36
Qassikka Eelihu Haasayees
Eelihu gujjidikka hagaadan yaagiis; “Xoossaa doona gidada taani neeyyo yootiyoobai biron de7iyo gishshau, guuttaa danddayada siya. Taani ta eraa zaassada ehais; tana Medhdhidaagee xillo gidiyoogaa taani nena erissana. Taani worddo haasayikke; kumetta erai de7iyo uri nenaara de7iyoogaa ammana.
“Be7a, Xoossai wolqqaama; shin i oonanne karenna. I akeekaukka mino. Iitata i paxa wottenna; shin huqqunnettidaageetu maataa i naagissees. Xoossai ba aifiyaa xillotuppe denttenna. I eta kawotuura utissidi, merinau xoqqu xoqqu oottees. SHin asai sanssalatan qashettikko, woikko tuggaa wodoruwan oiqettikko, i eta oosuwaanne otoruwan eti oottido nagaraa qonccissees. 10 Seeraa siyanaadan eta haittaa dooyees; nagaraappe simmanaadankka i eta azazees. 11 Eti siyidi, ayyo oottikko, bantta laittaa saruwaaninne ufaissan wurssana. 12 SHin eti siyennan ixxikko, olan wurana; eti eraa xayido gishshau haiqqana.
13 “Xoossaa ammanenna asati bantta wozanan yiilluwaa dagayoosona; i eta qaxxayiyo wodekka, maadda giidi woossokkona. 14 Eti bantta yelagatettan haiqqoosona; eta de7oikka yeellan wurees. 15 Xoossai tuggatiyaageeta eta tuggan tamaarissees; i eta metuwaa baggaara eta sissees.
16 “Xoossai nena metuwaappe kessiis; kessidi metoi bainna aaho sohuwaa efiis; ne miyo masoofiyankka modhdhuwaa guuppiis. 17 SHin ha77i iitatu bolli gakkanau bessiya pirddai ne bolli gakkiiddi de7ees. 18 Nena ooninne duretettaa bessidi cimmennaadan, daro mattaayiyankka balettennaadan naagetta. 19 Ne aquwaa daroi woikko ne minotettai nena metuwaappe ashshanee? 20 Kawotettati bantta sohuwaappe xayiyo qammai yaanaadan amottoppa. 21 Ha metoi ubbai nena gakkidoogee, nena iitaappe ashshanaassa. Hegaa gishshau, iitatettau guyye simmennaadan nena akeeka.
22 “Xoossai ba wolqqan xoqqu xoqqu giis! A mala asttamaaree oonee? 23 ‘Hagaa ootta’ giidi Xoossaa azaziya asi, woikko, ‘Neeni iita ooso oottadasa’ yaaganau danddayiya asi baawa. 24 Asai mazamuriyan sabbido a oosuwaa neenikka sabbanau hassaya. 25 Asai ubbai Xoossaa oosuwaa be7iis; shin be7iiddi, haahuwan be7iis. 26 Be7ite, Xoossai gita! A gitatettaa nuuni akeekibookko; a laittaa coratettaikka qoodin gakettenna.
27 “Xoossai haattaa sa7aappe pude saluwaa efees; efiidi yan ira kessees. 28 He irai shaaraappe kiyidi, asau daro bukkanaadan oottees. 29 SHaarai waani yuuyiyaakko, dadaikka Xoossai de7iyo saluwan waani guummiyaakko, ooninne erenna. 30 I ba yuushuwan wolqqanttaa poo7uwaa laalees; shin abbaa ciimmaa i xuman kammees. 31 Iraa bukissiyoogan ba asaassi daro kattaakka mokissees. 32 I wolqqanttaa ba kushiyan oiqqees; oiqqidi ba halchchido sohuwaa shocanau azazees. 33 Dadai guummiyoogee uushoi uushanaagaa awaajjees; meheekka uushoi yiyoogaa erees.