Folo yana leta KOLOSI tovetumagana agaidiya
Folo Loma deliya gimiyami tu hida miKolosi yadi leta kadu Filimoni bana kwanamiKolosi ma yana leta giꞋetoladidi, ada badi Tikiko kadu Onesimo hinauwena. Kolosi Efeso ana wabolimaneya meda Esiya ana fafaliya. Keke Folo tauna yana laumamala againe Kolosi ekelesiya gidatubuyemu tu Folo Efeso gimiyami ana toveya, Efafilasi Kolosi againe giꞋiveninisena be ekelesiyai-nadi giꞋivetubuyemaunina. (Kolosi 1:7) Kadu melala luhei Kolosi awaꞋawanine hidauda-ma agaidiya Efafilasi gififaisewa higa Leyodisiya Hilafolisi. (Kolosi 4:13) Folo melalai-dina agaidiya tovetumagana keke gidaꞋitadi nonogana badi faꞋidiya ginuwanuwa lakahina.
Bana Efafilasi Folo againe giꞋela tovehawala veꞋalololodiyao faꞋidiya givenuwaꞋatana, ada Folo hida miKolosi yadi leta giꞋetoladina be higa tofwaya keke hinanuwaꞋabiyedi. Yadi fwaya hidede amine, higa vaita tovetumagana gilubodadi be tokikaiwabu kadu tofaiwala vaita tovenuwaꞋata amine lobama hinafane himimiyami-ma hinahawadavadavadi. KaduꞋe Yesu keke Yaubada ana itaꞋita amine au vaita tamo lobama ana tovenuwaꞋata amine. Kadu wowo ana tomogolota ada Mosese yana vehimeya tulina tulina adi itaveꞋavina faꞋina hilauꞋage.
Au hidemi yadi vehawala tu Folo miKolosi leta againe gikivetuvetunudi higa Keliso ana itaꞋita au Yaubada ana itaꞋita amine, yadi kaiwabu leleleya, ada BanaꞋe lobama babi adi ToꞋaibubuna kadu tovetumagana adi yoꞋo Bana uꞋudi. Keliso anakaibe kibababala kadu miya hagihagina inubana. Leta dobona hidede amine.
Lusiule. 1:1-2
Folo yana vesiule yana veꞋoꞋola miKolosi faꞋidiya. 1:3-14
Keliso yana kaiwabu kadu yana faisewa faꞋina. 1:15-23
Folo yana faisewa ekelesiya faꞋidiya. 1:24-2:5
Keliso ana miyaveꞋavina kadu tovehawala veꞋalololodiyao adi dibutoyoga faꞋina. 2:6-3:4
Gava dewa tovetumagana wanuwadi ivaguna ma adi lauboda faꞋina. 2:6-3:4
LauꞋage kadu lukafoi tulina tulina. 4:2-18
1
Yo siule tobohiyakweyao moyaꞋaimi Kolosi againe. Iya Folo Yaubada givegideku be Yesu Keliso yana kabu ganavaina higa yana afositolo adi maka giveleku. Iya Folo kadu tobohiyada Timoti yama lusiule agaimiya. Omi Yaubada yana kaliva yana vevine mahamahalimiyao Kolosi againe yami leta gaꞋetoladina be wanaꞋitana. Omi higa tobohiyameyao dibudibumuhigimiyao Yaubada yana yoꞋo agaidiya, Keliso buye waveꞋatutamoꞋaimi amanadi. Tu Yaubada Tamada ginanuwadogemi kadu aseꞋasemi ginakiveniwalovina.
Folo miKolosi faꞋidiya Yaubada againe givesiule.
