13
Qassikka Iyyoobi Haasayees
1 “Hagaa ubbaa ta aifee be7iis; ta haittaikka siyidi akeekiis.
2 Intte eriyoogaa taanikka erais; taani intteppe laafikke.
3 SHin taani Ubbaa Danddayiya Xoossaassi haasayanau koyais; inttenaara gidenna. Taani ta mootuwaa aara mootettanau amottais.
4 Intte erenna asa gidiyoogee erettennaadan, wordduwan kammeeta; intte ubbaikka pattenna aakimeta.
5 Intte ubbai co77u giidaa giderkketiishsha! Yaatiyaakko, inttena asai aadhdhida eranchcha gaana shin!
6 “Ha77i ta mootuwaa siyite; ta doonaappe kiyiya palamaa ezggite.
7 Intte Xoossaa doona gididi, wordduwaa haasayeetiiyye? A gishshaa eqqidi, cimobaa haasayeetiiyye?
8 Intte a maaddiyoobi de7ii? Woikko ayyo xabaqa gididi mootetteetii?
9 I inttena pilggi xeelliyaakko, intteppe lo77obaa demmanee? Intte asaa cimmiyoogaadan, a cimmanau danddayuuteetiiyye?
10 Intte geeman asaa som77uwaa xeellidi maaddikko, Xoossai tumu inttena seerana.
11 A bonchchoi inttena daganttennee? A anggai inttena yashshennee?
12 Intte odiyo leemisoti bidintta mala pattennaageeta; intte shiishshiyo palamai urqqaappe merettida gonddalliyaa mala.
13 “Ane co77u giite! Taani haasayana; hagaappe guyyiyan, ba hanaa hano.
14 Taani tana gakkiyaabaa, haiquwaa gidiyaakkokka, ekkanau giiga uttaas.
15 Be7ite, Xoossai tana woriyaabaa gidikkonne, taani a danddayan naagana. Gidikkonne, taani ta mootuwaa a sintti shiishshana.
16 Nagaranchcha asi a sintti shiiqanau danddayenna; hagee taani shiiqanau xaliyoogee, ooni erii, ta atettaassi gaaso gidanau danddayees.
17 Ta haasayaa akeekidi siyite; taani odiyoogee intte haittan gelo.
18 Be7ite, taani ta mootuwaa giigissaas; shatimmanaagaakka erais.
19 “Abeet Xoossau, neeni tana mootanau yai? Neeni tana mooranchcha kessikko, taani co77u gaada haiqqana.
20 SHin neeni taayyo ha naa77ubata ootta; oottikko taani neeppe geemmikke.
21 Tana qaxxayiyoogaa agga; tana daganttoppa.
22 Hegaappe guyyiyan, tana xeesa; xeesin taani koyana. Woikko taani haasayin, taayyo zaarada haasaya.
23 Bau, taani moorido mooroinne nagarai aappunee? Ta balaanne ta nagaraa ane tana bessa.
24 “Neeni aibissi ne som77uwaa taappe genttai? Qassi tana aibissi ne morkkedan qoodai?
25 Tana, carkkoi efiyo boncco malaa, yashissuutee? Woikko melida suulla malaa yedettuutee?
26 Neeni ta bolli xaafido mootoi camo; harai attin, taani yelagatettan de7aidda oottido mooruwaanne ashshabaakka.
27 Neeni ta tohuwaa toho biratan qachchadasa; ta tanggiyo tanggo ubbaa wochchaasa; ta tohuwaa kottiyaa pilgga xeellaasa.
28 Taani musidabaadaaninne bil77ai miido afaladan musais.