7
Yaubada yana tofaisewa gisetagodi.
1 Yaubada yana ilaꞋa yana lakayemu gaꞋitana tu kadu gaꞋenoꞋita. Lobama ana tovenuwaꞋata fowa babi matatabuna himidififina-ma gaꞋitadi, ada bolimana matatabuna hihawatadi, yavalata bolimana newalidebola newaliꞋoya be higa keke avaleya o lehageya ginamadu kadu keke tamo ai lukumina ginalewalewa.
2 TovenuwaꞋata fowa gaꞋitadi tu kadu tovenuwaꞋata velugana kauwana abalakavine gilaka-ma gaꞋitana, Yaubada yana abasetagona giꞋabina. Badi tovenuwaꞋata fowa agaidiya gikovaꞋawafatafata, badi Yaubada gihawahegedi be avala lehaga kadu ai bolimana yadi madu againe hinakivekoyodi-ma kalivai-dina.
3 Gikovadi gigayo, “Keke avala o lehaga o ai wanamadukivekoyodi tu nagona yada Yaubada yana iyaꞋiyaya againe yana tofaisewa debaꞋaidiya anaꞋatuvefotana higa anasetagodi.”
4 Gisetagodi-yo adi kilagalaga ganogalina higa miIsileli adi yoꞋo saꞋeyana saꞋeyana agaidiya kaliva gisetagodi-ma adi veꞋatutamoꞋaina 144,000 (hanaledi foti fowa tausani).
5-8 Yuda ana yoꞋo agaidiya 12,000 gisetagodi.
Lubeni ana yoꞋo agaidiya 12,000 gisetagodi.
Gada ana yoꞋo agaidiya 12,000 gisetagodi.
Asa ana yoꞋo agaidiya 12,000 gisetagodi.
Nafitalai ana yoꞋo agaidiya 12,000 gisetagodi.
Manasa ana yoꞋo agaidiya 12,000 gisetagodi.
Simiyoni ana yoꞋo agaidiya 12,000 gisetagodi.
Livai ana yoꞋo agaidiya 12,000 gisetagodi.
Isaka ana yoꞋo agaidiya 12,000 gisetagodi.
Sebuloni ana yoꞋo agaidiya 12,000 gisetagodi.
Yosefa ana yoꞋo agaidiya 12,000 gisetagodi.
Beniyamina ana yoꞋo agaidiya 12,000 gisetagodi.
Mena yoꞋo kalivai-dina 144,000 Yaubada yana iyaꞋiyaya againe gisetagodi.
YoꞋoyoꞋo lakahi-moꞋedi Yaubada hihawadavadavana.
9 Tu muliya kadu gaꞋenoꞋita ada auheꞋama yoꞋoyoꞋo lakahi-moꞋedi matakuya himidi, adi kilagalaga ma keke tamo hakwadi anafata. Badi fafali tulina tulina kadu yoꞋo tulina tulina hiveꞋinuba, e adi loi tulina tulina meyadi tulina tulina. Yaubada yana didigaꞋuꞋu wamagigine kadu Sifi kabiꞋona buye matadiya himidimidi. Kaleko kwayakwayana againe hivaigau ada bodaboda didina hiꞋabiꞋabina.
10 Ada hikovaꞋawafatafata higayo,
Yada Yaubada didigaꞋuꞋuya givetogana-ma
kadu yana Sifi kabiꞋona agaidiya
ada kibababala giveꞋinuba.
11-12 Lobama ana tovenuwaꞋata matatabudi Yaubada yana didigaꞋuꞋu kadu tomiyalobama adi tonagona kadu gaitoma wayawaidi fifiwaladiyao adivefowa himidififidi. DidigaꞋuꞋu wamagigine hiꞋiboꞋula-moꞋa be Yaubada hihawadavadavana higayo,
Yada nuwanuwa hidede amine.
Yada Yaubada kanadavadavana,
kanakivekaiwabuyena kanavesiuleyena,
yana nuwahuya, yana abavehimeya
yana faiwala faꞋina kanakilakahina.
E, BanaꞋe kanaveꞋamohimohinena
tova inaga inaga keke ana abalauyabu.
Ehe hidedemi.
Au hidedemi yoꞋoyoꞋo matatabu-moꞋedi yadi kwelidavadava.
13 Tu tomiyalobama adi tonagona saꞋeyana gitoliyeku gigayo, “Badi kaleko kwayakwayane hivaigau-ma badi gaveyao, hami eda hiꞋelaꞋela?”
14 Iya gabonalaufata gagayo, “Kauveya, o uhalamanena.”
Ada bana gigayo, “Badi veꞋumagigi lakahi-moꞋena hinagene hiyemuyemu. Nuwahinagedi ana vaigau Sifi kabiꞋona dayagine hikolana be gikwaya-moꞋena.
15 Au hidedemi hiyegayega faꞋina,
Yaubada yana didigaꞋuꞋu wamagigine himimiyami
ada uyadayada be bogi Yaubada yana manuwa
wese lobameya Bana matane hifififaisewa.
Ada Bana didigaꞋuꞋuya givetogana-ma
yana lifi lakahina againe giveꞋaiwaꞋudi.
16 Keke-moꞋa mafu ginalau-havagiledi,
keke-moꞋa agodi ginataina-havagi.
Kauwana lakahina keke ginakabudi,
keke kalalava ginakalalavidi.
17 E, keke tamo vita hinanuhagani faꞋina
Sifi kabiꞋona Yaubada yana didigaꞋuꞋu hinafane-moꞋane
gimimiyami-ma badi yana sifi adi ToꞋitaveꞋavina.
Gufa miyamiya-vagahina ana guya againe ginaveyudi.
Ada Yaubada matailudi saꞋeyana saꞋeyana
ginaluhegehegena.”
Au hidedemi tomiyalobama adi tonagona saꞋeyana givenuwaꞋataku.