En nda ngatꞌa tseꞌe Jesucristo jotsaꞌen kitsiꞌindu
SAN LUCAS
1
Lucas tsiꞌindure Teófilo
1 Ngu ꞌñu nkjin xuta kuamejénre tsja fani tsaꞌen siꞌindu mé= xi Naꞌenna kitsaꞌen ngajinni̱,
2 jo fa tsaꞌen yakuyani̱ xi ꞌndani nga tutsꞌinre ko fa tuxkun tsabenii̱ ꞌba xi kitsaꞌexare nga kitsikjaꞌaxtiuya enre Naꞌenna.
3 ꞌBa jaskan nga je nda tsiningiya yajaa̱ jó fa kuán ꞌndani nga tutsꞌinre, nda= tjin ngatꞌana̱ ngayeje nga tsja fani tsaꞌen siꞌindura̱ kui tsajmibi ji xuta chinga Teófilo,
4 tuxi nda xiani ngatꞌare kjuakixi xi je kisakuyari.
Nga sꞌeya nijmi nga Juan Bautista tsin
5 Nixtjin nga Herodes reyre nangi Judea kuán, ꞌba nde kio tijña jngu naꞌmi xi Zacarías ꞌmi, xi tu jngu xutare Abías. ꞌBa chjunre Elisabet ꞌmi, jngu xi ntjere Aarón.
6 ꞌBa ngojó ꞌñu nda kixi ngixkun Naꞌenchana, ꞌba tsajain xi kiskaninejere, ngatꞌa ꞌñu nda tsikꞌetjusun yeje enre ko kjuatexumare Naꞌenchana.
7 Tunga bi tjinre kiꞌndi, ngatꞌa Elisabet ꞌndi=; ꞌba je ne chinga koni ngojó ngayeje.
8 Ngu jngu nixtjin nga Zacarías ko xi ñatjen tsaꞌexa tsꞌakore nga saꞌexa joni naꞌmi ngixkun Naꞌenchana,
9 ꞌba jotsaꞌen je ngare naꞌmi, tu Zacarías fa tsꞌakore nga kui xi kjuaꞌasꞌen ngaꞌnde tsjere ningu nga kuakare tjingusja Naꞌenchana.
10 ꞌBa yejerañu titi tjingusja, ngatsiꞌi xutankjiun inya ngandetsin ningu nga inyafako Naꞌenchana.
11 ꞌBa kio, Zacarías kuatsejenre jngu ankjere Naꞌenchana, xi sejña nduju ngate kixire yamixa ña tisun tjingusja.
12 ꞌBa Zacarías tu ꞌba= kuánre nga tsabe ankje, ꞌba ꞌñu kitsakjun.
13 Tunga ankje kitsure:
—Zacarías, bi kuin, ngatꞌa Naꞌenchana je kjintꞌe nga kichukue, ꞌba chjunri Elisabet sꞌe̱re jngu kiꞌndi xiꞌin xi tsiji xi Juan kꞌuin_ri.
14 ꞌBa ꞌñu tsja ku̱anri, ꞌba nde ꞌñu nkjin xuta ku̱atsjare ngayeje nga tsin,
15 ngatꞌa kiꞌndiri ꞌñu je ku̱an ngixkun Naꞌenchana. Bi kꞌui binu ninga xan ꞌba tse Isennixtjintsjere Naꞌenchana ngajinre kui kionga kje tsinjín.
16 ꞌBa saꞌen nga ꞌñu nkjin xuta xi naxinanda Israel tseꞌe kjuaꞌe ngani ngixkun Naꞌenchana xi Naire mani.
17 ꞌBa kui sejñajinre isennixtjinre ꞌba ko kjuaꞌñure profeta Elías. Kui kuajetitjunre Naꞌenna, ꞌba saꞌen nga xi xicha ma ko xi kiꞌndi ma nda kuaꞌa ngani xinkjin, ꞌba nga xi xtan sikꞌantjaiya kjuafaꞌetsjenre tuxi ku̱anire sikꞌetjusun. ꞌBa ꞌbitsaꞌen sikꞌejñanda naxinando nga skjebetjo Naꞌenna —kitsu ankje.
