26
Naa77antto Israa7eela Asaa Qoodaabaa
1 Boshaappe guyyiyan, GODAI Muusanne qeesiyaa Aaroona na7aa El77aazara,
2 “Yelettoosappe laatamu laittanne hegaappe bollaara de7iya Israa7eelata, olau baanau danddayiyaageeta ubbata, eta keettan keettan qoodite” yaagiis.
3 Yaagin Muuseenne qeesee El77aazari Yorddaanoosa SHaafaappe hefintta baggaara, Yarkko matan, Moo7aaba Dembban etaara haasayiiddi,
4 “GODAI Muusa azazidoogaadan, yelettoosappe laatamu laittanne hegaappe bollaara de7iya asaa qoodite” yaagidosona.
Gibxxeppe kiyida Israa7eelati hageeta:
5 Israa7eela baira na7aa Roobeela zareti: Hanooka yarata, Paalu yarata,
6 Hexiroona yaratanne Karmma yarata.
7 Hageeti Roobeela zareta; eti muleera 43,730.
8 Paalu na7ai Eli7aaba;
9 Eli7aaba attuma naati Nemu7eela, Daataananne Abiiraama; ha Daataaninne Abiiraami maabarai dooridoogeeta. Eti Qoraahaaranne a kaalliyaageetuura zuppetidi, Muuse bolli, Aaroona bollinne GODAA bolli makkalidosona.
10 Biittai dooyettidi, eta Qoraahaara issippe mittiis; eta kaalliya naa77u xeetanne ishatamu asaa tamai min haiqqidosona. Yaatin eti asi be7idi duuxxiyo malaata gididosona.
11 SHin Qoraaha attuma naati he gallassi haiqqibookkona.
12 Simoona zareti bantta yaran yaran: Nemu7eela yarata, Yaamiina yarata, Yaakiina yarata,
13 Zaraaha yaratanne SHaa7ula yarata.
14 Hageeti Simoona zareta; eti muleera 22,200.
15 Gaada zareti bantta yaran yaran: Xafoona yarata, Hagga yarata, SHuuna yarata,
16 Oozina yarata, Eera yarata,
17 Arooda yaratanne Ar77eela yarata.
18 Hageeti Gaada zareta; eti muleera 40,500.
19 Yihudaa attuma naati Eeranne Oonaana; shin eti Kanaane biittan haiqqidosona.
20 Yihudaa zareti bantta yaran yaran: SHeela yarata, Paareesa yaratanne Zaraaha yarata.
21 Paareesa zareti Hexiroona yaratanne Hamuula yarata.
22 Hageeti Yihudaa zareta; eti muleera 76,500.
23 Yisaakoora zareti bantta yaran yaran: Tolaa7a yarata, Puuwa yarata,
24 Yaashuuba yaratanne SHimiroona yarata.
25 Hageeti Yisaakoora zareta; eti muleera 64,300.
26 Zaabiloona zareti bantta yaran yaran: Sereeda yarata, Eloona yaratanne Yaahila7eela yarata.
27 Hageeti Zaabiloona zareta; eti muleera 60,500.
28 Minaasenne Efireema aawaa Yooseefa zareti hagaappe kaallidi xaafettidosona.
29 Minaase zareti Minaase na7aa Maakiira yarata, Maakiira na7aa Gala7aade yaratanne Gala7aade naatu yarata.
30 Gala7aade zareti I7eezera yarata, Heleeqa yarata,
31 Asiri7eela yarata, SHekeema yarata,
32 SHamidaa7a yaratanne Hefeera yarata.
33 Hefeera na7ai Xalofihaadi macca naatu xalaalaa yeliis; ayyo attuma na7i baawa. Xalofihaada macca naatu sunttai Maahilo, No7o, Hoogilo, Milkkonne Tirxxo.
34 Hageeti Minaase zareta; eti muleera 52,700.
35 Efireema zareti bantta yaran yaran: SHutelaaha yarata, Bekeera yarata, Tahaana yaratanne
36 SHutelaaha na7aa Eraana yarata.
37 Hageeti Efireema zareta; eti muleera 32,500. Yooseefa zareti bantta yaran yaran hegeeta.
38 Biniyaama zareti bantta yaran yaran: Belaa7a yarata, Ashibeela yarata, Ahiraama yarata,
39 SHafufaama yarata, Hufaama yarata,
40 Belaa7a na7aa Arada yaratanne Belaa7a na7aa Naa7imaana yarata.
41 Hageeti Biniyaama zareta; eti muleera 45,600.
42 Daana zareti SHuhaama yarata.
43 SHuhaama yarati muleera 64,400.
44 Aseera zareti bantta yaran yaran: Yimina yarata, Yishiwaaha yarata, Barii7a yarata,
45 Barii7a na7aa Hebeera yaratanne Barii7a na7aa Malkki7eela yarata.
46 Aseerau Seraaho giyo macca na7iyaa de7ausu.
47 Hageeti Aseera zareta; eti muleera 53,400.
48 Nifttaaleema zareti bantta yaran yaran: Yaa7izi7eela yarata, Guuna yarata,
49 Yexeera yaratanne SHilleema yarata.
50 Hageeti Nifttaaleema zareta; eti muleera 45,400.
51 Qoodettida Israa7eela attuma asai muleera 601,730.
52 Qassikka GODAI Muusa,
53 “Ha zaretuyyo eta sunttaa sunttaa qoodaadan biittai shaahettidi, laata gididi etau imetto.
54 Qoodan coratuyyo eta coratettaa keenaa, qoodan guuttatuyyo eta guuttatettaa keenaa shaakkada imma. Ubbaikka xaafettida bantta qoodaa keenaa keenaa ekkona.
55 SHin biittai saaman shaahetto; issi issi zaree laattiyo biittai eta aawaa zariyaa sunttaadan gido.
56 Laata ubbai qoodan coratuppenne qoodan guuttatuppe gidduwan saaman shaahetto” yaagiis.
57 Bantta yaran yaran qoodettida Leewati hageeta: Gershshoona yarata, Qahaata yaratanne Maraara yarata.
58 Hageetikka qassi Leewatu yarata: Liibina yarata, Kebroona yarata, Maahila yarata, Musha yaratanne Qoraaha yarata. Qahaati Amiraama yeliis.
59 Amiraama keettaayee sunttai Yokebeedo; a Gibxxen Leewayyo yelettida na7iyo. A Amiraamayyo Aaroona, Muusanne eta michchiyo Miiriyaamo yelaasu.
60 Aarooni Nadaaba, Abiiha, El77aazaranne Itaamaara yeliis.
61 SHin GODAI azazibeenna tamaa a sinttan yarshshido wode, Nadaabinne Abiihu haiqqidosona.
62 Yelettoosappe issi aginanne hegaappe bollaara de7iya qoodettida attuma Leewati muleera laatamanne heezzu sha7a. Israa7eelatu gidduwan etau laattiyo biittai imettibeenna gishshau, eti Israa7eelatuura qoodettibookkona.
63 Yorddaanoosa SHaafaappe hefintta baggaara, Yarkko matan, Moo7aaba Dembban Muuseenne qeesee El77aazari Israa7eelata qoodido wode, qoodettida asai hagaa.
64 Muuseenne qeesee Aarooni kase Siinaa Bazzuwan Israa7eelata qoodido wode, qoodettida asaappe harai atto mexi issi asinne attibeenna.
65 Aissi giikko, GODAI he Israa7eelatubaa odiiddi, “Eti bazzuwan tumu haiqqana” yaagi wottiis. Yifune na7aa Kaaleebappenne Nawe na7aa Yaasuppe attin, harai issi asinne attibeenna.