16
Nga xuta fariseo ko xuta saduceo miꞌa jngu kjuakun
Mr. 8:11-13; Lc. 12:54-56
1 ꞌBa xuta fariseo ko xuta saduceo jaꞌe tuxi skutꞌayakoni Jesús. ꞌBa tsiꞌare nga saꞌen jngu kjuakun xi kuakutsejen nga Naꞌenchana kitsikasen.
2 Tunga Jesús kitsingojore:
—Kionga mangixun, mixun: “Nda= chun ku̱an, ngatꞌa chun tsjetsje ngankꞌaa.”
3 ꞌBa nga tajñu, mixun ngañu: “Chꞌo chun ku̱an ngandaꞌe, ngatꞌa yufi inya ngankꞌaa.” Mankjinnu mé= xi matsejen ngankꞌaa, tunga, ¿ánñu bi kjimankjinninu xi tisꞌejñatsejen ngandaꞌe?
4 Xuta xi tjin ngandaꞌe inyamiꞌa nga mejénre skue jngu kjuakun, ngatꞌa chꞌokun ꞌba bi kixi inya ngixkun Naꞌenchana. Tunga tume kuakure tu kui sani xi kuataꞌen profeta Jonás nixtjin kuatse jan, kui kjuakunbiu xi sꞌejñatsejenre —kitsu Jesús ꞌba tsakasentꞌaxinre xutabiu.
Nga Jesús ꞌbejña kjuakusun ngatꞌa tseꞌe naꞌyu sanre xuta fariseo ko xuta saduceo
Mr. 8:14-21
5 ꞌBa kionga xutare jaꞌaxtiu xingunda ndachikun, kichiyajinre nga tsakaꞌa niñuxtila.
6 ꞌBa Jesús kitsure:
—Chutsijon ꞌba tikuendo yojonu ngatꞌare naꞌyu sanre xuta fariseo ko xuta saduceo.
7 ꞌBa xutare jonijmiko xinkjin ꞌba kitsu:
—Ngatꞌa kichiyajinna nga kichꞌa niñuxtila kui= kjua ꞌba titsuni.
8 ꞌBa Jesús tsabe mé= xi inyatsure xinkjin ꞌba kitsure:
—¿Ánñu teꞌmini_ru xingiu nga bi kichꞌo niñuxtila? ¡Á tsaꞌen chuba makjainninu!
9 ¿A tojo kje mankjinnu? ¿A bi faꞌetsjennu nga ón niñuxtila yakjanyaa̱ ngajinre ón mi xuta ꞌba jó tjin nisin kjinitsio xkuare?
10 ¿ꞌBa a bi faꞌetsjennu nga yatu niñuxtila yakjanyaa̱ ngajinre ñujun mi xuta ꞌba jó tjin nisinya kjinitsio xkuare?
11 ¿Jó tjinnire nga bi mankjinnu nga bi ngatꞌare niñuxtila nga tenchjaa̱? Tunga chutsejen_ru yojonu naꞌyu sanre xuta fariseo ko xuta saduceo —kitsu Jesús.
12 ꞌBa ꞌbatsaꞌen xutare kuankjinre xi Jesús titsu, nga bi ngatꞌare naꞌyu sanre niñuxtila xi tjinnere nga sikuenda yojore, tu kui xi bakuya xuta fariseo ko xuta saduceo.
Nga tsu Pedro nga Jesús= xi Cristo
Mr. 8:27-30; Lc. 9:18-21
13 ꞌBa kionga Jesús echu nangi xi tijñandaire Cesarea, ña tjinre xa Filipos, tsiningiyare xutare:
—¿Jó tsu xuta, ꞌyá= xi Kiꞌndire Xuta xiꞌiun?
14 ꞌBa xutare kitsingojore:
—Tjin xi tsu nga Juan Bautista= ꞌba tjin xi tsu nga Elías. ꞌBa tjin yakꞌa xi tsu nga Jeremías asa kjaꞌe ngijngu profeta.
15 ꞌBa Jesús kitsu nganire:
—ꞌBa jun, ¿jó mixun nga ꞌyá=niña̱ an?
