37
Bada gelama ina ravivouni
1 Bada i raunimavoaiu ma aruanei i naieu da gwagwa ḡaeḡaena au pouna i tereu, rava gelamii gwagwanana i oai.
2 Gwagwanana a naeni ma a inanai da gelama i maḡa guratana ma i poi.
3 I paridadaneu, “Rava ota natuna, amapo wei gelamii ina virava me bo eḡa?” A paribelei, “Oo! Bada God, tam ainelam u aramanei.”
4 Ma i riweu, “Riwauei gelama ma riwei, ‘Gelama poii, Bada riwana ona nonori.”
5 Bada God wenanare gelama i riwei, “Lavutu au orami ana terei ma ona lawana me!
6 Vioa ma warowaro ana veremi, ma opi da gelama ina purui. Ma lavutu ana veremi da ma lawana. Kampa ma aramanei da Tau Bada.”
7 I ririweu nanare a babani, a vikarei da a bababani ma dobuna ura ketarana i nae da dobuna i oai, gelama anatapui i vitagogiei.
8 A inainana ma warowaro ma vioa gelama au tepana i ampasi ma au tepai opi i tupua da i purui, wate awari eḡa lavutu.
9 Ma i riweu i pa, “Rava ota natuna, Bada God riwanei ive ma riwei, ‘Bada God e ririwa, ive meiei da meiei e uveuvena, au orami lavutu ina opui ma taubeu patarai e matamatave ona uveni da ina lawana me.”
10 Ma i ririweu nanare a babani, ma lavutu ravai tupuai i ruini. Anatapui i lawana ma i mairi sorodia boruna ḡaeḡaena.
11 I riwa me, “Rava ota natuna, mai Israel lamna me wei gelamii. Taui e ririwa i pa, ‘Tauta gelama poi ava ma ata tumaḡana i kwa, ata dam i kwa.’
12 Lamna aubaina ma riwana-melei, Bada God wenanare e ririwa, ‘Ona inana! Ami kokoaga ana votawanei ma ana voepaemi ma ana neiana-meleiaimi au Israel.’
13 Au rava! Maranai wei i tupua, ona aramanei da Tau Bada.
14 Ma Aruau au orami ana terei ma ona lawana ma ana neiana-meleiaimi ami au dobu oina. Maranaina, ona aramanei da Tau Bada. Ee! A ririweia; ana kauei.”