Folo yana leta FILIMONI againe
Bana Filimoni wakalivana kadu Kolosi ana toꞋekelesiya bana saꞋeyana. Tuwaina kaliva saꞋeyana ana egana Onesimo gikimonena bana ana agetoga faꞋina, tu Onesimo yana tovehimeya giꞋotayabuyabuna. GiꞋota be ginauna tu Loma againe gilakayemu ada Folo deliya gimiyami-ma ginuhagana. Folo yana lukahihi againe Onesimo Yesu givetumaganena.
Himiyami tu Folo Onesimo giveyewana ada Filimoni yana leta giꞋetoladina be Onesimo ginanauwena. Tu leta againe gihawanuwenuwena be higa yana wavemwamwala Onesimo ginavegaꞋaulena, keke vaita ana agetogagaga tu kadu tobohiyana amine Yesu yana yoꞋogaga agaidiya. Leta dobona hidede amine.
Filimoni ana lusiule. 1:1-3
Filimoni ana vesiule Yaubada againe. 1:4-7
Folo Filimoni giveꞋoꞋolena Onesimo ana vegaꞋaula faꞋina. 1:8-22
Lukafoi tulina tulina. 1:23-25
1
Yo siule tobohiyanuwaku Filimoni, oꞋeni Yesu Keliso yana tofaisewa anafaiweya kadu iyaꞋeku. Iya Folo deliya hiseku be Yesu Keliso faꞋina yogoyogoniku gamimiyami amanadi ya leta gaꞋetoladina be unaꞋitana. Iya Folo kadu tobohiyada Timoti yama lusiule againiya. Kadu nouda Afiya be natuda Akifo bana ama nimavelu Keliso faꞋine ime buye alulugaviya amanadi, be kadu tovetumagana ami yoꞋo yami manuweya hivagavagaꞋauta-ma yama lusiule badi agaidiya. Yaubada Tamada kadu Kaiwabu Yesu Keliso hinanuwadogemi kadu aseꞋasemi hinakiveniwalovina.
Folo bana Filimoni faꞋina Yaubada againe givesiule.
Siule Filimoni, yaku veꞋoveꞋoꞋola againe o faꞋiniya yaku Yaubada againe gavesivesiule. Valeya ganogalina faꞋina Yaubada againe gavesivesiule, higa Yaubada yana kaliva yana vevine mahamahalidiyao moyaꞋaidi faꞋidiya uhawahawahege-moꞋe kadu Kaiwabu Yesu againe uvetuvetumagana-moꞋa. Iya gaveꞋoꞋola be Keliso ana vetumagana againe oꞋeni ime buye kavetobohiyana-yo gaitoma moyaꞋaidi yamumudi Keliso againe hiyemuyemu-ma unahalamane-hagihagiyedi. Tobohiyaku, ya hawahega againe Yaubada yana yoꞋogaga adi ayauna ukivehavehagina faꞋina, mena ya hawahega againe kadu iya aku ayauna ukivehavehagina be gavemwamwala lakahina. +
Folo nuwanuwana Filimoni bana Onesimo ginavegaꞋaulena.
8-9 Keke gavana faꞋina tu o kaliva hawahawahegani faꞋina, hawahega amine ganaveꞋoꞋole. Keliso aku vehimeya giveleku faꞋina, iya akufaiweya vehimeya amine ganavehimeye be gaitoma saꞋeyana unagana. Atu keke vehimeya au hawahega amine ganaveꞋoꞋole, iya Folo gavesilakahi ada adamoya deliya hiseku-yo iya Yesu Keliso faꞋine yogoyogoniku gamimiyami amanadi. 10 Natuku Onesimo faꞋine gaveꞋoꞋole. Deliya gamiyami tu Keliso ana vetumagana againe gahawavenatunena. 11 Tuwaina banaꞋe a agetoga ma keke-moꞋa againiya gidaꞋigibagiba hagihagina, tu tova adamoya nuwana giꞋavilani-yo anafaiweya o ginaveluga kadu iya ginavelugaku.
12 Au againiya gaveyewana bana natuꞋaseꞋaseku amanadi. 13 Nuwanuwaku ma higa vaita gadahawatana be gidabwaꞋuliku, ada VenuwaꞋata Yamumuna faꞋine be deliya gamimiyami againe gidavelugaku vaita o loseyani amine. 14 Atu auwe keke ganahawatani faꞋina nuwanuwaku nagona ya nuwanuwa bana faꞋine ganahalamanena, ada kaꞋi o unanuwakabubuyeku digo, nuwanuwaku tauni ya nuwanuwa amine unahawahegena, keke luyaꞋayaꞋala faꞋina. 15 KaꞋiwa, kaꞋi bana Onesimo ginuyabuyabu-yo tova kabisona gimiyavehaile be higa ginayewana againiya ginamiya-vagata. 16 Againiya ginayewana keke vaita agetogagaga amine. Au yana miya agetoga yadi miya ginatubuhegena, higa adamoya bana tobohiyanuwada. Iya nuwanuwaku lakahina banaꞋe, tu oꞋeni ma ya nuwanuwa bana againe gavatubuga! Bana a agetoga kaduꞋe o taini Kaiwabu yana yoꞋo agaidiya.
17 Medema faꞋina kaꞋi velemoꞋena o mataniya kavetobohiyana, au ya wavemwamwala unavegaꞋaulena vaita iya udavegaꞋauleku amine. 18 Gavadi gavadi yana koyona o kaꞋi ana buki againiya medema unavenuwaꞋataku be iya ganalaufata. 19 Iya Folo tauku nimakuya hidede amine gaꞋetoladina higa iya tauku matatabuna ganafatana. Atu kaꞋi nuwa ginunauyena higa yaku kivetuvetunu againe yawai ivaguna unuhagana faꞋina vaita iya agaikuya o udabuki be unalaufata. 20 Siule tobohiyaku, Kaiwabu Yesu faꞋina yaku veꞋoꞋola amine udanuwakabubuyeku. Ide Keliso yana kaliva faꞋina, udanuwakabubuyeku-yo aku ayauna udakivehavehagina. 21 Yaku nuwanuwa hidemi ya leta againe gaꞋetoladina ada gavetumagane higa wona velemona bonaku wanaꞋabina, e gavaimi unaga ma yaku veꞋoꞋola ginatubuhegena.
22 KaduꞋe yaku nuwanuwa saꞋeya-moꞋena faꞋina ganagahe. Yaku abadauda ya manuweya unaꞋihagihagiyena, faꞋina ganuwaveꞋavina Yaubada moyaꞋaimi yami veꞋoꞋola ginavenogalena be higa deliya ginayauku-yo agaimiya ganayewaꞋela. +
Folo yana lukafoi.
23 Bana Efafilasi Yesu Keliso ana vetumagana faꞋina deliya buye amimiyami-ma gilukafoiyemi. 24 Kadu badi Keliso yana tofaisewa anafaiweya iyaꞋeku ma yadi lukafoi, Maki Alisitako Dimasi Luke. 25 Ada iya gaveꞋoꞋolemi be Kaiwabu Yesu Keliso yana nuwadoga aluꞋaluwamiya wanaꞋayaunena.
(Iya Folo bonaku.) +
+ 1:7 Lo 1:8-9 Kl 1:9 + 1:22 Kl 4:9 2Ko 9:7 Ga 6:11 Fl 1:25 + 1:25 Kl 1:7, 4:12 Kl 4:10, 2Ti 4:10-11, Af 16:10