18 ꞌBa Zacarías tsiningiyare ankjebiu:
—¿Jótsaꞌen skuekixiña̱ kibiu? Ngatꞌa je ne chingaa̱, ꞌba chjunna̱ ngayeje.
19 ꞌBa ankjebiu kitsingojore:
—An Gabriel= ña̱, ꞌba ngixkun Naꞌenchana tejñaa̱; ꞌba kui kitsikasenna̱ nga kjuakora̱ ji ꞌba xinra̱ en xi nda.
20 Enna̱ kꞌuetjusun nixtjin nga tjinnere nga ꞌba ku̱an. Tunga ngatꞌa bi kuakjainri en xi kixinra̱, ku̱anima=ni ꞌba bi ku̱an kuinukjuai ꞌnda nga ku̱an yeje kibi.
21 ꞌBa yejerañu, xutankjiun inya ngandetsin ningu nga inyakuyare Zacarías ꞌba tu ꞌba= kjimare nga tjiꞌbandayare nga tjiꞌbetju.
22 Tunga kionga tukjiaꞌa ꞌetju, ꞌba bi ma fako xuta xi kio tjindu; ꞌba ꞌbatsaꞌen kuankjinre nga tjin xi kuatsejenre ngaya ngaꞌnde tsjere ningu, ngu tu chuba= tsaꞌenre ko ntsja nga fako. ꞌBa tojo bi kuán kinchja.
23 ꞌBa nga Zacarías je kitsijngu xare joni naꞌmi, kiji ngani ndaba.
24 ꞌBa bi ꞌñu nkjin nixtjin jaꞌa, ꞌba Elisabet xi chjunre kisꞌeyaꞌmore kiꞌndi, ꞌba ón sa bi ꞌetju ndaba. ꞌBa kitsu:
25 “Naꞌenna ꞌbi kitsaꞌen ngatꞌana̱ nga jaꞌanimara̱, tuxi kjuaꞌaxinni kjuasuba xi tjinꞌinna̱ ngatꞌare xi yakꞌa.”
Nga jngu ankje beꞌe nijmi nga tsin Jesucristo
26 Kionga je jaꞌa jon sa, Naꞌenchana kitsikasen ankje Gabriel jngu naxinandare nangi Galilea xi Nazaret ꞌmi.
27 ꞌBa kui kikun jngu chjun xungu xi María ꞌmi xi je tijñangi kjua nga kuixanko jngu xuta xi Kuse ꞌmi, xi ntjere rey David.
28 ꞌBa ankje jaꞌasꞌen ngaꞌnde ña María tijña, ꞌba kitsure:
—Tsiteꞌndara̱ ji xi je kisakuri kjuandare Naꞌenchana. Kui= tijñakori. ¡Ndari ji ngajinre ngatsiꞌi yanchjin!
29 ꞌBa nga María tsabe ankjebiu ꞌba kjintꞌe enre, kuakunre ꞌba miningiyare yojore mé= xi tsunire kjuateꞌndabiu.
30 ꞌBa meni ankjebiu kitsu nganire:
—María, bi kuin. Ngu je kisakuri kjuanda ngixkun Naꞌenchana.
31 Ngandaꞌe nde kiꞌndi sꞌe̱yaꞌmori: sꞌe̱=ri jngu kiꞌndi xiꞌin, ꞌba Jesús kꞌuin_ri jaꞌenre.
32 Kui jngu xuta xi ꞌñu je ku̱an, ꞌba Kiꞌndire Naꞌenchana xi tijña ngankꞌaa kꞌuinre. Naꞌenchana saꞌen nga kui rey ku̱an joni rey David xi xuta chingare.
33 ꞌBa kuatexumantsjaire naxinandare Jacob, ꞌba kjuatexumare bi kjuetꞌa —kitsu ankjebiu.
34 ꞌBa María tsiningiyare ankjebiu:
—¿Jótsaꞌen ku̱anni kibi? Ngu bi tjinna̱ xiꞌin.
35 ꞌBa ankjebiu kitsingojore:
—Isennixtjintsjere Naꞌenchana kjuendejenneri, ꞌba kjuaꞌñure Naꞌenchana xi tijña ngankꞌa kueꞌmori ko nkꞌianre. Kui kjuañu kiꞌindi xi tsin tsje ku̱anni, ꞌba Kiꞌndire Naꞌenchana kꞌuin.
