12
Yave Ebenamu I Bwauwiya
1 Yave Ebenamu i iyaviya i bwaduwa, “Ya menana keta ya sabu yota ya fasekwa kuna teweisiya, atu fwayafwayanama ana visawaveniwa nenei kuna niya.
2 Ka sabu nakasina ana veniwa keta tasike nenesiyai kunuma nakasina ina kikinomana.
Iyau ana sawanuwagabubuwiwa.
Ka wava yota ana givinakasiya be namoḡa matatafusi sina sanamaniya keta sina vifotuwiwa.
Kwaḡa neneweu, namoḡa kasi sawanuwagabubu sina nisaiya.
3 Tovanama namoḡa sina sawanuwagabubuwiwa, Iyau yota ana sawanuwagabubuwisiya.
Atu taki namoḡa sina ituwa, Iyau yota ana itusiya.
Kwaḡa neneweu, namoḡa matatafusi fwayafwaya etanei
ana sawanuwagabubuwisiya.”
4-5 Na tovanama nenei Ebenamu kana manamana 75. Keta i saviviniya avana Yave i iyaviya maise. Anani i teweiya na kawana Sanai keta auna Nota nukusi. Tovanama Anani si fakwa nenei, Ebenamu yana nogonogo keta yana yomuyomu keta yota yana tobunanige i nisaḡa. Nofe ibasima nukusi i visiya keta Kenani kuweyaina si niya.
Tovanama si kikinomana Kenani kana baionota nenei,
6 Ebenamu yana sabu nukusi noko fwayafwayanama si venuonosiya keta si niya menana nakasina kana wava Sekemu niniunei. Nokomai kai nakasina niniunei si vikabaḡa menana Mone nenei. Tovanama nenei Kenani fiyaosi yawane si fakwafakwa noko fwayafwayanama nenei.
7 Nokomai Yave tauna i tenekikinomaniya Ebenamu nenei eketa i iyaviya i bwaduwa, “Nofe Kenani fwayafwayana susukwau ana venisiya.” Eketa Ebenamu, kafa vibwanaose Yave nenei kana didiḡa i didiiya. Namai Yave tauna i visawaveniya nenei, i vimisiniiya.
Fafani Kenani sinenei, Ebenamu keta yana sabu nukusi si toḡavenudadana. Muka numa sita kiyona atu vada si kifufuna keta nenesiyai si fakwa. Tovanama sina niya mani kabaḡai be sina vikabaḡa, yasi vada si kikikuwa eketa yomuyomu kwausiyai si unaunaniina.
Muka nugi sita bagubaguna atu yomuyomuḡa si kikitavikavina. Tunina yasi yomuyomu si kakamokisiya atu tunina si vivitamanina mani namoḡa nukusi witi fasinei. Eketa witinama o si fuwafuwaiya keta maneka si kakaguwana.