3
Namaise Go'yona I Viuḡu
1 Yomuyomu kidagimai Yave Guyau i fufunisiya sinesiyai mwata tanake tovikanononoonaona. Mwata gumayogu i nutonidadaniya i bwaduwa, “Venemokena Guyau i iyavimiya muka uwa kwana ka kaisima baguna sinenei?”
2 Gumayogu i bwaduviyewa i bwaduwa, “Muka, kima kama nufota kaisima uwasi baguna sinenei kana kawa,
3 atu kai tamokaḡa baguna sinefounei i misimisiniya, Guyau i iyavikiya i bwaduwa, ‘Muka kainama uwana kwana kaniya keta muka kwana ginuvanuvai. Taki kwana saviviniya na naki kwana mateya.’ ”
4 Mwata i iyaviya i bwaduwa, “Muka venemokena. Muka kwana mate.
5 Kuyadayadanama nenei kwana kaniya, matami sina kabwasasa keta kwami vitana Guyau maise kwana sanamaniya dewadewana keta goyona. Guyau i sanamaniya keta na fasinei i sawatanimiya muka kwana kaniya.”
6 Gumayogu i kitiya kai dewadewana kana nufota kabwaga keta kana fusa dewadewana. Nuwanuwana ina kaniya be ina sanamana, na nenei aviyesi uwana i visiya keta i kaniya, atu tunina kawana i veniya keta i kaniya.
7 Tovanama nenei matasi si kabwasasa keta si sanamaniya tasike gonegonesi na nenei nugweda dadana si yuna keta si suyakafukafuwa si dawanafota.
8 Tovanama navinavi kabaḡa i tunuwa, si nowaniya Yave Guyau baguna nenei i niniya. Namoḡa keta kawana si makaviuna kai nenesiyai be Yave Guyau muka ina kitaisi.
9 Atu Yave Guyau namoḡa nenei i bwauwa i bwaduwa, “Kwaḡa namai?”
10 Namoḡa i bwaduviyewa i bwaduwa, “A nowaniwa baguna nenei. Iyau gonegoneku na fasinei a matuta keta a makaviuna.”
11 Yave Guyau i nutoninuvanuva i bwaduwa, “Aitevana i iyaveu kwaḡa gonegoneu? Kainama a iyaviwa muka kuna kaniya, naki ku kaniya?”
12 Namoḡa i bwaduviyewa i bwaduwa, “Gumayogunama ku venikuwa, tanake i venikuwa kai uwana keta a kaniya.”
13 Yave Guyau gumayogu i nutoninuvenuviya i bwaduwa, “Ei, ava ku fufuniya?”
Gumayogu i bwaduviyewa i bwaduwa, “Mwata i nonukuwa keta a kaniya.”
14 Yave Guyau mwata i iyaviya i bwaduwa,
“Na ava ku fufuniya fasinei, ana vimatadawaniwa
yomuyomu nimwauwai be kidagimai matatafusi sinesiyai.
Kwaḡa kuna oyaḡaḡa manawaweu
keta kafusisima o ka kabwaga yawasiu kana matatafu nenei.
15 Ana visanafuwiwa kwaḡa keta gumayogu kwana vikaniyabina,
keta kwaḡa susukwau keta gumayogu susukwana sina vikaniyabina.
Tanake debabouḡu ina nufuwaiya
atu kwaḡa kaeketuketuna kuna kanavasiya.”
16 Gumayogu nenei i bwaduwa,
“Ana visanafuwiwa dauna kuna nisaiya tovanama kuna visifuḡa nenei,
nofe tovanama keta ina niya kuvavana nakasina vinatuna nenei.
Nuwanuwau be kawau nukusi,
atu tanake kwaḡa ina vanetaniwa.”
17 Adama nenei i bwaduwa,
“Kawau fonana ku nowaniya fasinei
keta kainama a iyaviwa muka kwana kaniya atu kwa kaniya,
keta kwaḡa neneweu fwayafwaya a ituituya.
Bunanige kuvakuvavanina kuna saviviniya yo ka kabwaga kuna nisaiya yawasiu kana matatafu nenei.
18 Fwayafwaya ina okikinomaniya kisisiku kikikwanekwanesi keta sakasakanunusi,
keta noko bwibwiyagunama kabwagina nenei kuna kawa.
19 Kuna fwasimowa bunanige nenei yo
ka kabwaga kuna viya
kana nivaniva kuna makaviniwa
fwayafwaya nenei.
Kafusisima a viya fwayafwaya nenei keta a gikamakamiwa,
keta kwaḡa kuna vikafusisima-savaviniwa.”
20 Namoḡa i sanamaniya kawana ina viayowa namoḡa fakwafakwasi matatafusi nenesiyai, na fasinei i weniya Ive.
21 Yave Guyau yomuyomu kwafinisi i yuna keta nuya i fufunisiya Adama keta kawana fasisiyai keta i vikotonisiya.
Yave Guyau I Vikikinomanisiya Adama Keta Ive Baguna Nenei
22 Yave Guyau tauna nenei i bwaduwa, “Namoḡa i nemiya kita maise keta i sanamaniya dewadewana keta goyona. Muka nimana ina tunei kai yawasi i kakavenena, uwana ina vai ina kaniya be muka ina fakwavaḡata.”
23 Keta Yave Guyau i vikikinomanisiya baguna Ideni nenei, be namai fwayafwayanama nenei i gikamakamiya Adama ina bunanigeiya.
24 I vikikinomanisiya muninei keta i iyavisiya kikifufuna kasi wava senabimu sina misiniya gagasa keweyaina baguna Ideni nenei. Yota i teniya feto nununuina keta nuganavivineinana be tasike sina viketofotiya ke'ta i niniya yawasivaḡata kana kai nenei.