6
Tovetumagana miya-kawokawowodiyao agaidiya hikotukotu
faꞋina Folo gidakeyedi.
1 Tu tobohiyakweyao kadu ganagahe. KaꞋi tamo hakwadi omi tovetumagana agaimiya tobohiya buye wanavekwageya amine, gavadi-yo usimana-yo miya-kawokawowodiyao agaidiya wakotu? GavaiꞋona-yo keke tovetumagana ami yoꞋo agaidiya udaꞋaliyeni-yo hidavedewayaugini? Medema yami dewa keke gidalubodani.
2 Yaubada yana yoꞋogaga ada vehimeya omi keke maꞋi wadahalamaneni? Aimo tova mulina ide Yaubada yana yoꞋogaga badi tomiyababi moyaꞋaidi kanavedewayaugidi. KaꞋi omi tovetumagana aimo tomiyababi moyaꞋaidi wanavedewayaugidi, au makewa tova adamoya mena gaitoma kabiꞋona faꞋina amifaiweya wanavedewayauga.
3 Kadu Yaubada yana yoꞋogaga ada vehimeya saꞋeyana maꞋi wanuwenuwena o keke? Ide lobama ana tovenuwaꞋata kanavedewayaugidi maꞋi wahalamanena o keke? KaꞋi mena faisewa lakahina aimo lobameya wanaꞋabina, au makewa amifaiweya hida babi ana gaitoma faꞋina wanavehimeya.
4 Mene tamo kaliva adi egana keke lakahina omi tovetumagana agaimiya o keke? KaꞋi nuwanuwami babi ana gaitoma faꞋina buye wanavekwageya amine, mena kaliva adi egana kabiꞋona omi matamiya ma badi agaidiya wadakotu. Badi kaliva kabiꞋodiyao nonogana adifaiweya hinavedewayaugimi.
5 Au hidedemi gagahe be wanawowomumu faꞋina. Omi vaita keke tonuwahuya-yo badi tovetumagana hivekwageya-ma keke wadavedewayaugidi. Mene tamo kaliva tonuwahuya gimimiyami o keke?
6 Vaita yami vekwageya faꞋina tovetumagana yami yoꞋo agaidiya wadalukahihiyeni be ginahavaina faꞋina, tu keke. Au tovetumagana saꞋeyana tobohiyana yana koyona faꞋina gisimana ada badi Yaubada keke hidavetumaganeni-ma hivedewayaugidi. Medema keke gidalubodani.
7 Tu omi tovetumagana buye wavekwavekwageya-yo wasimasimana ma keke hagihagina Yaubada matane. Au mema huluva koyona ma vaita keke Yaubada yana eda againe wadanunaudadana. KaꞋi tobohiya saꞋeyana againiya ginakivekoyo tu unaꞋatuvefaꞋilena, au medema gilubodana. Kadu kaꞋi tamo ya mani o ya lokoloko ginakiꞋafuna tu unaꞋatuvefaꞋilena, au medema gilubodana.
8 Tu omiꞋiyao ma keke tobohiyamiyao yadi kivekoyo wadaꞋatuvefaiꞋileni. Au taumiyao tobohiyamiyao wakikivekoyodi, badi agaidiya wakikaiꞋafu. E, tobohiyamiyao nonogana hidedemi wahuluhuluva.
9-10 Wanogali! Badi tova moyaꞋaina hihuluhuluva koyona amanadi keke-moꞋa Yaubada yana abageya yana yoꞋogaga buye hinaluku. Keke wananuwanuwafani. Hida kalivai-dina keke hinaluku higa udoꞋudodiyao,
o badi balauma agaidiya hivetuvetumagana,
o kaliva vavinena gikiloweni tu mali vevine buye hidauda, meda anafaiweya kwamayoku mali kaliva buye hidauda,
o badi kaliva hivetuvetubo o kaꞋi vevine hivemavemai,
o kikaiꞋafudiyao o badi matadi giꞋalalaka,
o badi gufa koyona ana yu-faꞋila againe hivekwavakwava,
o toveyaina o tomunugakaiꞋafu,
e hida kaliva koyodiyao adi loi keke Yaubada yana abageya yana yoꞋogaga buye hinaluku.
11 Boi tuwaina aimo keke wadavetumagana ana toveya, tufoimi mena kaliva koyodiyao adi loi amine wahuluhuluva. Tu Kaiwabu Yesu Keliso ana eganeya kadu yada Yaubada AluꞋaluwana yana faiwala againe ahe watowa be wayegayega, Yaubada yana yoꞋogaga faꞋina ahe gisevehailemi be Yesu Keliso againe wahawahegemi, ada omi kaliva yegayegamiyao Yaubada matane.
Wowoda kanaꞋitaveꞋavina be againe Yaubada ana egana
kanakilakahina.
12 Tu tufoimi wagahe wagayo, “Keke tamo gavadi hawahawatana iya faꞋikuya. Au dewa moyaꞋaina akufaiweya.” Au wagahe velemona tu keke dewa moyaꞋaina agaidiya yamumu kananuhagani. Taumadi dewa moyaꞋaina akufaiweya tu dewa tufona keke ganahuluvini be dewai-nadi keke ginavehimeyeku faꞋina.
13 Kadu tufoimi wagahe wagayo, “AꞋa kamoda ana giba, ada kamoda gidadauda be aꞋa kanaꞋana faꞋina.” Hidedemi wagahe tu aimo tova mulina Yaubada yana vehimeya againe aꞋa ginahavaina, kadu kamoda ginahavaina. Tu wowoda ma keke gidadauda be kanaꞋudoꞋudo faꞋina, keke. Wowoda gidadauda be Kaiwabu yana giba faꞋina, kadu Kaiwabu givehivehimeyena be gidadauda yamumuna.
14 Yaubada yana faiwala againe Kaiwabu wowona alikeya gisivemididina, kadu meda anafaiweya ide ginasivemididida.
15 Wanogali! Omi wowomi Yesu Keliso wowona talaina. Wowoku Keliso wowona talaina faꞋina, keke wowoku kwamayoku yamayamadadana wowona buye ganaveꞋatutamoꞋaini, keke-moꞋa.
16 Hai kaliva wowona kwamayoku yamayamadadana wowona buye hinaveꞋatutamoꞋaina, medema wowodi au givesaꞋeya ma maꞋi wahalamanena o keke? Meda Veyao Tuwaina ana buki kaliva kwamayoku yadida faꞋina gigahe gigayo,
Badi adiꞋiselu hinavewowotamoꞋai.
17 Tu hai kaliva nuwana Kaiwabu nuwana buye ginaveꞋatutamoꞋaina, medema Kaiwabu buye hiveꞋaluwatamoꞋai.
18 Dewa udoꞋudona wanavekwaulaugena. Mali dewa koyona keke kaliva wowona ginakivekoyoni, tu kaliva yana dewa udoꞋudona againe tauna wowona ginakivekoyona.
19 KaꞋi mene wahalamanena omi wowomi AluꞋaluwa Mahalina yana manuwa? Higa Bana Yaubada omi agaimiya gihawahegeni-yo nuwahinagemiya gimimiyami. Wowomi keke taumiyao yami giba. Omi Yaubada yana giba.
20 FaꞋina fata lakahina againe gitutuvehobumi be yana giba faꞋina. Hidema faꞋina keke wowomi dewa koyona againe wanahawahegeni, au wowomi wanaꞋitaveꞋavina be yami dewa hagihagina againe kaliva Yaubada ana egana hinakilakahina.