14
Yeeho Wode Oottanau Bessenna Meezeta
1 “Intte GODAA intte Xoossaa naata; intte haiqqida asau inttena gom77oroppitenne sintta bagga huuphiyaa meedoppite.
2 Aissi giikko, intte GODAASSI, intte Xoossaassi, geeshsha asa; GODAI inttena ba asa gidanaadan, biittan de7iya asa ubbaappe dooridi wottiis.
Miyo Meheta Do7atanne Meenna Meheta Do7ata
3 “Intte tunabaa aibanne mooppite.
4 Intte maana mehetinne do7ati hageeta; booraa, dorssaa, deeshshaa,
5 genessaa, dogaa, wushaa, wora deeshshaa, cofoshuwaa, gaaraanne deriyaa dorssaa.
6 Qinccafilee wuri phalqqettidoogeeta, waammotiya mehetanne do7ata ubbaa miite.
7 SHin waammotiyaageeta gididi, qinccafilee phalqqettibeennaageeta mooppite; hegeetikka gaameelaa, harbbainnuwaanne guppalliyaa. Hageeti waammotoosona; shin eta qinccafilee phalqqettibeenna gishshau, eti intteyyo tuna.
8 Gudunttaikka qinccafilee phalqqetta gidikkonne waammotenna gishshau, i intteyyo tuna. A ashuwaa mooppite; a bautaakka bochchoppite.
9 “Haatta giddon de7iya meretatu ubbaappe intte maanaageeti hageeta; moliyaagaa mala qefeenne poqoi de7iyo ubbaa miite.
10 SHin moliyaagaa mala qefeenne poqoi bainna augaanne mooppite. Hegeeti intteyyo tuna.
11 “Geeshsha gidida kafo ubbaa miite;
12 shin kafotuppe intte meennaageeti hageeta: argganttaa, bazzo ankkuwaa, karetta ankkuwaa,
13 golluwaa, xinggille zare ubbaa,
14 qooraase zare ubbaa,
15 yanchchaa, cancciya guttuwaa, haatta kafuwaa, gace zare ubbaa,
16 qeeri guttuwaa, wogga guttuwaa, haatta kuttuwaa,
17 bazzo guttuwaa, yindduwaa, ganggaanuwaa, adussa qooree de7iyo haatta kafuwaa,
18 saabissaa giyo kafo zare ubbaa, jinjjilaatiyaanne wurkkaawurkkuwaa.
19 Qefeera de7iya qeeri meretati ubbai intteyyo tuna; eta mooppite.
20 SHin he qefeera de7iyaabatuppe geeshsha gidiyaageeta miite.
21 “Intte GODAASSI, intte Xoossaassi, geeshsha asa gidiyo gishshau, bautidabaa ubbaa aibanne mooppite. Hegaa intte kataman de7iya beteti maanaadan etau immanau danddayeeta; woikko hara biittaa asassi baizzanau danddayeeta.
“Deeshsha maraa a aayee maattan doissoppa.
Asirataa Kessiyo Wogaa
22 “Intte intte gadeppe laittan laittan gakkiya katta aife ubbaappe asirataa kessite.
23 Intte ubba wode, GODAAYYO, intte Xoossaayyo, yayyiyoogaa tamaarana mala, i ba sunttai xeesettana mala doorido sohuwan, GODAA intte Xoossaa sinttan, intte kattaa, woiniyaa eessaanne zaitiyaa asirataa, intte dorssaappenne mehiyaappe baira yelettidaagaa hegan miite.
24 GODAI intte Xoossai ba sunttai xeesettana mala doorido sohoi, intte de7iyoosaappe keehi haaho gidikko, GODAI inttena anjjana mala, intte intte asirataa yaa tookkanau danddayennan ixxikko,
25 baizzite; baizzidi he miishshaa kushiyan oiqqidi, GODAI intte Xoossai doorido sohuwaa biite.
26 Biidi he miishshan intte koyidobaa augaanne, miizza gidin, dorssa gidin, woine eessaa gido, woikko hara mino ushshaa, woikko hara intte koyiyoobaa aibanne shammidi, inttenne intte so asai ubbai GODAA intte Xoossaa sinttan hegaa miitenne ufaittite.
27 “Hegaa intte oottiyo wode, intte kataman de7iya Leewata dogoppite; aissi giikko, eti inttenaara shaakki ekkido hara laati baawa.
28 Heezzantta laittan laittan ubba wode, intte katta asirataa ehiidi, intte kataman shiishshite.
29 Hegaa intte kataman de7iya inttenaara shaakki ekkido, hara laati bainna Leewati, beteti, aawi bainna naatinne am77e maccaasati yiidi moona; miidikka kallona. Yaatikko, intte oottiyo intte kushiyaa ooso ubban GODAI intte Xoossai inttena anjjana.