5
Qassikka Elifaazi Haasayees
1 “Iyyoobaa, ane xeesa! SHin oonee neeyyo koyanai? Kiitanchchatuppe ookko simmuutee?
2 Eeyya uraa lanccee worees; akeekai paccido uraakka qanaatee xaissees.
3 Eeyya urai minnidi de7iyaagaa taani ta huuphen be7aas; shin sohuwaarakka taani a keettaa qanggaas.
4 A naati saroi bainnasan de7oosona; eti shilootan, maaddidi haasayiyaabi bainnasan kinchchettidosona.
5 I shiishshido kattaa namisettidaageeti maana; agunttaa giddon mokkidaagaakka eti ayyo aggokkona. Saamettidaageeti a aquwaa ekkanau hel77oosona.
6 Tuggai baanaappe kiyenna; metoikka biittaappe mokkenna.
7 Tamai piri wodhdhiyoogaadan, asi metuwau yelettiis.
8 “Tana gidiyaakko, taani Xoossaakko shiiqana; ta mootuwaakka a sinttan wottana.
9 Gidduwaa pilggidi eranau danddayettenna gitabatanne qoodi bainna oorattabata Xoossai oottees.
10 Iraa biittan bukissees; gadiyaukka haattaa yeddees.
11 Ziqqi giidaageeta xoqqu xoqqu oottees; kayyottiyaageetakka minttettidi ufaissees.
12 Genanchchatu halchchuwaakka halissees; hegaa gishshau, eta kushiyaa oosoi polettenna.
13 Aadhdhida eranchchata i eta geniyan oiqqees; geellatu maqquwaakka aatti yeggees.
14 Etau gallassai xumana; gallassa seetankka eti henqqeleela bilahiyaadan tattaafana.
15 Hiyyeesata i eta morkketu bisuwaappe ashshees; i eta wolqqaamatu kushiyaappekka wotti ekkees.
16 Hegaa gishshau, hiyyeesatuyyo hidootai de7ees; iita asata i co77u oottees.
17 “Xoossai seeriyo uri anjjettidaagaa; hegaa gishshau, Ubbaa Danddayiya Xoossaa seeraa karoppa.
18 I masunxxissees, shin masunttaa qachchees. I dechchees, shin a kushee xallees.
19 Usuppun qommo metobaappe i nena ashshana; laappunttikka nena bochchenna.
20 Koshaa wode haiquwaappe, olaa wodekka bisuwaa qaraappe i nena ashshana.
21 I nena inxxarssaa lissuwaappe genttana; bashshai gakkiyo wodekka yayyakka.
22 Bashshaa bollinne koshaa bolli neeni miiccana; bazzo do7atuyyookka yayyakka.
23 Ne goyiyo goshshan shuchchi de7enna; bazzo do7atikka nenaara saro gidana.
24 Ne dunkkaanee saro gidiyoogaa neeni geeshshada erana; ne dorssatu birddiyaakka neeni xomoosiyo wode, etappe issoinne paccenna.
25 Ne yeletai corattanaagaanne ne zerettatikka dembbaa maataa keena gidanaagaa neeni erana.
26 Gisttiyaa mirqqee ba wodiyan audiyaa yiyoogaadan, neeni adda cimada, duufuwaa baana.
27 Iyyoobaa, nuuni hagaa ubbaa pilggi xeellida. Hegee tuma gidiyo gishshau, hegaa siyada, neeyyo ekka” yaagiis.