34
Israa7eela Biittaa Zawaa
GODAI Muusa hagaadan yaagiis; “Neeni Israa7eelata hagaadan yaagada azaza; ‘Laatadan inttena gakkiya Kanaane biittaa zawai hagaa. Tohossa baggaara intte zawai Xiina Bazzuwaanne Eedooma zawaa gidana. Intte tohossa zawai Maxine Abbaa tohossaappe doommees; doommidi Akirabiima pudettaara tohossa baggaara simmidi, Xiina Bazzuwaa kanttidi, Qaadeesa-Barnne tohossi gakkees; hegaappe Hadaari-Adaara kanttidi, Aximoona gakkees. Aximoonappe Gibxxe SHaafaakko simmidi, Meediteraane Abbaa gakkees.
“ ‘Arggo baggaara intte zawai Meediteraane Abbaa gaxaa gidana.
“ ‘Huuphessa baggaara intte zawai Meediteraane Abbaappe Hoora Deriyaa sitti ootti malaatidi, Hoora Deriyaappe Hamaata Pinuwaa gakkanaassa; hegaappe Xadaadan zawatees. Qassi Zifiroona biidi, Haxaari-Enaana gakkees. Huuphessa baggaara intte zawai hagaa gidana.
10 “ ‘Arshsho baggaara intte zawai Haxaari-Enaanappe SHafaama gakkanaassi sitti ootti malaatidi, 11 SHafaamappe biidi, Ainappe arshsho baggaara de7iya Ribila wodhdhidi, Galiila Abbaappe arshsho baggaara de7iya keraa gakkees. 12 Hegaappe duge Yorddaanoosa SHaafaa wodhdhi zawatidi, Maxine Abbaa gakkees. Intte biittaa zawai ubba baggaarakka hagaa’ yaaga” yaagiis.
13 Yaagin Muusee Israa7eelata hagaadan yaagidi azaziis; “Saamaa yeggidi, intte laattana mala, uddufun zaretuyyoonne bagga zaretuyyo he biittai imettanaadan GODAI azaziis. 14-15 Aissi giikko, Roobeela zareti Gaada zaretinne, Minaase zaretuppe baggai bantta laataa Yarkko hefinttan Yorddaanoosa SHaafaappe arshsho baggaara ekkidosona” yaagiis.
16 GODAI Muusa hagaadan yaagiis; 17 “He biittaa intteyyo laata oottidi, shaakki immana asatu sunttai hagaa; qeesiyaa El77aazaranne Nawe na7aa Yaasa. 18 Qassi biittaa shaakkanau maaddana mala, zare ubbaappe issi issi halaqaa sunttite. 19 Eta sunttai hagaappe kaallidi de7iyaagaa.
Zariyaa Halaqaa
Yihudaa Yifune na7aa Kaaleeba
20 Simoona Amihuuda na7aa SHalumi7eela
21 Biniyaama Kisiloona na7aa Elddaada
22 Daana Yoogila na7aa Buuqa
23 Yooseefa na7aa Minaase Efooda na7aa Hani7eela
24 Yooseefa na7aa Efireema SHifxxaana na7aa Qamu7eela
25 Zaabiloona Parnnaaka na7aa Elxxaafaana
26 Yisaakoora Azzaana na7aa Palxxi7eela
27 Aseera SHalooma na7aa Ahihuuda
28 Nifttaaleema Amihuuda na7aa Padaahi7eela
29 Kanaane biittan Israa7eelatuyyo laataa shaakki immana mala, GODAI azazido asati hageeta” yaagiis.