Ecclesiastes
Tauviararamana
Pariverena
Aiai da wei bukana i giruma lamna eḡa wavana tata aramanei. Wate rava ḡelaui e ririwa da gulau Solomon i girumi. Ma aiai i girumi lamna anina da rava araramanina. E ririwa da wavana lamna tauviararamana. Aubaina purapura vopiripirii e bababaniei. Rava maḡamaḡaui God eḡa ita aramanei aubaina da i ḡoei da ina baiei da aiwai e tuputupua. Wate anona eḡa ita nenelaḡai. Tauviararamana wei ravai ai nota e ririweta. Mara ḡelauna rava aiwai i kaukauei lamna eḡa anoi Ma e ririweta da wei kauai lamna me ive tata viaḡaḡei. Rava i nelaḡai da lawana wei au dobuna lamna anona eḡa aiwai.
1
Tauviararamana ana giu
Wei lamna tauviararamana, David natuna, mai Israel ai gulau ana viararamana;
Tauviararamana i riwa, “Anona eḡa!
Anatapuna kwakwavina!”
Ma nolanola da ma magura ma anona aiwai?
Kimta e nenei ma e nenae,
wate dobu maemaena e mamae.
Madeḡa e gogogo ma e arearere,
ma e wanawanavirai da ina vikarena-melei.
Kariwabu e ḡotaḡota,
rauanaḡa e opuopu,
e kwavikwaviviro
ma e wanawanavirai da ina vikarena-melei.
Waira anatapui au boga e opuopu,
wate boga eḡa ita oaoai.
Waira matanei,
e ḡaiḡairai ma e nenae me au matana.
Kaua anatapuna i viʼnigarigari,
menanare tana riwa nei?
Matata eḡa melanai ina inana iaua;
Taniḡata eḡa melanai ina nonora iaua.
Aiwai wariaḡa i tupua ina tupua me,
aiwai wariaḡa i kauei ina kauana-melei.
Eḡa aiwai, kaua vouna wei au dobuna!
10 E ririwa, “Ona inanai! Wei kaua vouna.”
Wate eḡa! Wei kaua maemaena;
wariaḡana, muriai da ta tupua.
11 Kaua wariaḡa i tuputupua, eḡa aiai ita notanotai.
Ma kaua marina da muriai e tuputupua, eḡa aiai ina notai.
Nuaulaula anona eḡa
12 Tau lamna tauviararamana ma Israel ai gulau au Jerusalem. 13 Orau a terei da aiwai anatapuna au dobu e tuputupua, nuaulaulei ana girumi. Ma a aramanei da God vita ḡaeḡaena rava i verei. 14 Aiwai e tuputupua au dobu a vinua-notenotei ma a inanai da;
anatapui anona eḡa, kwakwavina. Ive ava ta viviaḡaḡei.
15 Aiwai barabarai amapo eḡa ma vojijimana-melei,
aiwai awarim eḡa, lamna menanare ma iavanei.
16 Au orau a riwa, “Tau a nuaulaula guratana,
eḡa me aiai ḡelauna au Jerusalem i vivigulau nanare.
A ʼramanei nuaulaula aiwai ma aramana aiwai. 17 A ḡoei da ata aramana-kauei nuaulaula aiwai ma bua ma opa aiwai.
Wate a aramanei da wei lamna me ive a viviaḡaḡei.
18 Aubaina au nualaula e rarata, mae-boaboa e rarata
au aramana e rarata, au nuabola e rarata.”