Keke gavana faꞋina tu omi faꞋimiya aveꞋoꞋola againe tova moyaꞋaina Yaubada yada Kaiwabu Yesu Keliso Tamana againe avesivesiule. Valeyami anogalina faꞋina avesivesiule, higa Yesu Keliso againe wavetuvetumagana kadu Yaubada yana kaliva yana vevine mahamahalidiyao moyaꞋaidi faꞋidiya wahawahawahegemi. Mena yami vetumagana kadu yami hawahega inubana ma yami lulauboda higa vaita aimo lobameya wanaluku-yo Yaubada omi faꞋimiya gavaimi yamuyamumu-Ꞌowogina gikidewedewena-ma wananuhagana. Ada Yaubada medede amine omi faꞋimiya gikidewadewa-yo walulauboda ma ahe wanogalina boi tuwaina Yaubada bonana velemoꞋena higa VenuwaꞋata Yamumuna omi agaimiya gimidilakayemu ana toveya. Ada mena VenuwaꞋata Yamumuna omi agaimiya gilakayemu-ma kadu fafali tulina tulina agaidiya giveꞋaliyahega, ada kaliva hinogalini-yo guwana yamumuna yadi dewa againe hiseseyemaunena. Meda anafaiweya omi agaimiya giveꞋaliyahega faꞋina guwana yamumuna waseseyemaunena, boi tuwaina Yaubada velemoꞋena omi ginuwadogemi ma wamidinogalina kadu waꞋayaunena ana toveya be wanunauwena tova adamoya. Yaubada velemoꞋena ginuwadogemi ma Bana Efafilasi givehawalemi. Efafilasi faꞋina ganagahe. Bana Keliso yana tofaisewa anafaiweya imeꞋeyao ada nuwanuwama banaꞋe. Kadu bana vaita ime loseyanima amine, Keliso yana faisewa againe kaliva dibudibumuhigina. Ada Yaubada AluꞋaluwana givemagami-yo hawahega ana nuwanuwa againe wamimiyami ma valeyami au hidede amine Efafilasi givenuwaꞋatama. +
Folo yana veꞋoꞋola miKolosi faꞋidiya.
Mena valeyami anogalina faꞋina, omi faꞋimiya aveꞋoveꞋoꞋola tova moyaꞋaina. Tuwaina valeyami amidinogalina againe avebutu aveꞋoveꞋoꞋolemi kadu keke adaꞋilova. AveꞋoveꞋoꞋola be gavaimi Yaubada nuwanuwana omi wanadewa medemi yana nuwanuwa wanahalamane-hagihagiyena. E, aveꞋoꞋola be Yaubada AluꞋaluwana nuwami ginakifoleni-yo Yaubada yana nuwanuwa ana halamana againe omi wananuwahalamana-moꞋa. 10 Medede amine aveꞋoꞋola be higa gava dewa Kaiwabu yana kaliva gilubodadi, medede amine wanahuluhuluva, ada yami dewa matatabuna againe Bana nuwana wanakiveyamumuna. Ada kadu gugai hagihagina tulina tulina againe guwami wanaseseyemaunena, ada Yaubada ana halamana guwana agaimiya ginakabu-faꞋila. 11 KaduꞋe aveꞋoꞋola be Tokaiwabu-moꞋa yana faiwala amine ginafaiwalavelemi-yo wanafaiwala-moꞋa be higa vita tulina tulina ginalakayemu againe yami wavemwamwala wanaꞋasevatu kadu wanaꞋatuvefaꞋila. 12 KaduꞋe aveꞋoꞋola be Tamada againe wanavesivesiule, faꞋina giꞋihagihagiyeda-yo yana lokolokofou moyaꞋaina againe ide ada duꞋu adafaiweya kananuhagana. E, gavadi gavadi yana lokolokofou moyaꞋaina yana kaliva mahamahalidiyao faꞋidiya yana abaga mahamahalina againe gikidewedewena, medema kadu ide ada duꞋu adafaiweya kananuhagana. Au hidede amine omi faꞋimiya aveꞋoveꞋoꞋola. 13 Bana Tamada uyuyu ana abavehimeya againe gilugolegoleda ada NatuꞋaseꞋasena yana yoꞋogaga agaidiya gisedamaneda be yana itaveꞋavina againe kamimiyami. 14 Ada ide Yaubada Natuna buye kaveꞋatutamoꞋaida-ma ada aiyauga kanuhagana. Yada dewa koyona faꞋina yogoyogonideyao kamiyami tu Bana Keliso gitutuvehobuda, higa yada koyona ana laufata Bana giseni tu Yaubada yada koyonai-dina giyawelidi. +
Keliso yana kaiwabu faꞋina.
