ndo ng'holo za Sebuluni, nawali walume elufu makumi sita na miya zihano (60,500).
28 Nhanzi ya Yusufu mhaza wa hewo Manase na Efulaimu.
29 Nhanzi ya Manase ndo ng'holo za Makili na Gileadi. Gileadi nayali mwana wa Makili. 30 Walelwa wa Gileadi ndo ng'holo za Yeseli na Heleki 31 na Asilieli na Shekemu 32 na Shemida na Hefeli. 33 Selofehadi, mwana wa Hefeli hapatile wana walume ila wadala hela, na hewo ndo Mala na Noa na Hogula na Milika na Tilisa. 34 Azo ndo ng'holo za Manase, nawali walume elufu makumi gahano na mbili na miya saba (52,700).
35 Nhanzi ya Efulaimu ndo ng'holo za Shutihela na Bekeli na Tahani. 36 Lukolo lwa Elani nalulawa kwa Shutihela. 37 Azo ndo ng'holo za Efulaimu, nawali walume elufu makumi gadatu na mbili na miya zihano (32,500). Zeng'ha azo nazilawila kwa Yusufu.
38 Nhanzi ya Benjamini ndo ng'holo za Bela na Ashibeli na Ahilamu 39 na Shefufamu na Hufamu. 40 Ng'holo za Alidi na Naamani, nazilawila kwa Bela. 41 Azo ndo ng'holo za Benjamini, nawali walume elufu makumi gane na zihano na miya sita (45,600).
42 Nhanzi ya Dani nayali ya lukolo lwa Shuhamu. 43 Lukolo nalwali na walume elufu makumi sita na gane na miya zine (64,400).
44 Nhanzi ya Asheli ndo ng'holo za Imuna na Ishivi na Belia. 45 Ng'holo za Hebeli na Malikieli nazilawila kwa Belia. 46 Asheli nayali na mhinza yalinguchemigwa Sela. 47 Azo ndo ng'holo za nhanzi ya Asheli, nawali walume elufu makumi gahano na zidatu na miya zine (53,400).
48 Nhanzi ya Nafutali ndo ng'holo za Yaseeli na Guni 49 na Yeseli na Shilemu. 50 Azi ndo ng'holo za nhanzi ya Nafutali, walume nawali elufu makumi gane na zihano na miya zine (45,400).
51 Walume Waisilaeli wawazigwe nawali lachi sita na elufu imwe na miya saba na makumi gadatu (601,730).
52 Hamba Mkulu Nguluwi nakamlonjela Musa, 53 “Nhanzi azi zopegwa isi iwe uhalizi wa hewo wawo, kwa chiwalo cha winji wa matagwa ga hewo wawo. 54 Nhanzi ng'hulu yopegwa honhu hawo hakulu na nhanzi ndodo yopegwa honhu hawo hadodo. Chila nhanzi yopegwa honhu hake ha uhalizi kwa chiwalo cha winji wa wanhu vyowali. 55 Na ako kugawilwa kwa isi koditigwa kwa kutowa simbi. Chila nhanzi yohalila kwa chiwalo cha matagwa ga lukolo lwa hewo. 56 Uhalizi wa chila nhanzi woditigwa kwa kutowa simbi, chila nhanzi yopegwa kwa chiwalo cha ukulu ama udodo wake.”
57 Azi ndo ng'holo za Walawi ziwazigwe na walelwa wa hewo Gelishoni na Kohati na Melali. 58 Hamwe na ng'holo za Libuni na Hebuloni na Mahili na Mushi na Kola. Kohati nayali mhaza wa Amulamu. 59 Mchewake Amulamu nakachemigwa Yokebedi mwana wa heye Lawi, yavumbuche Misili. Ayu nakampondela Amulamu wana weli walume, Aluni na Musa, na mhinza yumwe, Miliamu. 60 Aluni nayali na wana walume wane, Nadabu na Abihu na Eleasali na Itamali. 61 Nadabu na Abihu nawabagama vyowamlavile Mkulu Nguluwi nhambiko ya chiluli, yohaikundigwe. 62 Walawi walume wawele na mwezi umwe na mzidi nawali elufu makumi meli na gadatu (23,000). Awa nahawawazigwe hamwe na Waisilaeli wanji kwa vila hewo nahawapeligwe isi kota uhalizi woneche hali hewo.
63 Awo ndo walume Waisilaeli wawazigwe na Musa na mtambika Eleasali kuli isi iwele na ibalalika lya Moabu, kumwambu mwa lwanda lwa Yolodani ilingilola na Yeliko. 64 Hali hewo hali haduhuli ne munhu yumwe hali wala wawazigwe na Musa na mtambika Aluni na ndo nawawazigwe aho mwaluko kuchiwala ako Sinai. 65 Mkulu Nguluwi nakalonga kota weng'ha wobagama wawele ako kuchiwala, na kukomya, haduhu ne yumwe wa hewo yasigale yawele mkomu, ila Kalebu mwana wa Yefune na Yoshua mwana wa Nuni.