26
Iyyoobi Gidduwaara Kilppayees
Yaagin Iyyoobi hagaadan yaagidi zaariis; “Wolqqi bainna asa neeni aiba maado maaddadii! Daafurida qeeseta neeni aiba ashetta ashshadii! Aadhdhida eratettai bainnaagaa aiba zore zoradii! Ai keena gita eratettaa qonccissadii! Neeni ha qaalaa haasayanaadan nena oonee maaddidai? Qassi hagaadan haasayanau nena denttettidaagee o ayyaanee?” yaagiis.
Bilddaadi Ba Haasayaa Wurssees
Yaagin Bilddaadi, “Haiqqidaageetu moitilleti biittaappe garssa baggaara haattaa giddon kokkoroosona. Xoossaa sinttan Si7ooleekka qoncce; aibinne a genttanau danddayenna. Xoossai huuphessa bagga salota micciis; sa7aakka aibakko bainnasan kaqqiis. I shaaratun haattaa kunttees; kunttin haattaa deexuwan shaarati daakettokkona. Goobanida aginaa i ba shaaran kammees. 10 Poo7uwaa xumaappe shaakkanau, saloi sa7aara danttettiyoosan qammainne gallassai laamettiyo zawaa Xoossai essees. 11 I seeriyo wode, salotu tuuqeti dagamau kokkoroosona. 12 Ba wolqqan abbaa co77u oottiis; ba akeekan Ra7aaba giyo miimminttiyaa xaissiis. 13 I shemppiyo shemppuwan saloti geeyidosona; a kusheekka xonggettiya shooshshaa woriis. 14 Hageeti ubbai Xoossai oottido oosotuppe amaridaageeta; nuuni siyoogee saasuketta xalaala. Yaatin, a wolqqaa gitatettaa akeekanau danddayiyai oonee?” yaagiis.