15 Ide babiya kamimiyami-ma keke adafaiweya Yaubada kadaꞋitani. Yaubada hai ana halamana? Bana Keliso ana itaꞋita au Yaubada ana itaꞋita amine faꞋina, Yaubada ana itaꞋita Keliso againe kaꞋitahalamanena. BanaꞋe au Yaubada Natuna anakaibeꞋu-moꞋa, ada gaitoma moyaꞋaidi iꞋibubunidi gitubuhegedi. 16 FaꞋina Yaubada gigahe-yo Natuna gaitoma matatabudi iꞋibubunidi lobameya kadu babiya gibubudi. Yaubada gigahe-yo gaitoma moyaꞋaina kaꞋitaꞋitadi kadu keke kadaꞋitaꞋitadi-ma gibubudi. Yaubada gigahe-yo lobama ana kaliva kikaiwabudiyao gibubudi, kaꞋi tokikaiwabu o kaꞋi tofaiwala o kaꞋi tovehimeya o kaꞋi kauveya tulina tulina au matatabudi gibubudi. E, Yaubada yana nuwanuwa Natuna givelena be gaitoma moyaꞋaidi iꞋibubunidi gibubudi be higa Bana yana giba faꞋina. 17 Boi tuwai-lokalokana gaitoma moyaꞋaidi iꞋibubunidi aimo keke ana toveya, Keliso gimiyamiya-vagata, ada ahe gibubudi-yo Bana yana vehimeya againe gaitoma moyaꞋaidi adi ivi tulina tulina agaidiya givefota-vagahidi be himimiyami. 18 Ada ide tovetumagana ada yoꞋo vaita Keliso wowona amine, ada BanaꞋe Tauna ma uꞋuda. BanaꞋe againe gaitoma moyaꞋaina hiveꞋinuba. Bana yana mididi-havagi wai ginagona ada au ide yana yoꞋogaga yada mididi-havagi wai ginamulina. Au hidedemi Bana wai ginago-moꞋena be higa gaitoma moyaꞋaidi ginakaiwabuhegedi. 19 FaꞋina Yaubada nuwanuwana yana kaiwabu matatabuna againe Natuna ginadodobodabodana be higa ana itaꞋita meda Natuna ana itaꞋita ginamiyami. 20 Kadu Yaubada nuwanuwana Natuna yana alika againe yana aibubuna matatabuda ginaveyaoyeda. Tuwaina ide tomiyababi kadu badi tomiyalobama vaita Yaubada nibaineyao amine kamiyami tu Yaubada Natuna kelose againe giꞋalika be dayagina gimadu faꞋina, ide babi ana kaliva kadu badi lobama ana kaliva Bana Yaubada buye kaveyao. + +
Keliso yana faisewa guwana ide faꞋideya.