36 ꞌBa nde Elisabet, xi xingi, sꞌe̱re jngu kiꞌndi ngayeje, ninga je chinga. Kui xi ꞌndi kikꞌinre tsakaiñu je jon sa nga kui tjiꞌyamore kiꞌndi.
37 Ngatꞌa tumé naꞌenre ngatꞌare Naꞌenchana.
38 ꞌBa ꞌbatsaꞌen María kitsu:
—An chuꞌndare Naꞌenchana= ña̱. Ngatjama ngatꞌana̱ jotsaꞌen ji je kikꞌinnaa̱.
ꞌBa kionga je ꞌbi kitsu María, ankjebiu kiji ngani.
Nga María fikun Elisabet
39 Kui nixtjinbiu, María tsikꞌejñanda ꞌba ꞌñu kitsa kiji jngu naxinandare nangi Judea xi tijñajin ngijñacha.
40 ꞌBa jaꞌasꞌen ndaba Zacarías ꞌba kitsiteꞌndare Elisabet.
41 ꞌBa nga Elisabet kjintꞌe kjuateꞌndare María, kiꞌndiu kitsiteya ngaya ngatsꞌa, ꞌba kui kitse Isennixtjintsjere Naꞌenchana ngajinre.
42 ꞌBa meni ko jngu jnda xi ꞌñu, kitsu:
—¡Naꞌenchana ngisa ꞌñu kitsichikuntaꞌenri ko mare ngatsiꞌi yanchjin xi yakꞌa, ꞌba kitsichikuntaꞌen kiꞌndi xi sꞌe̱ri!
43 Tunga, ¿ꞌyá= nina̱ an, nga nare Xuta chingana̱ kjuaꞌekunna̱?
44 Ngatꞌa nga kjintꞌia̱ kjuateꞌndari, taꞌa kiꞌndina̱ kitsiteya ko kjuatsja ngajinna̱.
45 ¡Á ndaniri ji xi kuakjainri nga ku̱ajngu en xi Naꞌenchana kitsuri!
46 ꞌBa meni María kitsu:
Nga ko fani inimana̱ tsichji_ra̱ Naꞌenchana,
47 ꞌba tsitsjaa̱ ngatꞌa tseꞌe Naꞌenchana xi tsikꞌangina̱.
48 Ngatꞌa je jaꞌanimara̱, an xi chuꞌnda nimare kuán,
ꞌba ꞌndani ngandaꞌe xuta kuetsuntsjaina̱:
“Á ndaniri ji.”
49 Ngatꞌa xi ꞌñu tjinre kjuaꞌñu ꞌba xi tsje je kitsaꞌen tsajmi yaꞌe ngatꞌana̱.
50 Kui faꞌanimare xuta xi bekun,
xi kisꞌe ko xi tjin ko xi sꞌe̱.
51 Yakutsejen kjuaꞌñure nga kitsaꞌen tsajmi yaꞌe,
ꞌba kitsitsojoya xuta xi nkꞌa ꞌbaxje yojore.
52 Jaꞌaxinre kjuaꞌñure xi rey,
ꞌba nkꞌa kitsikꞌendu xi ni̱ma̱.
53 Ko xi nda kitsitsere xi tsajainre xi chine,
ꞌba xi nyina tu tjejen ntsja nga ꞌete.
54 Tsakaseko naxinanda Israel, xi xuta chuꞌndare,
ꞌba bi kichiyajinre nga kjuaꞌanimare
55 jotsaꞌen kitsuyatitjunre xuta chingana
Abraham ko ntje xi jaskan sꞌe̱re
kitsu María.
56 ꞌBa María jánru sa tsikꞌejñako Elisabet, ꞌba jaskan kiji ngani ndaba.
Nga tsin Juan Bautista
57 Kionga je echu nixtjin nga Elisabet sꞌe̱re kiꞌndi, kisꞌere jngu kiꞌndi xiꞌin.
58 ꞌBa kionga xi ndai niꞌyare ko xi xinkjin kjintꞌe nga Naꞌenchana jaꞌanimare Elisabet, ꞌba nde kitsitsjako.
