15
Mosese Yana Osedavadava
1 Noko muninei Mosese keta fiyao Isineni nofemaise si osedavadava Yave nenei.
“Yave ana osedavadaviya
uḡuna yana kaiwabu i vanemataiya.
Yasi osi be kasi tovidibwana nukusi
gibowai i tewesobusobuwisiya.
2 Yave tanake yaku fiwana eketa i gifafafanikuwa fasinei,
a oseosedavadaviya.
Tanake yaku Guyau, ana daviya.
Tanake amaku yana Guyau, ana ginakasiya.
3 Yave o aviya kana kaimatana,
kana wava o Yave.
4 Itifita tufomu yana aviya kasi waganusoni keta yana tonuaviya nukusi
i tewesobuwisiya gibowai.
Tufomu yana tonuaviya tomatakaikai,
Gibo Yabeyabenina nenei i vigamomonisiya.
5 Gibo i kabwanisiya
eketa si kenogavivina ogodibu sifunei maise gabana.
6 Yave yo, kikikataiu
fifiwanamataina.
Yave yo, kikikataiweu
nifanifaiu ku venuyauyaunisiya.
7 Aviyaonana si vikaniyabiniwa ku vatanisiya
uḡuna kwaḡa ku vanemataiya.
Keta ya kayokuḡa busubusuwanina i nuyauyauniya
keta ku vikanayaunisiya vitana nimwau sedovayana maise.
8 Niuḡu kawasiveinei
gibo ku nuvivaniya.
Nefo nutanasagusagusi si misiniya fita maise.
Ogodibu sinefounei gibo i kokoniya.
9 Nifaiu i onavaneya,
‘Ana omunitawisiya, keta ana tabisiya.
Yasi nogonogo matatafuna ana vitukuwiya,
nuwanuwaku aviyavana maise ana viya.
Yaku feto ana sinayaginiya
keta nimakuwai ana nuyaunisiya.’
10 Eatu kawasiveiu nenei
gibo i kabwanataunisiya.
Keta yoyo nutanasagusagusi nenesiyai
si gamomona gabana daunina maise.
11 Yave yo, mukamokena tamo avi guyau maise kwaḡa!
Aitevana tamo maise kwaḡa, dewadewamokeu keta tafutafuu?
Sina matutiwa keta sina daviwa
uḡuna kiyakiyaya kafa nuwatabau ku gikikinomanisiya.
12 Kikikataiu ku tuniya
keta nifanifaiu fwayafwaya i tononisiya.
13 Ya nuwagabubu fakwafakwa-vaḡasina nenei
ya namonamoḡa ku tutuvisobusiya ku viketanunisiya,
ya fiwana utubasinei ku viketanunisiya
keta ku niisiya ya kafa fakwa tafutafuna nenei.
14 Bigau ina kewa nenei, mani kunuma namoisi sina akikinikuna na yasi matuta.
Finisitiya namoisi matuta nakasina ina gifofonisiya.
15 Edomu kasi kaiwabu sina matutamoka.
Yota Moabi kana toviketanuneina na yasi matuta sina akikinikuna.
Kenani kana matatafu, matutai ina kafuwafuwaisiya.
16 Matatafusi matuta nakasina ina gifofonisiya.
Yave yo, kataiu yana fiwana sina kitiya nenei,
sina misinivaḡata vitana gabana maise,
kana nivaniva kima ya namonamoḡa kana niunisiya,
kana nivaniva namoikima vikaetoḡa nenei ku ketoyaukiya kana niunisiya.
17 Yave yo, kuna kanasunisiya be tauḡu ya koyai kuna vitoḡamenanisiya —
menananama ku gibokiya be kuna fakwiiya nenei,
numanama tafutafuna tauḡu ku omanafufuniya nenei.
18 Kwaḡa Yave ya namonamoḡa nenesiyai kuna visime-vaḡata.”
Miniyami Kana Ose
19-21 Anoni nouna Miniyami tomatakawa, kinage kabesona nimanei i givikaviniya keta vivine matatafusi si muniiya si kikinomana si nukinageya keta si vaḡa. Eketa Miniyami nofemaise i oseya,
“Yave tana osedavadaviya
uḡuna yana kaiwabu i vanemataiya.
Yasi osi be kasi tovidibwana nukusi
gibowai i tewesobusobuwisiya.”
Tovanama Itifita tufomu yana osi keta yana aviya kasi waganusoni yota kasi tovidibwana nukusi gibo sinenei si kanasuna, Yave gibo i viyewiya keta i kabwanataunisiya. Eatu Isineni namoisi o gibo sinenei atu fwayafwaya kokoninei si niya.
Ukowa Onaonana I Dewadewa
22 Mosese fiyao Isineni i viketanunisiya keta Gibo Yabeyabenina si teweiya atu si kanasuna fwayafwaya nunumonumona kana wava Suwa nenei. Kuyadayada tonusi fafaninama nenei si niniya eatu muka tamo ukowa sita nisaḡai.
23 Atu tovanama si kikinomana kabaḡa kana wava Manai nenei, ukowa si nisaiya. Eatu kayomunina o onaonana eketa muka yu kana nufota. (Na fasinei keta kabainama si weniya Manai.)
24 Namoḡa si odowa Mosese nenei si bwaduwa, “Avana kata yumiya?”
25 Na fasinei Mosese Yave nenei i bwedisitasita eketa Yave kai kafewina i visawaveniya. Tovanama i tewesobuwiya ukowai, ukowa i dewadewa.
Nokomai namoḡa yasi fakwafakwa fasinei Yave visime i venisiya be i anuvinuvisiya taki sina muniiya o muka.
26 I bwaduwa, “Taki fonaku kwana nowanautuutuya keta yaku nuwanuwa kwana muniiya be yaku visime matatafuna kwana vifotuwisiya, nao visafwavinaḡasima Itifita namoisi a venisiya muka ana nemiyeisi nenemiyai. Uḡuna Iyau Yave kami togivibwina.”
27 Noko muninei si nemiya menana Enimu nenei keta fonufonu 12 yota bodaboda kaisi 70 si nisaisiya. Nokomai ukowa kafakainei si vikabaḡa.