21 Tu omiꞋiyao ma boi tuwaina wanuwanuwa koyona kadu wadewadewa koyona faꞋina, keke Yaubada yana yoꞋo agaidiya wadamiyami, au Bana nibaineyao amine wamiyavehaila. 22 Tuwaina omi Yaubada nibaineyao tu tova adamoya giveyaoyemi. Bana Natuna givekaliva be kelose againe giꞋalika-yo Yaubada Tauna giveyaoyemi, be higa aimo tova mulina Keliso omi mahamahalimiyao keke tamo yami wakoyona Yaubada matane ginavegaꞋaulemi, ada medema tovai-nadi keke tamo hakwadi anafaiweya yami dewa faꞋina ginadakeyemi. 23 Omi Keliso againe wavetumagana. KaꞋi tova moyaꞋaina yami vetumagana againe wanaꞋatuvefaꞋila be keke wananuwanuwaluga, au mahamahalimiyao Yaubada matane ginavegaꞋaulemi. Kadu kibababala ana VenuwaꞋata Yamumuna ahe wanogalini-yo Yaubada omi faꞋimiya gavadi yamuyamumu-Ꞌowogina gigaheyena, medema faꞋina wavebutu walulauboda. KaꞋi tova moyaꞋaina mena yami lulauboda wanakidonena tu keke wananuwayewa, au Keliso Yaubada matane ginavegaꞋaulemi. Yaubada yana kaliva mena VenuwaꞋata Yamumuna tomiyababi fafali moyaꞋaina agaidiya ahe hilumamalena, ada iya Folo mena VenuwaꞋata Yamumunai-nadi ana laumamala againe gavetofaisewa. +
Folo yana vedivediwe tovetumagana adi yoꞋo faꞋidiya.
24 Tu tova adamoya omi faꞋimiya aulolo tagiya ganuhagana faꞋina gavemwamwala. Omi Keliso yana yoꞋogaga ma vaita wowona amine. Adamoya omi faꞋimiya aulolo tagiya ganuhagana faꞋina, Keliso yana vedivediwe Tauna wowona higa yana yoꞋogaga faꞋidiya aimo keke gidahavaini-ma tauku wowokuya galuluyabuna, ada au gavemwamwala. 25 Ada Yaubada givegideku be Keliso yana yoꞋogaga adi itaveꞋavina againe gavetofaisewa. E, Yaubada aku vehimeya giveleku be higa Bana bonana matatabuna omi agaimiya ganahawavemogatale-Ꞌowona. 26 Tuwai-lokalokana aituha a gavaiyehi ada kaliva adi hewahewa a gavaiyehi gihavaidi be Yaubada mena yana nuwanuwai-nadi gisevauyena, ada kaliva keke hidahalamaneni. Tu tova adamoya yana nuwanuwa sevasevauyana yana yoꞋo mahamahalideyao agaideya gihawavemogatalena. 27 E, hidema Yaubada ana inuba higa yana nuwahinage gavayamumu kadu gavakaiwabu omi yoꞋo tulimiyao kalivai-mina fafali tulina tulina agaidiya giseyemaunena be ide yana yoꞋo mahamahalideyao agaideya gihawavemogatalena. Ada mena nuwahinage hidede amine. Keke ime miYudagaga agaimeya Keliso gidamiyami, au kadu omi yoꞋo tulimiyao kalivai-mina agaimiya gimimiyami. Ada Tauna nuwahinagemiya gimimiyami faꞋina, aimo Yaubada buye wanakaiwabu ana tova walulubodena. 28 Bana Keliso alulumamalena. Yama wanuwahuya kaliva moyaꞋaidi akivetuvetunudi kadu avehavehawaledi be higa kaliva vevine saꞋeyana saꞋeyana Keliso buye hinaveꞋatutamoꞋaidi be ana halamana againe hinaveꞋasevatu-yo Yaubada matane anavegaꞋauledi. 29 Nuwanuwaku kaliva moyaꞋaidi Keliso ana halamana againe hinaveꞋasevatu faꞋina, gafifaisewa toyogina. Keliso yana faiwala lakahina againe gikivetoyogi-moꞋeku amine, mena yaku nuwanuwai-nadi faꞋina gafifaiwala gafifaiwala tova moyaꞋaina. +
+ 1:8 Ef 6:18 Ef 1:13,15, 1Fi 1:3-4 + 1:14 Fl 1:27, Ef 2:10 Ef 1:18-19 Ef 6:12 Ef 1:7-8 + 1:20 Yo 1:18 Yo 1:3 Yo 1:1 + 1:20 Ef 1:22-23 Kl 2:9 Ef 2:16 + 1:23 Ef 2:3 Ef 2:14-16 Hi 6:11 + 1:29 Ef 3:3-6 Ef 1:18-19 Ef 4:13 1Ko 15:10