14
Paul ma Barnabas i jima au Ikoniam.
Kauana tagogina i tupua au Ikoniam. Paul ma Barnabas i nae mai Jew ai au boru numana ma menanare i babaninei da mai Jew ma Jentail maḡamaḡaui i vitumaḡana. Wate mai Jew ḡelaui eḡa vivitumaḡanai Jentail i kelari ma ai nota i barai da Paul ma Barnabas i geduaiei. Avena ma Paul ma Barnabas kampa i mae guratana ma ana tepatorai Bada ana aguei i jimajima. Ma kaua babaii ma vivirewapanai maḡamaḡaui i kauei. Wei i vimataira da ai jima lamna riwa kaua.
Taon i kai ḡelaui mai Jew aubaii i mairi ma ḡelaui Aposol aubaii i mairi. Ma mai Jew ma Jentail ḡelaui i vioga da Paul ma Barnabas ḡaimei ita viraurauei. Wate taui riwana i vaia ma dobuna i ruba-tawanei ma i nae au taon ḡaeḡaei Listara ma Derbi au Laikonia provins ma taon au ririvai. Ma weka Riwana Aiaina i jimana-naiei.
Rava i notai da Paul ma Barnabas god
Au Listara oroto aena ḡokokokarana, alona manawanei gwaḡagwaḡana i vinatunei ma eḡa ita babara dadana. Kampa i kiala ma Paul i bababani i rarautaniḡanei. Paul matana i tawanei ma i ʼnanai da tauna i vitumaḡana da ita lawana 10 ma i garara awarina, “Aemei ma mairi!” Ma orotona aenei i mairi ma babara i vikarei. 11 Maranai patara i ʼnanai Paul aiwai i kauei taui ava ai ponei i babani vivira, “god ruaḡa i ḡairai awarita me *rava.” 12 Taui i riwa da Barnabas lamna mai Greek ai god Zeus ma Paul i vitauvibabani aubaina i riwa da tauna Hermes. 13  Zeus ana pulo gabuna, taon au giana, Zeus ana pirisi patara maiteni bull ma berana ulaulai i neiai taon au metaetana da Apasol ita puloi.
14 Wate maranai Paul ma Barnabas wei riwana i nonori, taui ai gara i sikai ma i ruba-opu patara awarii ma i garara, 15  “Aiwai aubaina wei kauana o kaukauei? Tauai rava ota me taumi nanare! Tauai Riwa Aiaina a neneiai da nai kauai kwakwavi ona voterei ma ona nae Bada lawalawaina ona viborumei. Tauna mara ma dobu ma boga ma aiwai anatapuna au orai i kauei. 16 Wariaḡa tauna rava i voterei da ai ḡoanei i mae. 17 Wate marana patapatai e viviatataiemi da tauna e mamae ma ana nuavaina e verevereta, garewa marei ma maura ma lam e vereveremi ma au orami nuaiai e oaoai.” 18 Apasol i bababani ma i kauana-guratei da ravai ita viḡaei da taui avena ita puloi.
Mai Listara Paul ḡaimei i viraurauei.
19 Mai Jew ḡelaui Antiok ei ma Ikoniamei i nei ma patarana i egari da Paul ḡaimei i viraurauei ma taonei i taina-opunei, i notai da tauna iraḡe. 20 Wate maranai vivitumaḡanai i ḡeta da i mae-kwaviviroi, tauna i vomairi ma i naeme au taon.
Aupom ḡelauna tauna ma Barnabas i nae au Derbi.
21  Paul ma Barnabas Riwana Aiaina i jimei au Derbi ma ekalesia voui maḡamaḡaui i rui. Ma i nae me au Listara, Ikoniam ma Antiok. 22 Metauna au dobuna i jimajima kampa tauvitumaḡana i ririwana-guratei ma i vovai-virewapani da ina mairi-jijina ai au tumaḡana i pa, “Piripiri maḡamaḡaui au orana ona rui wate au murina God ana au vibadana ona rui.” 23  Paul ma Barnabas ekalesia nununai ai babada i vinei ma i raupari ma i uji Bada awarina, da ai ekalesia ma ai babada ina paini. 24 Anina ma au Pisidia provins i verautua da i nae me au Pamphilia provins. 25 Au Perga Bada riwana i jimei ma i ḡaira au Atalia. 26 Ma kampa i amkuka ma i nae me au Antiok au Syria provins, weka ai nola i vikarei, maranai ekalesia kampa God i vibaḡai da taui ita viaiaini ai au nola ma i paritawanei ma marina ai nola e vivikwai.
27 Ma kampa i ḡeta ma ekalesia i vitagogiei, ma aiwai anatapuna God ana aguei i kaukauei rava i vieḡei, ma menanare Iesu metaeta i votawanei da Jentail maiteni Tauna i vitumaḡanei. 28 Ma kampa tauvitumaḡana maiteni i mae guratana.
* 14:11 Paul ma Barnabas Greek ponanei i bababani 14:12 Zeus lamna mai Greek ai god ḡaeḡaena. Rava ai vitumaḡana da godna e vivilawani. Hermes lamna Zeus natuna ma tauna lana Tau-vinolanolana. Zeus ma god ḡelaui aubaii. Rava i notai da Hermes lana e kauwei da rava e babana-kauwa ma ai babara e aiaii. Wate nanarena e notanotai da tauna kauwa aiaina e vivitupui ma e kauwei da rava e vivinatuna kauwa. 14:15 Exo 20:11