16 ꞌBa ꞌbatsaꞌen Simón Pedro kitsingojore:
—Ji= ni xi Cristo, Kiꞌndire Naꞌenchana xi tijñakun.
17 ꞌBa Jesús kitsure:
—¡Ndaxuri, Simón, kiꞌndire Jonás! Ngatꞌa bi xuta ngasunꞌndebi ꞌejñatsejenri kibiu, tu Naꞌenna̱ xi tijña ngankꞌaa.
18 ꞌBa an xinra̱ nga kꞌuinri Pedro, ꞌba ngasun ndiojobiu sindaa̱ ninguna̱; ꞌba ngaꞌñure kjuabeyo bi ku̱an saꞌenre xuta xi tsaꞌan.
19 ꞌBa sjara̱ llavere ña batexuma Naꞌenchana. ꞌBa ngayéje xi kꞌuechjaꞌnde ngaꞌe ngasunꞌndebi, ꞌba=nde sꞌe̱chjaꞌnde ngankꞌaa. ꞌBa ngayéje xi kuaꞌeꞌnde ngaꞌe ngasunꞌndebi, ꞌba=nde kuaꞌeꞌnde ngankꞌaa.
20 ꞌBa kio Jesús ꞌñu ꞌenere xutare nga tuꞌyá ngateꞌere nijmi nga kui xi Cristo.
Nga beꞌe nijmi Jesús nga kueya
Mr. 8:31–9:1; Lc. 9:22-27
21 ꞌBa kaꞌnda kui nixtjinbiu tsakaꞌanire Jesús nga yeꞌekixire nijmi xutare nga tjinnere nga kuaje Jerusalén, ꞌba nga ne tse kjuanima kjuaꞌaxtiu ngaya ntsja nchja chingare naxinando ko xi ngakure naꞌmi ꞌba ko chjine kjuatexuma, ꞌba nga kjuinikꞌen, ꞌba nga xi majánni nixtjin kjuaꞌaya nganire ngajinre mikꞌen.
22 ꞌBa kio Pedro kikotꞌaxin Jesús ꞌba ꞌetutsꞌinre nga jatiko ꞌba kitsure:
—¡Naꞌen, Naꞌenchana ngatꞌejñatꞌaxin ngayéje kibiu! ¡Tumé ku̱anri!
23 Tunga Jesús kitsikuꞌbeya ꞌba kitsure Pedro:
—¡Tisentꞌaxinnaa̱, Satanás! Ji xi teꞌbejñanaa̱ kjuanaꞌen. Ngatꞌa bi nikjaꞌetsjen mé= xi tseꞌe Naꞌenchana, tusa mé= xi tseꞌe xuta ngasunꞌndebi.
24 ꞌBa ꞌbatsaꞌen kitsure xutare:
—Tsa tjin xi mejénre sjenngina̱, ngatatsichiyajin yojore ko mé= xi mejénre ꞌba ngataꞌanijin krure ꞌba ngatjandetjenngina̱.
25 Ngatꞌa xi mejénre sikꞌangi tajngu yojore nga kꞌuejñakun, kui= xi tusa kueya. Tunga xi kueya tu kjuana̱ ni, kui= xi tusa sakure kjuabenichun.
26 Ngatꞌa, ¿mé= xi saꞌenire xuta tsa saꞌen ngayéje xi tjin ngasunꞌndio, ꞌba tsa sichaja inimare? ¿ꞌBa jó tjin ku̱an kꞌuechjintjai inimare xuta?
27 Ngatꞌa Kiꞌndire Xuta xiꞌiun kjuaꞌeko kjuajere Naꞌenre ꞌba kjuaꞌeko ankjelere, ꞌba kio kꞌuechjire xuta mé= xi kitsaꞌen nga jngu jngu.
28 Kjuakixi= xi texin_nuu̱. Nga yakꞌa xi inya ngaꞌe bi kueya kaꞌnda nga skue nga kjuaꞌekatexuma Kiꞌndire Xuta xiꞌiun.