Yauna
Givimayeta
Nufunufu kana wava Yauna eketa si katuviyewiya fiyao Isineni kasi sifusifufu nakanakasina venemokena tovasisi nenesiyai, yasi yauna vikaetoḡa Itifita nenei. Nufunufu nofe nenei tofwa nufunina nakanakasina.
Guyau fiyao Isineni i ketoyausiya Itifita nenei. (1:1—15:21)
Vikaetoḡa Itifita sinenei. (1:1-22)
Mosese yana tufuwa keta yawasina nauna. (2:1—4:31)
Mosese keta Anoni si tanatafakiya Itifita tufomu. (5:1—11:10)
Venuvisinatana keta noḡokawawa Itifitei. (12:1—15:21)
Gibo Yabeyabenina nenei tu Koya Sainai. (15:22—18:27)
Guyau yana visime keta yana dedeni. (19:1—24:18)
Vada Tafutafuna keta sawakedakedana kodukodu fasinei. (25:1—40:38)
1
Yakobo Susukwana Si Geyana Itifita Sinenei
1 Tovanama Yakobo i niniya Itifita, natunatuna ugunisi nukusi si niya. Natunatuna namoḡa o nofemaise kasi wava.
2 Nubeni, Simiyoni, Nebi, Yuda,
3 Isaka, Sebunoni, Beniyamina,
4 Dani, Nafatanai, Gada, keta Asa.
5 Yosefa o waniya Itifita. Yakobo susukwana kasi numatatafu kasi naḡa 70.
6 Muninei Yosefa keta unaunana matatafusi tufudenideni yota aviyaonana noko tufuwinama kana sewasewa si matekooḡa.
7 Eatu fiyao Isineni susukwasi si vinatunaneuneuwa eketa sabu i nakatamoka. Eketa Itifita fwayafwaya si toḡafotafotiya.
Itifita Tufomu Fiyao Isineni Dauna I Venisiya
8 Manamana yagwanina muninei, tufomu kiouna i vitovisimeya Itifita sinenei eatu muka tamo yana sanamana avana Yosefa i saviviniya Itifita fasinei.
9 Yana sabu nenesiyai i bwaduwa, “Kwa kitai, fiyao Isineni nofe tova naki si tufuteweita.
10 Taki kata aviya sina vivibututa nenei, Isineni nifanifaita sina tuyanomwanisiya keta sina nuaviita atu nofe fwayafwayanama nenei sina dibwana sina niya. Na fasinei ketaketa tamo ta vinuwadadana-dewadewai ebe muka kasi sabu ina nakatamoka.”
11 Nofe fasinei fiyao Isineni si tenisiya mudadava daunisi nenesiyai. Yota mudadava tamokatamokaḡa kana tovisimeonaona si tenisiya be sina visimeisiya. Eketa namoisima fiyao Isineni si nuyakayakanisiya be menana nuwesi nakanakasisi Fitomi keta Namesese si vikanasiya ebe nokomai tufomu kabwaga be nogonogo ina tenisiya.
12 Naki namaise dauna kasi nakanakata si venivenisiya, atu fiyao Isineni si teniya be si vinatunaneuneuwa keta si geyanamoka Itifita si gikafufuya. Nofe nenei keta Itifita namoisi fiyao Isineni si matutisiya.
13-14 Na uḡuna keta mudadava daunamokesi nenesiyai si yoyoḡavinavina. Si nuyakayakanisiya be mota si kikivina keta taga si kikiyafofowa. Yota baguna keta mudadava matatafuna nenesiyai si visavivinisiya. Si givikuvavanisiya nakasina atu muka simo yasi sineganigani.
22 Eketa Itifita tufomu yana namonamoḡa i visimeisiya i bwaduwa, “Tovanama tene Ibeniu natuna namoḡa ina tufuwa, Naeni ukowai kwana tewesobuwiya. Atu taki gumayogu ina tufuwa, nao ina fakwa.”