4
Aawai Zoriyo Lo77o Zoriyaa
1 Ta naatoo, intte aawaa zoriyaa siyite; loitti ezggite; yaatikko, intte akeekana.
2 Taani intteyyo lo77o timirttiyaa immiyo gishshau, ta timirttiyaa yeggoppite.
3 Taani ta huuphenkka ta aawaassi na7a; ta aayeessikka a siiqiyo mexi issi na7a.
4 Ta aawai tana tamaarissiiddi, hagaadan yaagiis; “Taani odiyoogee neeyyo gelo; ta azazuwaa naaga; yaatikko, neeni paxa de7ana.
5 Aadhdhida eratettaanne akeekaa demmanau minna; taani neeyyo odidobaa dogoppa; ta qaalaappe kiyoppa.
6 Aadhdhida eratettaayyo zokkuwaa zaaroppa; aissi giikko, i nena ashshana; a siiqa; siiqikko i nena naagana.
7 Aadhdhida eratettai ubbaappe aadhdhiyo gishshau, aadhdhida eratettaa demma. Akeekai ne aquwaa ubbaa wurssi ekkikkokka a demma.
8 Neeni a bonchcha; ikka nena xoqqu xoqqu oottana; neeni a oiqqikko, i nena bonchchana.
9 I ne huuphiyan sabaa akiliiliyaa wottana; bonchcho kallachchaakka immana” yaagiis.
10 Ta na7au, siya; taani giyoogaakka ekka; ne bareekka aduqqana.
11 Taani nena aadhdhida eratettaa ogiyaa kaalettana; suure loossuwaarakka efaana.
12 Neeni hemettiyo wode, ne hemettiyoosan xubbiyaabi de7enna; woxxikkokka xubettakka.
13 Tamaaridoogaa hassaya; timirttee neeyyo de7o gidido gishshau, loitta naaga; yeddoppa.
14 Nagaranchchatu ogiyaa yedhdhoppa; iita asatu ogiyankka hemettoppa;
15 appe haakka; an hemettoppa; appe guyye simma; yaatada ne ogiyan ba.
16 Aissi giikko, eti iitabaa oottana gakkanaashin, xiskkanau danddayokkona; eti asa xubbennan eta xiskkoi efeenna.
17 Eti nagaraa oittadan moosona; sugettaa oosuwaakka ushshadan uyoosona.
18 Xillotu ogee gallassai seetana gakkanaashin, gujji gujji poo7iya maallado xalqqiyaa mala.
19 SHin nagaranchchatu ogee sakkana xumaa mala; eti aibin xubettiyaakkokka erokkona.
20 Ta na7au, taani yootiyoogaa siya; taani odiyoogaakka loittada ezgga.
21 Taani odidobati ne baazzaappe deshoppona; eta ne wozanan wotta.
22 Aissi giikko, etabai geliyo asau ubbau eti de7uwaa immoosona; eta bollaukka payyatettaa immoosona.
23 Ubbabaappekka ne wozanaa minttada naaga; aissi giikko, de7oi appe pulttees.
24 Ne doonaappe gene haasayaa digga; wordduwaa haasayiyaageetu achchappekka kichcha.
25 Sitti gaada sinttau xeella; ne aifee ne sinttan de7iyaabaa tishshi oottidi xeello.
26 Ne gediyaassi ogiyaa salallissa; suure oge xalaalan hemetta.
27 Suure ogiyaappe ushachchi haddirssi baqqoppa; ne tohoi iitasaa beennaadan naaga.