7
Bada ana rava vinevinei mai Israel
1 Ma Moses mai Israel i riwei, “Maranai Bada ami God i ruiemi dobuna i vereveremiana; Tauna au naomi ami ḡavia anatapui ina viaḡaḡana-opunei: mai Hitti, mai Girgash, mai Amori, mai Canaan, mai Perisi, mai Hivi, ma mai Jebus. Dam seven ḡaeḡaei ma vivirewapana kauai eḡa me taumi.
2 Ma maranai Bada ami God taui au urami i terei ma o vovaiubai lamna taumi wei ravai ona pupuni. Eḡa maiteni aiwai babanina ona kauei; ma eḡa ona rau-nuapoapoelei.
3 Eḡa awarii ona tavine. Eḡa natunatumi guguinii bo laragai ona verei da ina ravaḡi.
4 Aubaina natunatumi ina raveni da Bada ina voterei ma god ḡelaui ina raudunelei. Ma Bada ana amloḡaiḡai awarimi ina nei ma ina pupunimi.
5 Wenanare awari ona kauei. Ai pulo aniapuna ona viairikarikai ma ganai ona viaigwadagwadai; ma Asherah kokoitaui ona viaigaigai ma ai au menamenana ona apui.
6 Aubaina Bada taumi i vinemi ma i viaiainimi Tauna aubaina. Bada rava maḡamaḡaui au dobu ma taumi i vinemi da ḡarinei.
7 —Ma Bada eḡa ita rauoḡarem ma ita vinem aubaina taumi dam patarana ḡaeḡaena, eḡa me dam ḡelaui. Riwa kaua da taumi dam aburuoina au dobu.
8 Wate Bada nuanuami i vaia ma parivainuaḡana bagibagina noinoimi maiteni i kauei. Ma lamna aubaina urana virewapananei panipani au orana i vai-melemi, Pharaoh - mai Egypt ai gulau awarina.
9 Ona aramana-kauei da Bada ami God. Tauna ava God ma tauna God vipatutuna ma aiwai e ririwei e kaukauei. Taui da nuanuana e vaivaia ma ana babani e vovoteletelei, Tauna taui nuanuana e vaivai-kauei ma e viviaiaina-kauei i parivainuaḡani nanare da kimta tausan.
10 Wate taumi da Bada o rauaḡaiḡaiei; Tauna eḡa ina volatelatemi ma ina pupunimi.
11 Nanare taumi ona inana-kauei da tarawatu ma viararamana anatapui amadodo a vereveremi ona voteletelei.”