31
Kawoi Limu7eeli Haasayido Haasayaa
1 Hagaappe kaallidi xaafettida hayyo haasayai, Kawuwaa Limu7eela aayyiyaa Kawuwaa Limu7eela tamaarissidoogaa.
2 “Laa ta na7au, ta uluwaappe wodhdhidaagoo, taani shiiqettada yelidoogoo,
3 maccaasan ne wolqqaa wurssoppa; he kawota bashshiya maccaasatun ne akataa xaissoppa.
4 “Limu7eelaa, hagee kawotussi bessenna; woiniyaa eessaa uyiyoogee kawotussi bessenna; mattoyiya ushshaa uyiyoogee deriyaa bolli sunttettidaageetussi bessenna.
5 Eti uyiyo wode higgiyaa baloosona; balidi naaqettida asaa maataa shenehoo goosona.
6 Mattoyiya ushshaa haiqqana haniya uraunne sa7ai iitido urau immite.
7 Eti bantta manqqotettaanne bantta tugga de7uwaa dogana mala uyona.
8 “Bantta metuwaa odanau danddayennaageetu gishshaa neeni oda; maaddiyaabi bainnaageetu maataa gishshau neeni bidda.
9 Biddada etayyo suure pirddaa pirdda; hiyyeesatunne metootanchchatu maataa naaga” yaagada tamaarissaasu.
Wozannaama Machchiyo
10 Wozannaama machcho ooni demmanau danddayii? Inqquwaa giyo al77o shuchchaappekka a al77ausu.
11 I keettaawai o ubbabankka ammanees; ayyo de7anau bessiyaabaappe aibinne paccenna.
12 A ba de7o laitta ubban ayyo lo77obaappe attin, iitabaa oottukku.
13 Suufiyaanne liinuwaa a koyada, ufaittaidda ba kushiyan oottausu.
14 A zal77anchchatu markkabetu mala; ba qumaa haaho biittaappe ehausu.
15 A ba so asaassi qumaa kattanaunne ba macca ashkkaratussi oosuwaa bazzanau, sa7ai biron qamma de7ishin denddausu.
16 Gadiyaa a koyada shammausu; ba kushiyan oottada demmido miishshan woiniyaa turaa tokkausu.
17 A gooba oosanchcha gidiyoogaa xalaala gidennan, minonne cincca asa.
18 A ba woriyaa demmanau minnada zal77ausu; a oottaidda qamissiyo, ba xomppiyaa eesuwan toissukku.
19 A ba hinddiriitan suqqada, ba afalaa daddausu.
20 A hiyyeesatussinne metootanchchatussi babaappe coo immausu.
21 I so asai ubbai ho77iya maayuwaa maayido gishshau, shachchai bukkiyaakko, a hirggukko.
22 Arssaa bollan hiixxiyo maayuwaa sikkausu; liinuwaappe dadettida zo7o maayuwaakka baayyo maayausu.
23 Dere cimati shiiqiyo dubbushan i keettaawai bonchchettida asa.
24 Liinuwaappe maayuwaanne qabattuwaa ootta oottada, zal77anchchatussi baizzausu.
25 A minonne bonchcho asa; yiya laittatussi a mulekka hirggukku.
26 Aadhdhida eran a haasayausu; ammanttiya zoree i inxxarssaappe kiyees.
27 A ba so asaa de7uwaa injjeyanau ubbaton ooso oottaidda de7ausu; azalla hanoi i bollan beetti erenna.
28 I naati denddi eqqidi, o nashshoosona; i keettaawaikka o galatiiddi,
29 “Lo77obaa oottida daro maccaasati de7oosona; shin neeni eta ubbaappe aadhdhaasa” yaagees.
30 Mera lo77otetti allaalle kessenna; puulikka xayana; shin GODAASSI yayyiya maccaasiyaa, a galatettanau bessausu.
31 A oottidobau ubbau iyyo i kushiya zaarite; a oottido oosoi ubbai dabaaban o galatisso.