59 ꞌBa xi majinni nixtjin, kuañajan tsiꞌi nga kitsaꞌen circuncidar kiꞌndiu, ꞌba kuamejénre nga jaꞌenre naꞌenre kuaꞌa, nga Zacarías kꞌuin.
60 Tunga nare kitsu:
—Junjun. Juan kꞌuin.
61 ꞌBa kikꞌinre:
—Tunga niꞌyá xi xingi ꞌba ꞌmi.
62 ꞌBa ꞌbatsaꞌen tu chuba= kitsaꞌenre nga tsiningiyare naꞌenre kiꞌndiu, tuxi skueni mé= jaꞌen sjare.
63 ꞌBa Zacarías tsiꞌa jngu yate chi tuxi siꞌinduni ꞌba ꞌbitsaꞌen kitsiꞌindu: “Juan kꞌuin.” ꞌBa ngatsiꞌi xi kio inya tu ꞌba= kuánre.
64 ꞌBa ndekuini chubabiu Zacarías kuán kinchja ngani ꞌba ꞌetutsꞌinre nga kitsichjire Naꞌenchana.
65 ꞌBa ngatsiꞌi xi tjindu tiña ndaba kuakunre, ꞌba ngayéje ngaꞌnde tseꞌe Judea kjiꞌyare mé= xi kuán.
66 ꞌBa ngatsiꞌi xi ntꞌere enbi ꞌejin kakun, ꞌba ꞌbitsaꞌen miningiyare yojore: “¿ꞌYá= tsé ku̱an kiꞌndibi kionga ku̱achinga? Ngatꞌa kjuaꞌñure Naꞌenchana tijña ngajinre.”
Xi se Zacarías
67 ꞌBa Zacarías, xi naꞌenre kiꞌndiu, kitse ngajinre Isennixtjintsjere Naꞌenchana xi kitsikinchja joni jngu profeta nga tsu:
68 Ngatjanichjire Naꞌenchana, Naꞌenre xutare Israel,
ngatꞌa je jaꞌetsindai naxinandare.
69 Je kitsikasenna jngu
xi tjinre kjuaꞌñu nga sikꞌangina,
jngu xi ntjere David
xi kitsaꞌexatꞌare kui.
70 Jo kitsu nixtjin kuatse jan
nga kitsikinchja profeta tsjere
71 nga sikꞌangina ngatꞌare xi tjenngikena
ꞌba ngatꞌare kjuaꞌñure ngatsiꞌi xi stikena,
72 nga kjuaꞌanimare xuta chingana,
ꞌba nga bi sichiyajin ꞌentsje xi je ꞌendako.
73 ꞌBa kui=bi xi kitsu nga kitsjare tsꞌa Abraham xi xuta chingana,
74 nga sindaina ngatꞌare xi tjenngikena,
tuxi bi kjuikunña nga siꞌaxatꞌa_ra,
75 nga ko kjuatsje ꞌba ko kjuakixi kuetsuba ngixkun kui jotjin nixtjin kikaꞌena.
76 ꞌBa ji, kiꞌndi china̱,
profetare Naꞌenchana xi tijña ngankꞌaa kꞌuinri.
Ngatꞌa ji kꞌuintitjun_ri Naꞌenna
nga kꞌuendai ndiyare.
77 Kꞌue_ri nijmi naxinandare ꞌyá xi sikꞌangi,
kionga ku̱achatꞌare jere.
78 Ngatꞌare kjuanima kakun jere Naꞌenchana,
titsikasenjenna ngankꞌaa
jngu ndiꞌi xi sitsejenna.
79 Sitsejenna xi tetsuba ña jñu chun,
ngi nkꞌianre kjuabeyo,
ꞌba sikasen ndiyana nga sakuna kjuaxiu
kitsu Zacarías.
80 ꞌBa kiꞌndiu ngisa machinga ꞌba ngisa kisꞌere kjuaꞌñu inimare. ꞌBa nangi tꞌaxin tsikꞌejña ꞌnda nixtjin nga yakure yojore naxinandare Israel.